ទោះជាចំនួនករណីដែលមានអ្នកឆ្លងវីរុសកូវីដ-១៩ ក្នុងប្រទេសកម្ពុជាមិនមានច្រើនដូចប្រទេសជិតខាងពិតមែនក្តី អាជីវករត្រូវតែត្រៀមខ្លួនឲ្យបានច្បាស់លាស់ដើម្បីការពារបុគ្គលិក ក្រុមគ្រួសាររបស់ពួកគេ និងសហគមន៍របស់អ្នកទាំងមូល និងចៀសវាងការជ្រួលច្របល់ដែលបង្កជាបញ្ហាដល់ប្រទេសទាំងមូល ។ ដូច្នេះតើអាជីវករអាចចូលរួមក្នុងការការពារមិនឲ្យមានការរាតត្បាតវីរុសកូវីដ-១៩ បានដោយយ៉ាងដូចម្តេច?
១. រក្សាស្តង់ដារអនាម័យឲ្យបានល្អ
អាជីវករគួរតែអនុវត្តទម្លាប់សម្អាតរាល់សម្ភារៈដែលមានក្នុងហាង ឬកន្លែងធ្វើការរបស់ខ្លួនជាប្រចាំព្រោះវីរុសនេះអាចរស់នៅបានប៉ុន្មានម៉ោងដែរអាស្រ័យលើសីតុណ្ហភាព ។ លើសពីនេះទៅទៀត អាជីវករត្រូវតែផ្តល់ជាទឹក ឬអាល់កុលលាងដៃ ក្រដាសជូតដៃ និងក្រដាសសើមជាដើម ។ អ្នកត្រូវតែអប់រំដល់បុគ្គលិកឲ្យតែងតែលាងដៃឲ្យបានស្អាតបាតជាពិសេសមុនពេលពួកគេទៅជិតអតិថិជន ។
២. ឲ្យបុគ្គលិកដែលមិនស្រួលខ្លួនទៅសម្រាកនៅផ្ទះ
ប្រសិនបើបុគ្គលិកអ្នកមានអការៈក្តៅខ្លួន និងដង្ហក់ អ្នកគួរតែឲ្យពួកគេទៅសម្រាកនៅផ្ទះរហូតដល់មុខសញ្ញាទាំងនោះបាត់ទៅវិញបានយ៉ាងតិចក៏ ២៤ម៉ោងដែរ ។ ប្រសិនបើមុខសញ្ញាកើតមានឡើងខណៈដែលពួកគេនៅកន្លែងធ្វើការ អ្នកត្រូវធានាថាពួកគេមិននៅជិតអ្នកដទៃឡើយ ។
៣. ជំរុញឲ្យមានការរក្សាគម្លាត
ព្រោះវីរុសនេះឆ្លងពីមនុស្សម្នាក់ទៅមនុស្សម្នាក់ទៀត អ្នកគួរតែជំរុញឲ្យមានការរក្សាគម្លាតរវាងមនុស្ស និងមនុស្សនៅកន្លែងធ្វើការ ដូចជាជំរុញឲ្យបុគ្គលិកអង្គុយឲ្យបានឆ្ងាយពីគ្នា ជាពិសេសពីមនុស្សដែលងាយនឹងឆ្លងវីរុសនេះដូចជាក្មេងៗ និងមនុស្សចាស់ជាដើម ។ ជាមួយគ្នានេះផងដែរ អ្នកគួរតែកាត់បន្ថយកិច្ចប្រជុំដែលមិនចាំបាច់ ឬជំរុញឲ្យមានការប្រជុំអនឡាញជាដើម ។
៤. អប់រំបុគ្គលិកដើម្បីចៀសវាងការចលាចល
កំឡុងពេលដែលមានការរាតត្បាតនៃវីរុសនេះជុំវិញពិភពលោក ពាក្យចចាមអារ៉ាមក៏អាចនឹងត្រូវបានចែករំលែកបានលឿនដែរ ដូច្នេះអ្នកមានតួនាទីក្នុងការផ្តល់ព័ត៌មានច្បាស់លាស់និងពិតប្រាកដឲ្យទៅបុគ្គលិក ។ អ្នកត្រូវតែនិយាយជាមួយពួកគេដោយផ្ទាល់ដើម្បីចៀសវាងការយល់ច្រឡំ និងប្រាប់ពួកគេមិនឲ្យជឿដំបូន្មាន ឬដំណឹងថ្មីៗដែលមិនមែនចេញមកពីប្រភពច្បាស់លាស់ ៕ កែសម្រួលដោយ ៖ សុឃាក់
ចែករំលែកព័តមាននេះ