រាជធានីភ្នំពេញ ៖ ស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជា ប្រចាំការិយាល័យអង្គការសហប្រជាជាតិ(អ.ស.ប)នៅទីក្រុងហ្សឺណែវប្រទេសស្វ៊ីស បានច្រានចោលចំពោះការផ្សាយព័ត៌មានរបស់អ្នករាយការណ៍ពិសេសរបស់អ.ស.ប ពាក់ព័ន្ធនឹងសំណុំរឿងលោក កឹម សុខាថាក្រោមហេតុផលនយោបាយ ។ យោងតាមសេចក្តីប្រកាសព័ត៌មានរបស់ស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជា…
រាជធានីភ្នំពេញ ៖ ស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជា ប្រចាំការិយាល័យអង្គការសហប្រជាជាតិ(អ.ស.ប)នៅទីក្រុងហ្សឺណែវប្រទេសស្វ៊ីស បានច្រានចោលចំពោះការផ្សាយព័ត៌មានរបស់អ្នករាយការណ៍ពិសេសរបស់អ.ស.ប ពាក់ព័ន្ធនឹងសំណុំរឿងលោក កឹម សុខាថាក្រោមហេតុផលនយោបាយ ។
យោងតាមសេចក្តីប្រកាសព័ត៌មានរបស់ស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជា ប្រចាំការិយាល័យ អ.ស.ប នៅទីក្រុងហ្សឺណែវបានច្រានចោលការចេញផ្សាយព័ត៌មានរបស់អ្នករាយការណ៍ពិសេសចំនួន៣រូប កាលពីថ្ងៃទី១៧ ខែមករា ឆ្នាំ២០២០ ក្រោមហេតុផលនយោបាយ និងមានបំណងបំភ័ន្តសាធារណជនអំពីដំណើរការសវនាការលើជនជាប់ចោទ លោក កឹម សុខា។
ប្រភពបន្តថា ដូចពេលកន្លងមកដែរ ស្ថានបេសកកម្មអចិន្ត្រៃយ៍កម្ពុជា សូមសម្តែងនូវការសោកស្តាយជាពន់ពេក ចំពោះការប្រព្រឹត្តមិនស្របតាមវិជ្ជាជីវៈរបស់អ្នកជំនាញខាងលើ ដែលមិនមែនជាមន្ត្រី អ.ស.ប និងគ្រាន់តែបំពេញការងារក្នុងឋានៈផ្ទាល់ខ្លួន ប៉ុន្តែតាំងខ្លួនជាចៅក្រមនៅក្នុងកិច្ចការតុលាការនិងផ្ទៃក្នុងរបស់រដ្ឋអធិបតេយ្យមួយ ។ ស្ថានបេសកកម្មអចិន្ត្រៃយ៍កម្ពុជា សូមរំឭកអ្នកជំនាញទាំងនោះថា នៅប្រទេសកម្ពុជា ក៏ដូចសង្គមប្រជាធិបតេយ្យដទៃទៀត បុគ្គលបំពានច្បាប់ត្រូវរងការចោទប្រកាន់និងកាត់ទោសដោយឈរលើមូលដ្ឋាននៃបទល្មើសដែលបានប្រព្រឹត្ត និងមិនផ្អែកលើឋានៈ នយោបាយឡើយ ។
