ខេត្តកំពង់ធំ ៖ យុវជន៤នាក់នាំគ្នាទៅកាប់ដើមឈើទាំងយប់ ដើម្បីយកមកធ្វើអុសលក់ ស្រាប់តែត្រូវដើមឈើបាក់សង្កត់លើ បណ្តាលឱ្យយុវជនម្នាក់បាត់បង់ជីវិត ។ ហេតុការណ៍ខាងលើនេះបានកើតឡើងកាលពីវេលាម៉ោង៩និង៣០នាទីយប់ថ្ងៃទី១៩ ខែកុម្ភៈ ឆ្នាំ២០២០…
ខេត្តកំពង់ធំ ៖ យុវជន៤នាក់នាំគ្នាទៅកាប់ដើមឈើទាំងយប់ ដើម្បីយកមកធ្វើអុសលក់ ស្រាប់តែត្រូវដើមឈើបាក់សង្កត់លើ បណ្តាលឱ្យយុវជនម្នាក់បាត់បង់ជីវិត ។
ហេតុការណ៍ខាងលើនេះបានកើតឡើងកាលពីវេលាម៉ោង៩និង៣០នាទីយប់ថ្ងៃទី១៩ ខែកុម្ភៈ ឆ្នាំ២០២០ ស្ថិតនៅចំណុចព្រៃហាមឃាត់ស្រឡៅស្រោង តំបន់ព្រៃអង់តែន ក្នុងភូមិត្រពាំងឫស្សី ឃុំក្រយា (ក្រយៀ) ស្រុកសន្ទុក ។
ជនរងគ្រោះម្នាក់ដែលបាត់បង់ជីវិតខាងលើឈ្មោះ គិន អ៊ុល ភេទប្រុស អាយុ២០ឆ្នាំ មុខរបរកសិករ រស់នៅភូមិឈើទាលជ្រុំ ឃុំក្រយា ស្រុកសន្ទុក ។ ចំណែកអ្នករួមដំណើរចំនួន៣នាក់ ក្នុងនោះ១-ឈ្មោះ សោម សារ ភេទប្រុស អាយុ៣៦ឆ្នាំ ២-ឈ្មោះ អៃ រ៉ា ភេទប្រុស អាយុ២៣ឆ្នាំ និង៣-ឈ្មោះ យ៉ា នីន ភេទប្រុស អាយុ១៩ឆ្នាំ ។ អ្នកទាំង៣រស់នៅភូមិឃុំជាមួយជនរងគ្រោះ ។
តាមការបំភ្លឺរបស់ឈ្មោះ ចាន់ គិន ភេទប្រុស អាយុ៥០ឆ្នាំ និងប្រពន្ធឈ្មោះ ឃឹម ហៀង ភេ អាយុ៥០ឆ្នាំ ត្រូវជាឪពុកម្ដាយបង្កើតរបស់ជនរងគ្រោះប្រាប់ឱ្យដឹងថា កាលពីរសៀលថ្ងៃទី១៨ ខែកុម្ភៈ កូនរបស់គាត់ និងមិត្តភក្តិបងប្អូនចំនួន៤នាក់ បានបើកគោយន្តកន្ត្រៃចំនួនពីរគ្រឿងឆ្ពោះទៅទីកន្លែងកើតហេតុខាងលើ ដើម្បីកាប់ដើមឈើយកមកធ្វើអុសលក់ គ្រាន់បានដោះស្រាយជីវភាព ស្រាប់តែដល់វេលាយប់ថ្ងៃទី១៩ ខែកុម្ភ: ពួកគាត់បានទទួលដំណឹងថា កូនរបស់គាត់បានបាត់បង់ជីវិតទៅហើយ ដោយសារត្រូវដើមឈើរលំសង្កត់ចំក្បាល ។ ពេលទទួលបានដំណឹងអកុសលនេះភ្លាមធ្វើឲ្យពួកគាត់ស្ទើតែគាំងបេះដូងទៅហើយ។
