រាជធានីភ្នំពេញ ៖ គម្រោង TITAN ដែលជាគម្រោងនៃកិច្ចសហប្រតិបត្តិការរវាងមន្ទីរពេទ្យកាល់ម៉ែត ជាមួយមន្ទីរពេទ្យ តាន់តុកសេង ប្រទេសសិង្ហបូរី និងមូលនិធិអន្តរជាតិ តេម៉ាសែក…
រាជធានីភ្នំពេញ ៖ គម្រោង TITAN ដែលជាគម្រោងនៃកិច្ចសហប្រតិបត្តិការរវាងមន្ទីរពេទ្យកាល់ម៉ែត ជាមួយមន្ទីរពេទ្យ តាន់តុកសេង ប្រទេសសិង្ហបូរី និងមូលនិធិអន្តរជាតិ តេម៉ាសែក បានដំណើរការរយៈពេល២ឆ្នាំកន្លងទៅ ដោយបានបណ្តុះបណ្តាលដល់គ្រូពេទ្យ និង គិលានុបដ្ឋាក ចំនួន៩០នាក់របស់កម្ពុជា លើបច្ចេកទេស ព្យាបាល និងថែទាំផ្នែប្រពាធនកម្ម ។
ថ្លែងនៅក្នុងពិធីបិទវគ្គបណ្តុះបណ្តាលស្តីពីបច្ចេកទេសព្យាបាល និងថែទាំផ្នែប្រពាធនកម្ម កាលពីព្រឹកថ្ងៃទី១៦ ខែមករា ឆ្នាំ២០២០ នៅសាលប្រជុំមន្ទីរពេទ្យកាល់ម៉ែត លោកសាស្ត្រាចារ្យ ឈាង រ៉ា អគ្គនាយកមន្ទីរពេទ្យកាល់ម៉ែត បានអោយដឹងថា ដោយមានការជាមួយក្រុមការងាររបស់មន្ទីរពេទ្យ តាន់តុកសេង ប្រទេសសិង្ហបូរី និងមូលនិធីអន្តរជាតិ តេម៉ាសែក ជាមួយមន្ទីរពេទ្យកាល់ម៉ែត អស់រយៈពេលច្រើនឆ្នាំមកហើយ គឺចាប់តាំងពីគម្រោងដំបូងដែលទើបតែនឹងបញ្ចប់នៅឆ្នាំ២០១៧ គឺគម្រោងកម្មវិធី STAR (ជំនាញផ្នែករបួស និង ការជួយសង្គ្រោះឡើងវិញ) ចាប់ពីឆ្នាំ២០១៤ ដល់ឆ្នាំ ២០១៧។
លោកអគ្គនាយកមន្ទីរពេទ្យកាល់ម៉ែត បានបន្តថា គម្រោងបណ្តុះបណ្តាល បច្ចេកទេសព្យាបាល និងថែទាំផ្នែប្រពាធនកម្ម ដែលមានរយៈពេល ៣ឆ្នាំ រវាងស្ថាប័នទាំងបី គឺមន្ទីរពេទ្យកាល់ម៉ែត មន្ទីរពេទ្យ តាន់ តុកសេង និង មូលនិធី តេម៉ាសែក ក្រោមការគាំទ្រប្រកបដោយចីរភាព ពីសំណាក់ក្រសួងសុខាភិបាល ទៅលើការប្តេជ្ញាចិត្តបន្ថែមទៅ និងស្តង់ដានៃការថែទាំខ្ពស់ដែលផ្តោតសំខាន់លើ គុណភាព សុវត្ថិភាព និងការពេញចិត្ត។