ឋានៈជាអ្នកនយោបាយ មិនថាស្ថិតនៅក្រោមស្លាកបក្សប្រឆាំងឬអត់ ពុំបានផ្តល់សិទ្ធិឱ្យបុគ្គលនោះធ្វើសកម្មភាពដោយនិទណ្ឌភាពទេ ។ ហេតុផលបុគ្គល ឬនយោបាយ មិនអាចប្រើប្រាស់ជាទឡ្ហីករណ៍សម្រាប់ការប្រព្រឹត្តបទល្មើសឡើយ ។ សេចក្តីប្រកាសព័ត៎មានបានលើកឡើងទៀតថា បទចោទលើលោក កឹម សុខា មានចែងយ៉ាងច្បាស់នៅក្នុងក្រមព្រហ្មទណ្ឌរបស់កម្ពុជា (មាត្រា៤៥១ និង៤៥៣) ហើយវិធានការច្បាប់ចំពោះគាត់នាពេលកន្លងមក បានត្រូវអនុវត្តស្របតាមច្បាប់ពាក់ព័ន្ធរបស់ប្រទេសរួមទាំងរដ្ឋធម្មនុញ្ញ ។
ប្រភពបានគូសបញ្ជាក់ថា៖ «ការនិយាយយោងរបស់អ្នករាយការណ៍ពិសេសទៅនឹងទស្សនៈរបស់«ក្រុមការងារស្តីពីការឃុំខ្លួនតាមអំព ចិត្ត» (ហៅកាត់ថា«ក្រុមការងារ») ដែលជាបណ្តុំបុគ្គល៥រូបរួមគ្នា មិនត្រឹមតែពុំមានសំអាងត្រឹមត្រូវ ហើយថែមទាំងបង្កឲ្យមានការភ័ន្តច្រឡំទៀត ។ បុគ្គលទាំង៥រូប ពុំមែនជាមន្ត្រី អ.ស.បគ្រាន់តែបំពេញការងារក្នុងឋានៈផ្ទាល់ខ្លួន ដែលពុំមានការយល់ដឹងជាក់ស្តែងស្តីពីស្ថានភាពច្បាប់និងនយោបាយរបស់ប្រទេសកម្ពុជា» ។
ស្ថានបេសកកម្មបានលើកឡើងទៀតថាទស្សនៈឬសេចក្តីសន្និដ្ឋានរបស់«ក្រុមការងារ» នេះ ពុំមានទម្ងន់អ្វីទាល់តែសោះ រាប់ទាំងទម្ងន់ផ្លូវច្បាប់មកលើរដ្ឋអធិបតេយ្យមួយ ហើយស្ថានបេសកកម្មអចិន្ត្រៃយ៍ សូមបដិសេធចំពោះសេចក្តីសន្និដ្ឋានរបស់«ក្រុមការងារ»នេះ ដែលពុំបានគោរពតាមរបបធ្វើការងារត្រឹមត្រូវ
ការចោទប្រកាន់ថា លោក កឹម សុខា ត្រូវបានឃុំខ្លួនហួសរយៈពេលកំណត់ដោយច្បាប់ គឺជាការបំផ្លើស និងបង្ហាញយ៉ាងច្បាស់អំពីការយល់ដឹងនៅមានកម្រិត ឬពុំមានឆន្ទៈចង់យល់អំពីនីតិវិធីតុលាការរបស់ប្រទេសកម្ពុជា ពីសំណាក់អ្នកជំនាញទាំងនោះ ។ ការពិតគឺថា លោក កឹម សុខា បានត្រូវដោះលែងកាលពីថ្ងៃទី៩ ខែកញ្ញា ឆ្នាំ២០១៨ ក្រោមការត្រួតពិនិត្យផ្លូវតុលាការ ដោយមានលក្ខខណ្ឌជាក់លាក់ ។ នេះមានន័យថា គាត់ពុំស្ថិតក្រោមរបបនៃការឃុំខ្លួនមុនសវនាការ ដែលមានរយៈពេលអតិបរមា១៨ខែនោះឡើយ ។ លោក កឹម សុខា ពុំស្ថិតក្នុងការឃុំឃាំងក្នុងផ្ទះទេ ។
