រាជធានីភ្នំពេញ ៖ លោក ប៉ាវ ស៊ីណា ប្រធានសហភាពចលនាកម្មករកម្ពុជាបានអះអាងថា ការចរចាប្រាក់ឈ្នួលកម្មករអប្បរមា សម្រាប់ឆ្នាំ២០២១ នឹងពិបាកដោយសារសហភាពអឺរ៉ុប (EU) ដកEBA ពីកម្ពុជា ។
លោកប៉ាវ ស៊ីណា បានសរសេរលើបណ្តាញសង្គម នៅថ្ងៃទី១៩ កុម្ភៈយ៉ាងដូច្នេះថា៖«ការដក EBA នឹងចូលជាធរមាន នៅថ្ងៃទី១២ សីហា ២០២០ ស្របគ្នា និងរដូវកាលចរចាប្រាក់ឈ្នួលអប្បបរមា ។ លោកបន្តថាទោះបីសហភាពអឺរ៉ុបដកប្រព័ន្ធអនុគ្រោះពន្ធ (EBA) ត្រឹម២០ភាគរយពីកម្ពុជាក៏ដោយ តែប៉ះពាល់ដល់ផលប្រយោជន៍កម្មករខ្មែរទាំងអស់ ។
ការដក EBA ពីកម្ពុជានឹងចូលជាធរមាន នៅថ្ងៃទី១២ សីហា ២០២០ ខាងមុខនេះស្របគ្នា និងរដូវកាលចរចាប្រាក់ឈ្នួលអប្បបរមា ដូច្នេះឧបសគ្គនៃដំណើរការចរចាដំឡើងប្រាក់ឈ្នួលជូនកម្មករសម្រាប់ឆ្នាំ២០២១ និងកាន់តែពិបាកហើយការចរចាអនុសញ្ញារួម CBA នៅថ្នាក់រោងចក្ររិតតែពិបាកទៅទៀតមួយវិញទៀត តើរោងចក្រនិងមានការងារគ្រប់គ្រាន់សម្រាប់កម្មករធ្វើដែរឬទេ ? បញ្ហានេះ និងជះឥទ្ធិពលដល់ជីវៈភាពកម្មករ ។
កាលពីថ្ងៃទី១២ ខែកុម្ភៈ ឆ្នាំ២០២០កន្លងទៅ គណៈកម្មការអឺរ៉ុប បានសម្រេចដកប្រព័ន្ធអនុគ្រោះពន្ធ (EBA) លើមុខទំនិញនាំចេញរបស់កម្ពុជា ប្រមាណ២០% នៃមុខទំនិញនាំចេញទាំងអស់ ទៅកាន់ទីផ្សារអឺរ៉ុប ខណៈ ទំនិញ ៨០%ទៀត ត្រូវបានរួចពន្ធដដែល ។ សូមបញ្ជាក់ថា សម្រាប់ឆ្នាំ២០២០នេះ កម្មករទទួលបានប្រាក់ឈ្នួលអប្បបរមារ ចំនួន១៩០ដុល្លារ ៕
ចែករំលែកព័តមាននេះ