ប្រេងឆាមានសារប្រយោជន៍ច្រើនជួយដល់ស្ត្រីមេផ្ទះសម្រាប់ចម្អិនម្អូបអាហារចៀន ឆា ជាដើម ។ ការជ្រើសរើសប្រេងឆាមកចម្អិនម្ហូបអាហារមានលក្ខណៈប្រសើរបំផុត ព្រោះប្រេងឆាភាគច្រើនផ្សំពីរុក្ខជាតិផ្ទុយពីខ្លាញ់ដែលចម្រាញ់ ឬចំហៀវចេញពីខ្លាញ់សត្វជាប្រភពធ្វើឲ្យប៉ះពាល់ដល់សុខភាពយ៉ាងធ្ងន់ធ្ងរ ជាពិសេសអាចបណ្តាលឲ្យកើតមានជំងឺទឹកនោមផ្អែម លើសឈាម ដាច់សរសៃឈាមបេះដូង ។
ជួបជាមួយលោកសាស្ត្រាចារ្យមហា
បរិញ្ញាវេជ្ជបណ្ឌិត សេង សេរី ឯកទេសជំងឺទឹកនោមផ្អែមនៃមន្ទីពេទ្យព្រះកុសុមៈ បានប្រាប់កោះសន្តិភាពឲ្យដឹងថា ជាទូទៅយើងនិយាយពីប្រេងក្នុងអាហារគឺសំដៅទៅលើប្រេងដែលបានមកពីប្រភពធម្មជាតិដូចជាបន្លែ ផ្លែឈើ ឬគ្រាប់ធញ្ញជាតិផ្សេងៗ ។ ប្រេងទាំងអស់នេះបើគិតពីបញ្ហាសុខភាព គឺវាល្អប្រសើរជាងខ្លាញ់សត្វទាំងឡាយដូចជា ជ្រូក គោ ក្របី ចៀម ពពែ សេះ មាន់ ទា ក្ងាន សត្វស្លាប… ។ ដូច្នេះចំពោះមនុស្សទូទៅក៏ដូចជាអ្នកកើតជំងឺទឹកនោមផ្អែមការបរិភោគអាហារដែលចម្អិនដោយប្រេងឆាគឺមានលក្ខណៈល្អជាងការចម្អិនដោយខ្លាញ់
សត្វ ។ ប្រេងដែលបានមកពីប្រភពធម្មជាតិផ្ដល់គុណសម្បត្តិដល់សុខភាពមានលក្ខណៈខុសគ្នាទៅតាមប្រភេទរបស់វា ដូច្នេះស្ត្រីគ្រប់រូប ឬអ្នកកើតជំងឺទឹកនោមផ្អែមគប្បីចេះជ្រើសរើសប្រេងដែលមានគុណភាពមកប្រើប្រាស់ ។ ពិនិត្យស្លាកសញ្ញាដែលបិទជាប់នឹងដបដែលបង្ហាញនូវគុណភាពប្រេងទាំងនោះ ។
ខាងក្រោមនេះគឺជាប្រភេទប្រេងដែលមានគុណភាពតាមលំដាប់ងាយស្រួលលោកអ្នកជ្រើសរើសយកមកប្រើប្រាស់ដូចជា ៖
ប្រេងកាណូឡា ,ប្រេងសាហ្វហ្ហវ័រ ,ប្រេងបន្លែរុក្ខជាតិ,ប្រេងផ្កាឈូករ័ត្ន,ប្រេងផ្លែអូលីវ ,ប្រេងសណ្តែកសៀង,ប្រេងផ្លែពោត,ប្រេងសណ្តែកដី,ប្រេងផ្លែត្នោត,ប្រេងដូង ។
ការជ្រើសរើសប្រេងឆាដែលចម្រាញ់ចេញពីរុក្ខជាតិមកប្រើសម្រាប់ចម្អិនម្ហូបអាហារនឹងផ្ដល់ផលល្អដល់សុខភាព ៕
ចែករំលែកព័តមាននេះ