ជាមួយគ្នានេះ ស្ថានបេសកកម្មអចិន្ត្រៃយ៍ សូមរំឭកអ្នកជំនាញឲ្យប្រើប្រាស់វាក្យស័ព្ទច្បាប់ឱ្យបានត្រឹមត្រូវនៅក្នុងសេចក្តីថ្លែងការណ៍របស់ខ្លួន ប្រសិនបើពុំមានបំណងធ្វើឱ្យសាធារណជនយល់ខុសនិងភ័ន្តច្រឡំ ។ ដោយស្ថិតនៅជាជនជាប់ចោទនៅឡើយ លោក កឹម សុខា ពុំអាចធ្វើដំណើរចាកចេញពីព្រំដែនកម្ពុជា ហើយមិនត្រូវចូលរួមក្នុងសកម្មភាពនយោបាយណាមួយទេ ។
ប្រភពបានលើកឡើងទៀតថា ការចោទប្រកាន់របស់អ្នករាយការណ៍ពិសេសខាងលើ អំពីកង្វះការចូលរួមជាសាធារណៈនៅក្នុងបន្ទប់សវនាការបង្ហាញយ៉ាងច្បាស់ថា ការវាយតម្លៃរបស់អ្នកជំនាញទាំងនោះអំពីកម្ពុជាបានផ្អែកលើតែប្រភពព័ត៌មានពុំបានផ្ទៀងផ្ទាត់ និងមិនអាចទុកចិត្តបាន ។ នៅគ្រប់ប្រទេសប្រជាធិបតេយ្យទាំងអស់ ការសម្រេចឲ្យចូលទៅក្នុងបន្ទប់សវនាការ តែងតែជាឆន្ទានុសិទ្ធិរបស់តុលាការ ដោយពិចារណាលើទំហំជាក់ស្តែងនៃបន្ទប់សវនាការសណ្តាប់ធ្នាប់ និងការប្រព្រឹត្តទៅនៃការជំនុំជម្រះ។ មានតំណាងអង្គទូតជាច្រើនចូលរួម ហើយពុំមានកៅអីនៅសល់ទំនេរទុកចោលទេ ។
ស្ថានបេសកកម្មអចិន្ត្រៃយ៍យល់ថា ការលើកឡើងរបស់អ្នករាយការណ៍ពិសេសថាកង្វះខាតការចូលរួមជាសាធារណៈនៅក្នុងបន្ទប់ សវនាការមានន័យស្មើនឹងកង្វះយុត្តិធម៌ គឺជាការចំអកលើបទដ្ឋាននៃវិជ្ជាជីវៈច្បាប់ និងតុលាការទាំងស្រុង ។ ជាចុងក្រោយ ស្ថានបេសកកម្មអចិន្ត្រៃយ៍ទទូចដល់អ្នករាយការណ៍ពិសេសទាំងអស់ គោរពឱ្យបានខ្ជាប់ខ្ជួននូវ«ក្រមប្រតិបត្តិសម្រាប់តំណាងអាណត្តិ នៃនីតិវិធីពិសេសរបស់ក្រុមប្រឹក្សាសិទ្ធិមនុស្ស» នៅពេលបំពេញមុខងាររបស់ខ្លួន រួមទាំងការចេញសេចក្តីថ្លែងការណ៍សាធារណៈ ដែលអាចត្រូវបកស្រាយថា ជាការជ្រៀតជ្រែកក្នុងប្រព័ន្ធយុត្តិធម៌កម្ពុជា ។
សូមជម្រាបថា កាលពីថ្ងៃ១៧ ខែមករា ឆ្នាំ២០២០ អ្នករាយការណ៍ពិសេសរបស់ អ.ស.បទទួលបន្ទុកសិទ្ធិមនុស្សនៅកម្ពុជា លោកស្រី រ៉ូណា ស្មីត បានលើកឡើងថា ការជំនុំជម្រះលោក កឹម សុខា នាំឲ្យសៅហ្មង !
