ខេត្តបន្ទាយមានជ័យ ៖ ពំនូកចំបើងដែលម្ចាស់ប្រមូលទិញរួចយកមកទុកក្នុងរោងមួយកន្លែងសម្រាប់ទុកបណ្តុះផ្សិត បានក្លាយទៅជាចំណីអគ្គីភ័យឆាបឆេះយ៉ាងសន្ធោសន្ធៅ ខណៈម្តាយរបស់ម្ចាស់រោងពំនូកចំបើងនោះបានប្រមូលចំបើងចាស់ៗដុតចោលហើយមិនបាននៅមើល ទើបបណ្តាលឱ្យភ្លើងរាលដាលដល់រោងដាក់ចំបើងនោះឆេះអស់ទាំងស្រុង ហើយទំហំនៃការខូចខាតបើគិតជាទឹកប្រាក់សរុបចំនួន២៥លានរៀល ។
ហេតុការណ៍ខាងលើនេះបង្កឲ្យមានការភ្ញាក់ផ្អើលកើតឡើងកាលពីវេលាម៉ោង៤រសៀលថ្ងៃទី១១ ខែកុម្ភៈ ឆ្នាំ២០២០ នៅភូមិព្រៃទទឹង ឃុំ ភ្នំតូច ស្រុកមង្គលបូរី ខេត្តបន្ទាយមានជ័យ ។
តាមប្រភពព័ត៌មានពីនគរបាលប៉ុស្តិ៍រដ្ឋបាល ឃុំភ្នំតូច បានឲ្យដឹងថា ម្ចាស់រោងដាក់ចំបើងកើតហេតុខាងលើឈ្មោះ ជា វុទ្ធី ភេទប្រុស អាយុ៤៥ឆ្នាំ នៅភូមិព្រៃទទឹង ឃុំភ្នំតូច ស្រុកមង្គលបូរី ខេត្តបន្ទាយមានជ័យ ។
តាមការរៀបរាប់ពីម្ចាស់រោងចំបើងកើតហេតុបាននិយាយថា ចំបើងទាំងនេះ គាត់បានប្រមូលទិញពីគេដោយចងជាដុំ ក្នុង១ដុំតម្លៃ៣ពាន់រៀល និងយកមកទុកក្នុងរោងដែលធ្វើអំពីឈើប្រក់ស័ង្កសី មានទំហំ១២ម៉ែត្រគុណនឹង២៥ម៉ែត្រ រង់ចាំទុកបណ្តុះផ្សិត ហើយចំបើងទាំងអស់មានចំនួន៨ពាន់ដុំ ។
តាមប្រភពដដែលបានបញ្ជាក់ថា នៅមុនពេលកើតហេតុ ម្តាយរបស់គាត់បានប្រមូលចំបើងចាស់ៗដុតចោល ហើយមិនបាននៅមើលនោះទេ បណ្តាលឲ្យភ្លើងឆេះរាលដាលដល់រោងដាក់ពំនូកចំបើងដែលគាត់ទើបទិញយកមកទុកបណ្តុះផ្សិតនោះ ដោយគ្មានអ្នកណាដឹងថាភ្លើងឆេះឡើយ លុះភ្លើងឆាបឆេះឡើងយ៉ាងសន្ធោសន្ធៅ ទើបបានដឹង ប៉ុន្តែហួសពេលទៅហើយ ព្រោះរោងដាក់ពំនូកចំបើងទាំងនោះត្រូវភ្លើងឆេះអស់ទាំងស្រុង បើគិតពីតម្លៃនៃការខូចខាតសរុបជាទឹកប្រាក់ចំនួន២៥លានរៀល ។ នៅក្នុងករណីអគ្គីភ័យខាងលើនេះ គឺមិនបង្កឲ្យមានការឆាបឆេះរាលដាលដល់កន្លែងផ្សេងនោះឡើយ៕ (កែសម្រួលដោយ ៖ ធីតា)
ចែករំលែកព័តមាននេះ