រាជធានីភ្នំពេញ ៖ យូរឆ្នាំមកហើយដែលលោកជួង ជី ហៅនាយកុយ តារាកំប្លែងល្បីល្បាញខកខានសម្តែងនៅក្រៅប្រទេសជូនបងប្អូននៅរស់នៅឆ្ងាយស្រុកបានសើចកម្សាន្ត បន្ទាប់ពីលោករកពេលមិនទាន់ឃើញ មមាញឹកក្នុងស្រុករហូតរំលងទៅរាប់ឆ្នាំ។ យ៉ាងណាពេលនេះ នាយកុយកំពុងតែមានវត្តមាននៅប្រទេសជប៉ុនសម្តែងជូនបងប្អូននៅទីនោះយ៉ាងរីករាយ ដោយលោកសម្រេចចិត្តទៅជប៉ុននាគ្រានេះ ក្នុងន័យស្វែងរកជំនួយជួយដល់ជនក្រីក្រ និងកុមារកំព្រា។
ដំណើរចាកចេញទៅសម្តែងនៅប្រទេសជប៉ុននាពេលនេះ របស់កំពូលតារាកំប្លែងនាយកុយ ត្រូវបានបងប្អូនរស់នៅប្រទេសជប៉ុន មានការរីករាយជាពន់ពេក ខណៈដែលនាយកុយដែលមានទីផ្សារសម្តែងច្រើននៅក្នុងស្រុក ស្រាប់តែបើកចិត្តយកប្រទេសជប៉ុនជាទីផ្សារថ្មីនៅក្រៅប្រទេសក្រោយអាក់ខានជាច្រើនឆ្នាំ។ នេះជាឱកាសមួយល្អប្រសើរបំផុត ដែលនាយកុយចេញទៅសម្តែងនៅប្រទេសជប៉ុន ក្នុងន័យធ្វើឲ្យបងប្អូនយើងបានរីករាយសើចសប្បាយ ខណៈដែលពួកគាត់នៅតែគាំទ្រ និងចង់ឃើញវត្តមានតារាកំប្លែងរូបនេះ មានឱកាសនៅក្បែរអ្នករស់នៅឆា្ងយស្រុកបានខ្លះ ក៏ដូចជាការសួរសុខទុក្ខផងដែរ។ នាយកុយបានសម្រេចចិត្តចេញទៅប្រទេសជប៉ុន មកពីគិតគូរឿងស្វែងរកជំនួយជួយដល់សង្គម ពិសេសការស្វែងរកថវិកា ក៏ដូចជាមូនិធិ ដើម្បីជួយដល់ជនទីទាល់ក្រ កុមារកំព្រា ក៏ដូចជាជនចាស់ជរាដែលលោកងាកមកគិតគូរស្វែងរកទឹកចិត្តមនុស្សធម៌ និងកិច្ចការសង្គមទាន់មានកម្លាំងកាយធ្វើកិច្ចការល្អៗបាន។
អ្នកនាងគ្រ តដែលជាសមាជិករួមក្រុមសម្តែងជាមួយនាយកុយបានឲ្យដឹងថា «ប្រធានក្រុមរបស់អ្នកស្រីលោកជួង ជី ហៅនាយកុយ បានចេញទៅសម្តែងនៅប្រទេសជប៉ុនតាំងពីថ្ងៃទី៦ សីហា មកម្ល៉េះ។ គាត់បានទៅសម្តែងជាមួយតារាកំប្លែងបាត់មុខយូរដែរ គឺអ្នកនាងម៉ាច ប្រិមប្រិយ ដោយចាកចេញទៅតែ២នាក់ប៉ុណ្ណោះ និងជាប់ភារៈកិច្ចសម្តែងនៅទីនោះរយៈ៣សប្តាហ៍ ឬ៤សប្តាហ៍ និងវិលមកវិញ»។ អ្នកនាងគ្រតបន្តឲ្យដឹងថា «បងកុយគាត់ទៅច្រៀងឲ្យបងប្អូននោះផង កំប្លែងផង ពិតជាសប្បាយ ព្រោះគាត់នៅតែមានប្រជាប្រិយភាពដូចដើម និងមានការនឹករលឹកពីបងប្អូននៅទីនោះគ្រប់គ្នា។ អ្វីដែលសំខាន់ទៀតនោះ បងកុយគាត់សប្បាយចិត្តដែលខានទៅសម្តែងនៅក្រៅប្រទេសយូរឆ្នាំដែរនោះ ទើបអាចរកចន្លោះបានសម្តែងនៅទីនោះ។ លើសពីនេះទៀត គាត់ចេញទៅធ្វើការជួយសង្គមតាមរយៈការសម្តែងស្វែងរកមូនិធីមនុស្សពីខ្មែរនៅជប៉ុន ដើម្បីបានជួយដលបងប្អូនក្នុងស្រុកជាអ្នកក្រីក្រដែលលោកមានទឹកចិត្តជួយក្នុងពេលដែលលោកអាចសម្តែងបាន ធ្វើបាន ទើបគាត់សម្រេចចិត្តទៅទីនោះតែម្តង»។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