ខេត្តសៀមរាប ៖ បើតាមការអះអាងពីលោកឧត្តមសេនីយ៍ត្រី ជា គឹមសាន្ត ស្នងការរង ទទួលផែនការងារការិយាល័យអន្តោប្រវេសន៍ បានប្រាប់នៅម៉ោង៤រសៀលថ្ងៃទី៣០ ខែមករា ឆ្នាំ២០២០នេះថា បន្ទាប់ពីមានពលរដ្ឋរាយការណ៍មកកម្លាំងនគរបាលមូលដ្ឋាននៅម៉ោងប្រមាណ៣ទៀបភ្លឺឈានចូលថ្ងៃទី២៩ ខែមករាថា មានករណីភ្ញៀវជនជាតិអាមេរិក ប្រុសម្នាក់ បានវាយទូរ ATM ធនាគារកាថេ ស្ថិតនៅផ្សារកណ្តាល ភូមិមណ្ឌល១ សង្កាត់ស្វាយដង្គំ ក្រុង/ខេត្តសៀមរាប បណ្តាលឱ្យខូចខាតចំនួន១ទូ (វាយដោយដៃ) ទើបកម្លាំងជំនាញយើងចុះទៅដល់ ហើយធ្វើការឃាត់ខ្លួនបញ្ជូនមកកាន់ការិយាល័យអន្តោប្រវេសន៍នៃស្នងការដ្ឋាននគរបាលខេត្តទាំងយប់ភ្លាមៗផងដែរ ដើម្បីសួរនាំ។
លោកបញ្ជាក់ថា ជនបរទេសរូបនេះមានឈ្មោះ Andres Pino ភេទប្រុស អាយុ៣០ឆ្នាំ ជាជនជាតិអាមេរិក ចូលមកលេងខេត្តសៀមរាប ជាភ្ញៀវទេសចរណ៍។
លោកបញ្ជាក់ទៀតថា ចំពោះមូលហេតុជនបរទេសរូបនេះវាយកម្ទេចទូរ ATM គឺបណ្តាលមកពីរូបគាត់ស្រវឹងស្រា ហើយបានទៅដកលុយនៅ ATM ធនាគារកាថេ ខណៈពេលនោះដែលជនបរទេសរូបនេះដាក់កាតចូល ដើម្បីដកលុយ ប៉ុន្តែចុចលេខកូដសម្ងាត់ខុស ស្រាប់តែម៉ាស៊ីនលេបកាតបាត់ ហើយដកលុយអត់បានផងនោះក៏ខឹង ស្រាប់តែយកដៃវាយទូ ATM ធនាគារកាថេបែកតែម្តង។
លោកបានបញ្ជាក់ទៀតថា ក្រោយសួរនាំរួច ជនបរទេសរូបនេះបានដឹងកំហុស ហើយព្រមសងថ្លៃខូចខាត ។ ក្រោយមកកម្លាំងជំនាញក៏បានឱ្យជនបរទេសរូបនេះធ្វើកិច្ចសន្យា បញ្ឈប់សកម្មភាពនេះតទៅទៀត រួចឱ្យត្រឡប់ទៅវិញទាំងយប់តែម្តង៕ (កែសម្រួលដោយ ៖ បុប្ផា)
ចែករំលែកព័តមាននេះ