ខេត្តកំពង់ចាម ៖ «នៅក្នុងខេត្តកំពង់ចាមមានបុរី២ទៅ៣កន្លែង ដែលសាងសង់មិនគោរពតាមបទដ្ឋានបច្ចេកទេសដោយមិនមានប្រព័ន្ធលូសម្រាប់បង្ហូរទឹក បែរជារកបង្ហូរមកកន្លែងមនុស្សដើរលេង និងបង្ហូរចូលទន្លេអ៊ុជាដើម» នេះជាប្រសាសន៍របស់លោក អ៊ុន ចាន់ដា អភិបាលនៃគណៈអភិបាលខេត្ត ថ្លែងនៅព្រឹកថ្ងៃទី០៩ មីនានេះ នៅក្នុងសាលប្រជុំសាលាខេត្តក្នុងពិធីវគ្គផ្សព្វផ្សាយអំពីច្បាប់ស្ដីពីសំណង់ដល់អាជ្ញាធរមានសមត្ថកិច្ច មន្ត្រីជំនាញនិងវិស័យឯកជនដែលរៀបចំឡើង ដោយក្រសួងដែនដីនគរូបនីយកម្ម និងសំណង់ ។
លោកអ៊ុន ចាន់ដា អភិបាលខេត្តមានប្រសាសន៍ឲ្យដឹងថា ការជួបជុំគ្នានៅព្រឹកនេះពិតជាមានសារៈសំខាន់ដោយកាន់តែយល់ច្បាស់ស្ដីពីច្បាប់ការគ្រប់គ្រងសំណង់ ។ ហេតុដូច្នេះហើយបានអញ្ជើញអាជ្ញាធរចាប់ពីថ្នាក់ឃុំរហូតដល់ស្រុក និងខេត្តមកចូលរួម ដើម្បីត្រួតពិនិត្យមើលឲ្យឃើញសំណង់ដែលខុសច្បាប់ ឬក៏ខុសបច្ចេកទេសការសាងសង់ ។ លោក អភិបាលខេត្ដមានប្រសាសន៍បន្តថា ចំពោះសំណង់ដែលបានកើតឡើង ហើយបង្កឲ្យមានបញ្ហានោះមិនត្រូវរុញដាក់គ្នាទៅវិញទៅមកនោះទេ សំខាន់ត្រូវរួមគ្នាដោះស្រាយជាបន្ទាន់ ដើម្បីកុំឲ្យមានបញ្ហាកើតឡើង ។ ជាមួយនោះសំណង់មុននឹងកើតឡើង មន្ត្រីជំនាញ ឬក៏អាជ្ញាធរនៅមូលដ្ឋានសូមធ្វើការត្រួតពិនិត្យជាមុនឲ្យបានច្បាស់លាស់ថា តើសំណង់នោះស្របច្បាប់ដែរឬទេ ហើយវិស្វករដែលកំពុងសាងសង់នោះមានច្បាប់ទទួលស្គាល់ដែរឬទេ ? ការអភិវឌ្ឍន៍បុរីនៅតំបន់មួយ ចំនួនខ្លះបានលោតឆាតដោយត្រូវរ៉ូវជាមួយនឹងអាជ្ញាធរមូលដ្ឋានជាអ្នកបិទភ្នែកឲ្យសាងសង់ ឬក៏មានការពុះដីឡូតិ៍ ដើម្បីសាងសង់ផ្ទះល្វែងជាដើម ដែលពុំស្របតាមបទដ្ឋានបច្ចេ កទេស គឺមិនបានសាងសង់ប្រព័ន្ធលូ ។
ក្រោយពេលដែលប្រជាពលរដ្ឋនាំគ្នាទិញអស់កើតមានការប្ដឹងផ្ដល់ជាមួយនឹងម្ចាស់បុរី ឬម្ចាស់ដីឡូបញ្ហាទាំងអស់នោះត្រូវបានធ្លាក់មកលើអាជ្ញាធរដែលជាអ្នកដោះស្រាយទៅវិញ ។ ចាប់ពីពេលនេះតទៅ ប្រសិនបើមានក្រុមហ៊ុនណាត្រូវសាងសង់បុរីត្រូវយកប្លង់គោលនោះឲ្យមន្ត្រីជំនាញធ្វើការត្រួតពិនិត្យជាមុនសិន ដើម្បីចៀសវាងកុំឲ្យមានបញ្ហាកើតឡើងជាបន្តទៀត ។ សំណង់អគារមួយចំនួន ដោយសាងសង់មិនមានកន្លែងសម្រាប់ជនពិការឡើងនោះទេ ដូច្នេះសូមកែសម្រួលឡើងវិញធ្វើយ៉ាងណាសាងសង់ទុកឱ្យមានផ្លូវសម្រាប់ជនពិការចូលទៅកន្លែងសំណង់អគារ ដើម្បីពឹងពាក់ដោះស្រាយលើកង្វល់ផ្សេងៗ ៕
ចែករំលែកព័តមាននេះ