ខណៈដែលប្រជាជនទូទាំងប្រទេសត្រូវបានប្រាប់ឲ្យចៀសវាងកន្លែងសាធារណៈដែលមានមនុស្សច្រើន និងក្រុមហ៊ុនព្រមទាំងសាលារៀនបានចាប់ផ្តើមផ្អាកដំណើរការដើម្បីការពារការរាតត្បាតនៃវីរុសកូវីដ-១៩ អាជីវកម្មតូចៗទទួលរងគ្រោះច្រើនជាងគេព្រោះពួកគេអាចនឹងត្រូវបានបង្ខំឲ្យផ្អាកការរកស៊ី ឬបើកដំណើរការធម្មតាតែមិនមានអតិថិជនមកជួយគាំទ្រជាដើម ។
ដូច្នេះក្នុងកំឡុងពេលនេះ មនុស្សដែលនៅក្នុងសហគមន៍គួរតែមានចិត្តជួយគ្នាទៅវិញទៅមកដើម្បីចៀសវាងការបិទដំណើរការទាំងស្រុង និងការខាតបង់ធ្ងន់ធ្ងររបស់អាជីវកម្មតូចៗ ។ ខាងក្រោមនេះ គឺជាវិធីមួយចំនួនដែលអ្នកអាចជួយអាជីវកម្មទាំងនោះបាន៖
១. កម្ម៉ង់ និងប្រើសេវាដឹកជញ្ជូន
អ្នកអាចនឹងចង់ចៀសវាងភោជនីយដ្ឋានដែលអ្នកចូលចិត្ត ព្រោះមិនចង់បង្កើនឱកាសដែលអាចឆ្លងវីរុសខាងលើ តែអ្នកនៅតែអាចកម្ម៉ង់អាហារពីពួកគេ និងប្រើសេវាដឹកជញ្ជូនដដែល ។ វាមិនត្រឹមតែបន្តផ្តល់ប្រាក់ចំណូលដល់ភោជនីយដ្ឋានទេ តែអ្នកក៏ជួយដល់មនុស្សមួយចំនួនទៀតដែលពឹងផ្អែកលើការដឹកជញ្ជូនទំនិញឬអាហារសម្រាប់ចិញ្ចឹមជីវិត ។
២. ទិញទំនិញអនឡាញ
ហាងលក់ទំនិញជាច្រើនបច្ចុប្បន្ននេះតែងតែមាន Page លើ Facebook ឬ Instagram ដែលអ្នកអាចមើលផលិតផល និងកម្ម៉ង់ទិញបានដោយងាយ ។ បើអ្នកមិនចង់ចាកចេញពីផ្ទះដើម្បីទិញសម្លៀកបំពាក់ ឬសម្ភារៈប្រើប្រាស់ផ្សេងៗទេនោះ អ្នកអាចគាំទ្រអាជីវកម្មក្នុងតំបន់អ្នកដោយទិញពីពួកគេអនឡាញបាន ។
៣. កុំចេញពីផ្ទះប្រសិនបើអ្នកមិនស្រួលខ្លួន
អ្នកមិនគួរផ្តល់ហានិភ័យដល់អ្នកដទៃទេប្រសិនបើអ្នកមិនស្រួលខ្លួន ដូច្នេះសូមកុំចេញពីផ្ទះរហូតអ្នកដឹងថាខ្លួនជាវិញហើយ ។ អាជីវកម្មតូចៗជាច្រើនកំពុងព្យាយាមឆ្លងកាត់ស្ថានការបច្ចុប្បន្ននេះដូច្នេះសូមកុំធ្វើឲ្យបុគ្គលិករបស់ពួកគេឈឺដែរ ។
៤. រក្សាភាពអត់ធ្មត់
ចូរចងចាំថាអាជីវកម្មជាច្រើនកំពុងជួបការលំបាកក្នុងកំឡុងពេលនោះ ដូច្នេះអ្នកប្រហែលជាត្រូវរងចាំយូរជាងធម្មតា ឬផលិតផលដែលអ្នកចង់បានអាចនឹងអស់ពីស្តុកជាដើម ។ អាជីវករក៏ចង់ផ្គត់ផ្គង់តាមតម្រូវការរបស់អ្នកដែរ ដូច្នេះសូមអ្នកមានចិត្តអត់ឱនឲ្យគ្នាទៅវិញទៅមក និងរក្សាភាពអត់ធ្មត់ខណៈដែលបន្តការគាំទ្រដល់ពួកគេដដែល ៕ កែសម្រួលដោយ ៖ សុឃាក់
ចែករំលែកព័តមាននេះ