ខេត្តកំពង់ចាម ៖ បើតាមសេចក្តីរាយការណ៍បឋមបានឱ្យដឹងថា លំនៅដ្ឋានរបស់ប្រជាពលរដ្ឋ១ខ្នងដែលសាងសង់ពីឈើប្រក់ក្បឿងមានទំហំ៨គុណ៩ម៉ែត្រ បានបាក់រលំខ្ទេចខ្ទីទាំងស្រុង ខណៈពេលកំពុងសម្រាកហូបបាយ បន្ទាប់ពីរំកិលផ្ទះចេញពីកន្លែងចាស់ទៅកន្លែងថ្មី។ ដែលហេតុការណ៍នេះកើតឡើងកាលពីម៉ោង១និង៣០នាទីរសៀល ថ្ងៃទី១៦ ខែមករា ឆ្នាំ២០២០ នៅចំណុចភូមិព្រែករំដេងកើត ឃុំពង្រ ស្រុកកោះសូទិន ខេត្តកំពង់ចាម ។
សេចក្តីរាយការណ៍បន្តថា ករណីរំលំផ្ទះ១ខ្នងខាងលើ មានម្ចាស់ឈ្មោះ វ៉េង សុវ៉ាន ភេទស្រី អាយុ៥៣ឆ្នាំ ហើយហេតុការណ៍នេះមិនមានអ្នកណាម្នាក់រងគ្រោះថ្នាក់នោះទេ ។
បើតាមលោកវរសេនីយ៍ឯក អ៊ឹម ខឿន អធិការនគរបាលស្រុកកោះសូទិន ប្រាប់ឲ្យដឹងថាស្ត្រីជាម្ចាស់ផ្ទះបានជួលជាងមកឱ្យរុះរើផ្ទះ ដើម្បីរំកិលចេញពីកន្លែងចាស់ថយទៅខាងក្រោយ និងលើកឲ្យខ្ពស់ជាងមុន ក្រោយពីបាននាំគ្នាស្ទូចលើករួចរាល់ ក៏បានទៅសម្រាកនិងពិសាបាយ ដើម្បីត្រៀមរំកិលបន្តិចម្ដងៗដាក់នៅកន្លែងគោលដៅដែលគ្រោងទុក។
អធិការនគរបាលស្រុកកោះសូទិន បានប្រាប់បន្តថា ស្របពេលដែលម្ចាស់ផ្ទះ និងក្រុមជាងជាច្រើននាក់បាននាំគ្នាឈប់សំរាកនោះ ចៃដន្យស្រាប់តែរអិលកំណល់កលពីក្រោម ដែលជាហេតុបណ្ដាលឲ្យផ្ទះឈើដែលមានទំហំធំនេះបានរលំបាក់ខ្ទេចខ្ទីអស់។ នេះអាចចាត់ទុកជាមហាសំណាងមួយ ប្រសិនណាបើក្រុមជាងកំពុងតែបំពេញការងារស្ទូចលើកផ្ទះហើយបែរជាបាក់បែបនេះនោះ នឹងអាចមានអ្នករងគ្រោះថ្នាក់ ឬក៏បាត់បង់ជីវិតក៏មាន។
បន្ទាប់ពីទទួលបាននូវព័ត៌មាននេះភ្លាម កម្លាំងប៉ុស្តិ៍រដ្ឋបាល បានចុះទៅដល់កន្លែងផ្ទះកើតហេតុ ដើម្បីធ្វើការត្រួតពិនិត្យ ខណៈគេមិនទាន់ដឹងថា ទំហំនៃការខូចខាតនោះមានទឹកប្រាក់ចំនួនប៉ុន្មាននៅឡើយទេ។
ហើយរហូតមកដល់ព្រឹកថ្ងៃទី១៧ ខែមករានេះ ម្ចាស់ផ្ទះ និងក្រុមជាងរុញផ្ទះកំពុងតែធ្វើការចរចាគ្នា ដើម្បីរកដំណោះស្រាយមួយ ចៀសវាងកុំឲ្យមានការប្ដឹងផ្ដល់។
សូមបញ្ជាក់ថា នៅក្នុងឃុំពង្រ ស្រុកកោះសូទិន នាពេលកន្លង មកមិនដែលមានហេតុការណ៍បាក់រលំផ្ទះឈើ ដោយសារតែការស្ទូចមានការធ្វេសប្រហែសពីសំណាក់របស់ក្រុមជាងនោះទេ៕ (កែសម្រួលដោយ ៖ បុប្ផា)
ចែករំលែកព័តមាននេះ