ខេត្តព្រះសីហនុ ៖ មកដល់ថ្ងៃទី២៣ ខែកុម្ភៈ សមត្ថកិច្ចនៅតែបន្តរុករកមនុស្សចំនួន២នាក់ ដែលបាត់ខ្លួនក្នុងចំណោម៧នាក់ ដែលកាលពីវេលាម៉ោងប្រមាណ៧ព្រឹកថ្ងៃទី២២ ខែកុម្ភៈ ពួកគេបានជួបឧបទ្ទវហេតុលិចទូកឈើមួយគ្រឿងដឹកដែក២តោន នៅចន្លោះកោះថាសនិងកោះរ៉ុងសន្លឹម…
ខេត្តព្រះសីហនុ ៖ មកដល់ថ្ងៃទី២៣ ខែកុម្ភៈ សមត្ថកិច្ចនៅតែបន្តរុករកមនុស្សចំនួន២នាក់ ដែលបាត់ខ្លួនក្នុងចំណោម៧នាក់ ដែលកាលពីវេលាម៉ោងប្រមាណ៧ព្រឹកថ្ងៃទី២២ ខែកុម្ភៈ ពួកគេបានជួបឧបទ្ទវហេតុលិចទូកឈើមួយគ្រឿងដឹកដែក២តោន នៅចន្លោះកោះថាសនិងកោះរ៉ុងសន្លឹម ស្ថិតក្នុងភូមិកោះរ៉ុងសន្លឹម សង្កាត់កោះរ៉ុងសន្លឹម ក្រុងកោះរ៉ុង ។ ក្រោយពីទទួលបានព័ត៌មានភ្លាមសមត្ថកិច្ចនិងអាជ្ញាធរចម្រុះរបស់ក្រុងកោះរ៉ុង ក៏ដូចជាក្រុមហ៊ុនឯកជនមួយចំនួន បានចូលរួមជួយសង្គ្រោះជនរងគ្រោះទាំង៧នាក់ ដែលមានក្រុមហ៊ុនជីធីវីស៊ី កម្លាំងគណ:កម្មាធិការជាតិសន្តិសុខលំហសមុទ្រនិងក្រុមហ៊ុនផាហ្គោលដាដោយសង្គ្រោះបាន៥នាក់ ឯ២នាក់ទៀតបាត់ខ្លួន ។
ជនរងគ្រោះ៥នាក់ដែលត្រូវបានសង្គ្រោះរួមមាន ៖
១-ឈ្មោះ ទន ភក្តី ភេទប្រុស អាយុ២៧ឆ្នាំ ជាជាងផ្សារដែក មានស្រុកកំណើតនៅភូមិជ្រោយឫស្សី ស្រុកស្អាង ខេត្តកណ្តាល ។
២-ឈ្មោះ ថា ភារិត ភេទប្រុស អាយុ២៣ឆ្នាំ ជាជាងផ្សារដែក មានស្រុកកំណើតនៅភូមិជ្រោយឫស្សី ស្រុកស្អាង ។
៣-ឈ្មោះ ខឹម ហូវ ភេទប្រុស អាយុ៣៦ឆ្នាំ ជាម្ចាស់ទូកឈើដឹកសម្ភារដែលលិច រស់នៅភូមិ៣ សង្កាត់លេខ៣ ក្រុងព្រះសីហនុ ។
៤-ឈ្មោះ សឹង រដ្ឋា ភេទប្រុស អាយុ២៧ឆ្នាំ ជាជាងផ្សារដែក មានស្រុកកំណើតនៅខេត្តកណ្តាល និង៥-ឈ្មោះ រ៉ា រ៉ាន់ ភេទប្រុស អាយុ១៨ឆ្នាំជាជាងផ្សារដែក មានស្រុកកំណើតនៅខេត្តកណ្តាល ។
ដោយឡែក ជនរងគ្រោះដែលបាត់ខ្លួនចំនួន២នាក់ ម្នាក់ឈ្មោះ ស៊ន ដំ ភេទប្រុស អាយុ១៦ឆ្នាំ ជាជាងផ្សារដែក មានស្រុកកំណើតនៅខេត្តកណ្តាល និងម្នាក់ទៀតឈ្មោះ អ៊ុន ម៉ៅ ភេទប្រុស អាយុ៣៨ឆ្នាំ ជាកូនដៃទូក រស់នៅ ភូមិ៣ សង្កាត់លេខ៣ ក្រុងព្រះសីហនុ ។ ក្នុងករណីលិចទូកនេះ ម្ចាស់ទូកបានបំភ្លឺថា បណ្តាលមកពីទូកខូចម៉ូទ័របូមទឹកពេលកំពុងបោះយុថ្កា ហើយមានទឹករលកហូរចូលក៏បណ្តាលឱ្យលិចតែម្តង ។
សមត្ថកិច្ចពាក់ព័ន្ធបានសហការជាមួយសមាគមទូក និងក្រុមហ៊ុនទូកដឹកភ្ញៀវទេសចរលើផ្ទៃសមុទ្រ ដើម្បីស្វែងរកជនរងគ្រោះដែលបាត់ខ្លួនទាំង២នាក់ជាបន្តទៀត ។ ក្នុងករណីជួយសង្គ្រោះនេះដែរ លោកឧកញ៉ា ទៀ វិចិត្រ បានឲ្យដឹងថា ករណីរុករកជនរងគ្រោះបាត់ខ្លួនចំនួន២នាក់នេះ លោកបានបញ្ជូនអូប័រល្បឿនលឿន របស់ក្រុមហ៊ុនជីធីវីស៊ីចំនួន៤គ្រឿងបន្ថែមទៀតដើម្បីរុករកជនរងគ្រោះនៅលើផ្ទៃសមុទ្រ ជាមួយការរំពឹងទុកថា ជនរងគ្រោះទាំង២នាក់អាចនៅមានជីវិតត្រឡប់មកផ្ទះវិញផងដែរ ៕
ចែករំលែកព័តមាននេះ