លោកអគ្គនាយកមន្ទីរពេទ្យកាល់ម៉ែត បានបន្តថា តាមរយៈការបណ្តុះបណ្តាល របស់គម្រោង TITAN (គម្រោងបច្ចេកទេស ព្យាបាល និងថែទាំផ្នែកប្រពាធនកម្ម)នេះ គ្រូពេទ្យ និងគិលានុបដ្ឋាក ផ្នែកប្រពោធនកម្ម មកពីមន្ទីរពេទ្យកាល់ម៉ែត មន្ទីរពេទ្យមិត្តភាព កម្ពុជា-ចិន-ព្រះកុសុមៈ, មន្ទីរពេទ្យមិត្តភាព ខ្មែរ-សូវៀត និងសិក្ខាកាមមកពីមន្ទីរពេទ្យខេត្ត បានទទួលនូវការណែនាំ អនុវត្តន៍ និង បទពិសោធន៍ថ្មីៗ ក្នុងការដាក់ដំណើរការក្នុងផ្នែក និងការអនុវត្តន៍ផ្នែកបច្ចេកទេសថែទាំ ក៏ដូចជាផ្នែកទំនាក់ទំនងជាមួយអ្នកជំងឺ និងគ្រួសាររបស់អ្នកជំងឺ។
លោកអគ្គនាយកមន្ទីរពេទ្យកាល់ម៉ែតបានបន្តថា ក្រោយការបណ្តុះបណ្តាល សិក្ខាកាមនិងបានរៀបចំគម្រោងជាច្រើនក្នុងគោលដៅពង្រឹង និងលើកកំពស់ការងារព្យាបាល ថែទាំអ្នកជំងឺ ហើយគម្រោងជាច្រើនទៀត ។ លោកក៏បានធ្វើការថ្លែងអំណរគុណដល់មន្ទីរពេទ្យថ្នាក់ជាតិ ខាងគណៈកម្មការរៀបចំ ក្រុមគ្រូពេទ្យ និងគ្រូបង្ហាត់នៃមន្ទីរពេទ្យតាន់តុកសេង និងមូលនិធិតេម៉ាសែកដែលបានរៀបចំ និងឧបត្ថម្ភកម្មវិធីបណ្តុះបណ្តាល បច្ចេកទេស ព្យាបាល និងថែទាំផ្នែប្រពាធនកម្ម TITAN ។ លោកសង្ឃឹមថា សហប្រតិបត្តិការរវាងមន្ទីរពេទ្យកាល់ម៉ែត មន្ទីរពេទ្យតាន់ តុកសេង និងមូលនិធិតេម៉ាសែក នឹងនៅបន្តថ្ងៃខាងមុខ។
សូមបញ្ជាក់ថា គម្រោងនៃការបណ្ដុះបណ្ដាលស្តីពី បច្ចេកទេសព្យាបាល និងថែទាំផ្នែកប្រពាធនកម្មនេះត្រូវបានដំណើរការរយៈពេល ២ឆ្នាំមកហើយ ដោយមានសិក្ខាកាមចំនួន៩០នាក់ បានចូលរួមក្នុងគម្រោងចំនួន ២០រូប បានបំពេញវគ្គ Advanced និង៧១នាក់បានបំពេញវគ្គមូលដ្ឋាន។ សិក្ខាកាមទាំងអស់ អញ្ជើញពីមន្ទីរពេទ្យកាល់ម៉ែត ៥៦នាក់ មន្ទីរពេទ្យមិត្តភាព ខ្មែរ-សូវៀត ១១នាក់ និងមន្ទីរពេទ្យមិត្តភាព កម្ពុជា-ចិន-ព្រះកុសុមៈ ១២នាក់ ព្រមទាំងមន្ទីរពេទ្យនៃ ខេត្តព្រះសីហនុ៣នាក់ ខេត្តកោះកុង ២នាក់ និងសៀមរាប៦នាក់។ ក្នុងចំណោមនោះមាន សិក្ខាកាម ចំនួន២០នាក់ បានទៅបំពេញកម្មសិក្សា នៅផ្នែកប្រពោធនកម្មនៅមន្ទីរពេទ្យ តាន់ តុកសេង ៕ (កែសម្រួលដោយ ៖ ធីតា)
ចែករំលែកព័តមាននេះ