តាមប្រភពពីយុវជនទាំង៣នាក់ដែលជាអ្នករួមដំណើរទៅកាប់អុសជាមួយជនរងគ្រោះបានឱ្យដឹងថា កាលពីថ្ងៃទី១៨ កុម្ភៈ ពេលពួកគាត់ទៅដល់ចំនុចកើតហេតុខាងលើ ក៏បាននាំគ្នាដើរមើលដើមឈើទុកកាប់រួចជាស្រេច ពេលកាប់រួចក៏ដឹកយកមករក្សាទុកនៅក្នុងរោងរបស់ពួកគាត់នៅចំណុចស្រឡៅស្រោងក្បែរកន្លែងកើតហេតុ ។
តាមប្រភពដដែលបានបន្តថា រហូតដល់ពេលរសៀលថ្ងៃទី១៩ ខែកុម្ភៈ ពួកគាត់បានទៅដល់ តំបន់កើតហេតុខាងលើ និងនាំគ្នាដើរមើលគល់ឈើ ហើយបាននាំគ្នាកាត់ ដោយប្រើម៉ាស៊ីនត្រង់សឺន័រ ដើម្បីយកមកធ្វើអុស ។ លុះនៅពេលពួកគាត់កាត់ដើមចំបក់មួយដើមទាំងយប់ ដែលមានទំហំមុខកាត់៣០សង្ទីម៉ែត្រ ហើយមុននឹងកាត់ ពួកគាត់បានប្រាប់គ្នាថា នាំគ្នានៅជិតគល់ឈើទាំងអស់គ្នា កុំទៅណាឆ្ងាយ ដោយសារតែយប់ងងឹតផង ក៏នាំគ្នានៅចម្ងាយពីគល់ឈើនេះតែ៣ម៉ែត្រប៉ុណ្ណោះ ពេលនោះដើមឈើរលំទៅទិសខាងលិច ក៏បានបាក់មែកឈើដើមច្រម៉ាសប៉ុនកំភួនជើង ដោយបាក់មកជាមួយដើមចំបក់ធ្លាក់សង្កត់ចំក្បាលជនរងគ្រោះតែម្តង បណ្ដាលឲ្យបាត់បង់ជីវិតភ្លាមៗនៅកន្លែងកើតហេតុ ។ ភ្លាមៗនោះពួកគាត់ទាំងបីនាក់នាំគ្នាជួយសង្គ្រោះ និងបានទូរស័ព្ទប្រាប់ក្រុមគ្រួសារ ព្រមទាំងនាំគ្នាយកជនរងគ្រោះចេញពីទីកន្លែងកើតហេតុឆ្ពោះមកភូមិទាំងយប់ រួចរាយការណ៍ជូនសមត្ថកិច្ចឱ្យចុះមកពិនិត្យ។
បន្ទាប់ពីទទួលបានសេចក្តីរាយការណ៍ខាងលើភ្លាម កម្លាំងជំនាញបានចុះមកពិនិត្យជនរងគ្រោះរកឃើញមានស្នាមទ្រុឌនៅលើក្បាលមួយកន្លែងធ្ងន់ធ្ងរ ក្រៅពីនេះនៅលើដងខ្លួន ពុំមានស្លាកស្នាមអ្វីកត់សម្គាល់ឡើយ ហើយសមត្ថកិច្ចបានឱ្យដឹងថា ជនរងគ្រោះបាត់បង់ជីវិតដោយសារដើមឈើរលំសង្កត់ចំក្បាល ពុំមានជាប់ពាក់ព័ន្ធនឹងករណីអ្វីផ្សេងឡើយ ។ ក្រោយពីពិនិត្យរួច សមត្ថកិច្ចបានធ្វើកំណត់ហេតុ រួចប្រគល់ជនរងគ្រោះជូនក្រុមគ្រួសារដើម្បីយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