រថយន្ត Bentley Flying Spur ស៊េរីថ្មីឆ្នាំ ២០២០ បានបង្ហាញខ្លួនកាលពីឆ្នាំមុន ដោយបានកំណត់ស្តង់ដារថ្មីសម្រាប់រថយន្តប្រណិតធំៗ។ ខណៈពេលដែលវាមើលទៅខាងក្រៅស្រដៀងទៅនឹងរថយន្តមុនៗ តែនៅខាងក្នុងរថយន្តគឺមានភាពទូលាយ និង ប្រណិតជាមុន។
វាមានម៉ាស៊ីន twin-turbo 6.0-liter W12 ដែលផ្តល់នូវកម្លាំង ៦២៦សេះ និង កម្លាំងបង្វិលកង់ ៦៦៤ផោន-ហ្វីត។ គេអាចជាន់ពី០ទៅ១០០ ដោយចំណាយពេលត្រឹមតែ ៣.៧វិនាទីប៉ុណ្ណោះ។ ល្បឿនជាអតិបរមានរបស់វា គឺដល់ទៅ ៣៣៣គម/ម៉។ តែអ្វីដែលសំខាន់គឺ ផ្នែកខាងក្នុងដ៏ប្រណិតរបស់វា។ តាមពាក្យរបស់ក្រុមហ៊ុនផ្ទាល់ ផ្នែកខាងក្នុងរបស់ Flying Spur ២០២០ គឺមានការច្នៃម៉ូដយ៉ាងពិសេស និង មានភាពស៊ាំញ៉ាំនឹកស្មានមិនដល់ ក្នុងប្រវត្តិសាស្ត្រ Bentley។
ដើម្បីធ្វើឱ្យបាននូវផ្នែកខាងក្នុងរបស់ Flying Spur បំណែកស្បែកផ្សេងៗគ្នា ចំនួន ៣៥០ផ្ទាំង ត្រូវបានផ្សំគ្នានៅលើតួខាងក្នុង ជាមួយនឹងថ្នេរដេរ ដោយប្រើសសៃអំបោះសរុបប្រវែង១.៨ម៉ាយ ដែលត្រូវប្រើកម្លាំងជាងជំនាញ១៤១នាក់ របស់ Bentley ផ្ទាល់។ គេត្រូវទាមទារឱ្យមានការហ្វឹកហាត់យ៉ាងតិច៥ខែ ទម្រាំតែអាចឱ្យជាងជំនាញទាំងនោះមកចូលរួមក្នុងការងារបាន និង ធានាការងារឱ្យមានគុណភាព។
ផ្ទាំងស្បែកដែលប្រើប្រាស់នៅផ្នែកខាងក្នុងរបស់រថយន្ត Bentley ម៉ូដែលឆ្នាំថ្មីថ្មីនេះ គឺយកមកពីស្បែកគោនៅអឺរ៉ុបខាងជើង។ អតិថិជនអាចជ្រើសរើសពណ៌ស្បែកខាងក្នុងចំនួន ១៤ពណ៌ ជាមួយនឹងពណ៌ថ្នេរចំនួន២៣។ គេហៅវាថាការងារស្បែកយ៉ាងប្រណិតបំផុតក្នុងឧស្សាហកម្មរថយន្ត។
ជាមួយនឹងភាពប៉ិនប្រសប់ខ្ពស់នៃសិល្បៈហត្ថកម្មដ៏អស្ចារ្យ និងការយកចិត្តទុកដាក់យ៉ាងល្អិតល្អន់ វាមិនមានអ្វីដែលឆ្ងល់នោះទេ ដែល Bentley Flying Spur ឆ្នាំ២០២០ មានតម្លៃចាប់ពី ២១៤៦០០ ដុល្លារអាមេរិក៕
ចែករំលែកព័តមាននេះ