ខេត្តកំពង់ចាម ៖ សិស្សានុសិស្សដែលរៀននៅតាមសាលាបឋមសិក្សា និងវិទ្យាល័យនានា ក្នុងបណ្ដាស្រុកក្រុងចំនួន១០នៅខេត្តកំពង់ចាមបាននាំគ្នាពាក់ម៉ាស់ ដើម្បីការពារកុំឲ្យឆ្លងជំងឺរលាកសួតប្រភេទថ្មី (កូរ៉ូណាវីរុស) ។ ជាមួយនោះស្ថាប័នជំនាញសុខាភិបាលខេត្តកំពុងតែយកចិត្តទុកដាក់ខ្លាំងលើបញ្ហានេះសំដៅធានាសុវត្ថិភាពធ្វើយ៉ាងណាកុំអោយឆ្លងជំងឺ។ ខណៈក្រសួងសុខាភិបាលបានរកឃើញអ្នកផ្ទុកវីរុសកូរ៉ូណាលើជនជាតិចិនម្នាក់នៅខេត្តព្រះសីហនុ ដោយតម្រូវឲ្យបង្កើនការប្រុងប្រយ័ត្នចៀសវាងកុំឲ្យមានឆ្លងទៅតំបន់ផ្សេងទៀត។
លោកសៀង សំណាង នាយកសាលាបឋម-អនុវិទ្យាល័យទួលថ្ម ក្រុងកំពង់ចាមប្រាប់ឲ្យដឹងនៅព្រឹកថ្ងៃទី២៩ មករា ឆ្នាំ២០២០ ថា បន្ទាប់ពីទទួលបានលិខិតណែនាំរបស់ក្រសួងអប់រំយុវជននិងកីឡាក៏ដូចជាប្រធានមន្ទីរអប់រំខេត្ត រាល់ពេលព្រឹកម៉ោងគោរពទង់ជាតិរូបលោកបានផ្សព្វផ្សាយតាមមីក្រូប្រាប់ទៅដល់សិស្សានុសិស្សគ្រប់រូបត្រូវនាំគ្នាចេះអនាម័យជាប្រចាំនិងពាក់ម៉ាស់ ដើម្បីការពារកុំអោយឆ្លងជំងឺកូរ៉ូណា។
លោកនាយកសាលាបឋម-អនុវិទ្យាល័យទួលថ្មប្រាប់បន្តថា ប្រសិនបើសិស្សទៅលេងនៅទីសាធារណៈអង្គុយនៅលើបង់មិនត្រូវយកដៃពាល់បង់នោះ ដោយបង្ការខ្លាចអ្នកដែលខ្វះអនាម័យពេលដែលកណ្ដាស់ ឬហៀរសំបោរយកមកជូតបង់អង្គុយលេងនោះ។ ពេលដើរក្នុងចំណោមមនុស្សច្រើនត្រូវពាក់ម៉ាស់ ដើម្បីការពារចៀសវាងកុំឲ្យឆ្លងជំងឺរលាកសួតប្រភេទថ្មី ម្យ៉ាងទៀតប្រសិនបើយើងមានការប្រាស្រ័យទាក់ទងជាមួយនឹងជនជាតិចិនណាម្នាក់ដែលមានប្រភពមិនច្បាស់លាស់ ក៏ត្រូវប្រយ័ត្នត្រូវតែពាក់ម៉ាស់ជានិច្ចពេលដែលនិយាយស្ដីឬក៏សន្ទនាគ្នាទៅវិញទៅមក។
រហូតមកដល់ព្រឹកថ្ងៃទី២៩ មករា២០២០ មិនទាន់មានសិស្សណាម្នាក់មានជំងឺផ្ដាសសាយដែលមានលក្ខណៈគួរឲ្យសង្ស័យទៅនឹងជំងឺកូរ៉ូណានោះឡើយ ។ ទោះជាបែបនេះក្តី រូបលោកក៏បានបញ្ជូនសារតាមទូរស័ព្ទចូលទៅក្នុងគ្រុប ដើម្បីឱ្យលោកគ្រូ អ្នកគ្រូ បង្រៀននៅបឋមនិងអនុវិទ្យាល័យទួលថ្មត្រូវបង្កើនការយកចិត្តទុកដាក់ ធ្វើយ៉ាងណាជំរុញឲ្យសិស្សលាងដៃនឹងសាប៊ូ បន្ទាប់ពីចាប់កាន់សៀវភៅឬក៏ប៉ះពាល់អ្វីមួយ ពោលគឺលាងដៃអោយបានស្អាតមុននឹងហូបនំចំណី។
សូមបញ្ជាក់ថា បន្ទាប់ពីទទួលបានការណែនាំនិងអប់រំជាញឹកញាប់សិស្សគ្រប់រូបទោះជាដើរឬអង្គុយរៀននៅក្នុងបន្ទប់ថ្នាក់បាននាំគ្នាពាក់ម៉ាស់ដែរ ។
ដោយឡែកឪពុកម្ដាយរបស់សិស្សដែលដឹកកូនតាមមធ្យោបាយម៉ូតូឬរថយន្តមកសាលាបានជំរុញឱ្យកូនៗចេះបង្ការការពារស្ទើរតែ១០០ភាគរយនាំគ្នាពាក់ម៉ាស់ព្រោះតែខ្លាចឆ្លងជំងឺប្រភេទថ្មីនេះ។
លោកវេជ្ជបណ្ឌិតគីម សួរភិរុណ ប្រធានមន្ទីរសុខាភិបាលខេត្តកំពង់ចាម មានប្រសាសន៍ឲ្យដឹងថា បន្ទាប់ពីទទួលបានសេចក្តីណែនាំពីលោកវេជ្ជបណ្ឌិតម៉ម ប៊ុនហេង រដ្ឋមន្ត្រីក្រសួងសុខាភិបាលរួចមក រូបលោកបានរៀបចំផែនការដល់មន្ត្រីក្រោមឱវាទត្រូវយកចិត្តទុកដាក់ផ្សព្វផ្សាយ ក្នុងនោះមានដូចជាសារអប់រំប្រជាពលរដ្ឋឲ្យមានការយល់ដឹង និងការពារកុំអោយឆ្លងជំងឺរលាកសួតប្រភេទថ្មី(កូរ៉េណាវីរុស) ។ រហូតមកដល់ពេលនេះនៅក្នុងខេត្តកំពង់ចាមមិនទាន់រកឃើញប្រជាពលរដ្ឋណាម្នាក់ដែលបានឆ្លងជំងឺនេះនៅឡើយទេ៕
(កែសម្រួលដោយ ៖ ធីតា)
ចែករំលែកព័តមាននេះ