ខ្លឹមសារដែលផ្សាយជាសាធារណៈលោកស្រីបានបញ្ជាក់ថា ៖ «ថ្ងៃនេះ ខ្ញុំចូលរួមជាមួយអ្នកជំនាញឯករាជ្យរបស់ អ.ស.ប ២រូបទៀតក្នុងការអំពាវនាវឲ្យអាជ្ញាធរកម្ពុជា ធានានូវយុត្តិធម៌សម្រាប់លោក កឹម សុខា ដែលការកាត់ទោស ពីបទក្បត់ជាតិរបស់លោក បានចាប់ផ្តើមនៅទីក្រុងភ្នំពេញនៅសប្តាហ៍នេះ ។ យើងសូមអំពាវនាវម្តងទៀតឱ្យដកចេញជាបន្ទាន់នូវលក្ខខណ្ឌធានានៅក្រៅឃុំដែលមានការរឹតត្បិត ផ្តល់សិទ្ធិនយោបាយរបស់លោកឡើងវិញ និងធានាសិទ្ធិ របស់លោកក្នុងការទទួលបានសំណង និងជួសជុលការខូចខាតផ្សេងទៀត» ។
លោក កឹម សុខា ៖ មេដឹកនាំកម្ពុជារដ្ឋបុរសនិងមានបទពិសោធន៍គ្រប់គ្រាន់ក្នុងការផ្សះផ្សាជាតិ
លោក កឹម សុខា អតីតប្រធានគណបក្សសង្គ្រោះជាតិ បានបញ្ជាក់ថា មេដឹកនាំកម្ពុជាជារដ្ឋបុរស និងមានបទពិសោធន៍គ្រាប់គ្រាន់ក្នុងការផ្សះផ្សាជាតិ ។ នេះបើតាមមនុស្សជំនិតរបស់លោក គឺលោក មុត ចន្ថា បានស្រង់សម្តីលោកមកផ្សាយជាសាធារណៈ ។ លោក មុត ចន្ថា បានស្រង់សម្តីលោកកឹម សុខា សរសេរលើបណ្តាញសង្គមយ៉ាងដូច្នេះ៖
ទស្សនៈរបស់លោកប្រធាន កឹម សុខា យុត្តិធម៌ និងការផ្សះផ្សាជាតិ! «អយុត្តិធម៌ នាំមកនូវការបែកបាក់ជាតិ ការផ្សះផ្សា នាំមកនូវអធិបតេយ្យភាពជាតិ!» ។លោក កឹម សុខា មានប្រសាសន៍ថា៖ «យើងជាខ្មែរដែលបានឆ្លងកាត់សោកនាដកម្មជាច្រើនណាស់មកហើយ សុទ្ធតែយល់ដូចគ្នាថា «ភាពអយុត្តិធម៌នាំមកនូវការបែកបាក់ជាតិ» ដែលនាំឲ្យប៉ះពាល់ដល់ឯកភាពជាតិ អធិបតេយ្យភាព បូរណភាពទឹកដី សន្តិភាព ជាពិសេស កិត្យានុភាពជាតិ» ។ លោកបន្តទៀតថា «ក៏ប៉ុន្តែ បើសិនជាយើង ត្រឹមតែមានការយល់ដូចគ្នាដូចខាងលើប៉ុណ្ណឹង មិនទាន់គ្រប់គ្រាន់ទេ ដោយលោកបង្ហាញពីការយល់ឃើញថា ជាមេដឹកនាំជារដ្ឋបុរស ជាអ្នកនយោបាយដែលអាចផ្សះផ្សាជាតិបានជោគជ័យ គឺជាកិត្តិយសណាស់សម្រាប់ខ្លួនឯង និងក្លាយជាវិរបុរសជាតិផង និងនាំប្រទេសជាតិឲ្យគេគោរពស្ញប់ស្ញែងផង» ។
លោកបន្ថែមថា៖ «អ្នកដឹងហើយថា មានការលំបាកក្នុងការផ្សះផ្សាជាតិ ពីព្រោះមនុស្សមានទស្សនៈ
មតិ ឥរិយាបថ អាកប្បកិរិយា ពាក្យសម្តី និងវោហារសាស្ត្រ មិនដូចគ្នាទេ» ។ប៉ុន្តែលោក កឹម សុខា បានសង្កត់ធ្ងន់ពីគោលការណ៍ថា «បើអ្នកប្រកាន់យកនូវគោលការណ៍អហិង្សា គោរពសេចក្តីថ្លៃថ្នូរ មិនជេរប្រមាថ មិនចោទប្រកាន់មួលបង្កាច់គ្នាដោយអយុត្តិធម៌ មិនបង្កើតឲ្យមានការឈឺចាប់ នោះអ្នកពិតជាអាច
អង្គុយនិយាយជាមួយគ្នាបាន នោះហើយទើប នាំមកនូវជោគជ័យនៃការផ្សះផ្សាជាតិ ឯកភាពជាតិ ដែលយើងគ្រប់គ្នាប្រាថ្នាចង់បាននោះ ។ លោក កឹម សុខា នៅតែមានជំនឿថា «ខ្មែរមានពិសោធន៍គ្រប់គ្រាន់ក្នុងការផ្សះផ្សាជាតិ»៕
ចែករំលែកព័តមាននេះ