ខេត្តប៉ៃលិន ៖ រហូតមកដល់ព្រឹកថ្ងៃទី០៣ ខែកុម្ភ: ឆ្នាំ២០២០នេះ តម្លៃទីផ្សារម៉ាសធម្មតា សម្រាប់ពាក់ការពារធូលីដី និងការពារផ្តាសាយជាដើម មានការឡើងថ្លៃខ្ពស់ ហើយថែមទាំងលំបាករកទិញផងដែរ ។ បន្ទាប់ពីមានករណីផ្ទុះជំងឺឆ្លងដ៏កាចសាហាវ គឺវីរុសកូរ៉ូណា នៅប្រទេសចិន និងបានឆ្លងទៅប្រទេសនានាជាច្រើន ទើបធ្វើឱ្យប្រជាពលរដ្ឋខ្មែរម្នាក់ៗ សម្រុកទិញម៉ាសពាក់ស្ទើរគ្រប់ៗគ្នា ។
ប្រភពព័ត៌មានពីអាជីវករលក់ម៉ាសម្នាក់ឈ្មោះ សុភ័ណ្ឌ បានរៀបរាប់ឱ្យដឹងថា កាលពីមុនម៉ាសធម្មតាពាក់សម្រាប់ការពារធូលីដី និងការពារផ្តាសាយ ដែល១ដុំធំមានចំនួន៥០ម៉ាស តម្លៃត្រឹមតែ២៥០០រៀលទៅ៣០០០រៀលប៉ុណ្ណោះ ។ ប៉ុន្តែរហូតមកដល់ឥឡូវ ត្រូវបានឡើងថ្លៃរហូតដល់១ដុំ៨០០០ទៅ១០០០០រៀលឯណោះ ។ ដូច្នេះគាត់ក៏លំបាកយកមកដាក់លក់ឱ្យម៉ូយបន្តទៀតដែរ ហើយទោះបីជាលក់ថ្លៃប៉ុណ្ណោះ ឱ្យតែមានម៉ាសលក់ គឺគេទិញទាំងអស់ផងដែរ ។
គាត់បន្តទៀតថា កាលពីថ្ងៃទី២ ខែកុម្ភ: ឆ្នាំ២០២០ កន្លងទៅនេះ មានអ្នកដើររកទិញរាប់រយដុំ បើមានប៉ុន្មានគឺគេយកទាំងអស់ ដើម្បីយកទៅចែកជូនដល់សិស្សានុសិស្សនៅតាមសាលារៀន។ អ្នកខ្លះទៀតទិញយកទៅជូនកងទ័ពនៅតាមបន្ទាយ ដើម្បីពាក់ការពារឆ្លងវីរុសកូរ៉ូណា ដែលកំពុងតែរាតត្បាតនៅតាមប្រទេសផ្សេងៗ ក្នុងទ្វីបអាស៊ីយើងនេះ ។
ចំណែកនៅព្រឹកថ្ងៃទី៣ ខែកុម្ភៈនេះ មានម៉ូយជាច្រើនកំពុងតែសួររកទិញដែរ ប៉ុន្តែនៅតាម តូបក្នុងភូមិ និងនៅតាមផ្សារ ត្រូវបានអតិថិជនទិញយកអស់រលីងទៅហើយ ។ មានអ្នកខ្លះគេលើកឡើងថា ហេតុអ្វីក៏មិនលក់ដូចធម្មតា បែរជានាំគ្នាតម្លើងយកចំណេញពេលមានសភាពការមិនស្រួលកើតឡើងទៅវិញ គួរតែបញ្ចុះតម្លៃថែមទៀត ដើម្បីជួយសង្គ្រោះដល់ប្រជាពលរដ្ឋយើង ដែលកំពុងតែត្រូវការម៉ាសពាក់ដើម្បីការពារជំងឺឆ្លង ។
រីឯអ្នកខ្លះទៀតលើកឡើងថា ការលក់ដូរម៉ាសថ្លៃ គឺពេលដែលគេត្រូវការចាំបាច់ ដូច្នេះជាឱ កាសដល់ឈ្មួញ ដែលប្រកបរបររកស៊ីលក់ម៉ាសនេះ ព្រោះទិញមកថោកៗ លុះពេលលក់ទៅវិញក្នុងតម្លៃខ្ពស់អាចនឹងចំណេញច្រើន ។ ម្យ៉ាងវិញទៀត បើអតិថិជនខ្លះមិនចង់ទិញ ក៏គេមិនខ្វល់ដែរ គឺគេទុកលក់ឱ្យអ្នកផ្សេងដែលកំពុងតែត្រូវការវាចាំបាច់ ដើម្បីយកទៅប្រើប្រាស់ ។
ចំណែកប្រជាពលរដ្ឋ បានលើកឡើងថា ពេលនេះជាឱកាសម្នាក់ៗត្រូវការត្រៀមពាក់ម៉ាស ហើយទិញយកទៅទុកពាក់ បើអាជីវករលក់ដូរក្នុងតម្លៃខ្ពស់ ក៏លក់ទៅចុះ ប៉ុន្តែកុំឱ្យកប់ក្តោងពេក ព្រោះម៉ាស១ដុំធំ ចំនួន៥០ម៉ាស គេលក់ត្រឹមតែ២០០០ទៅ៣០០០រៀលប៉ុណ្ណោះ លុះពេលពលរដ្ឋ ខ្លួនឯងត្រូវការចាំបាច់ បែរជានាំគ្នាច្របាច់.កទៅវិញ ហើយម្នាក់ៗលក់រហូតដល់១ដុំចាប់ពី១០០០០រៀលទៅ២០០០០រៀលទៅវិញ ៕ (កែសម្រួលដោយ ៖ បុប្ផា)
ចែករំលែកព័តមាននេះ