ទាំង​អស់នេះ​បាន​ចាប់ផ្តើម​តាំងពី​ឆ្នាំ ២០១៦ នៅ​ពេល​ដែល​ក្រុមហ៊ុន Jaguar Land Rover បាន​សម្រេចចិត្ត​ប្តឹង​ទៅ​ក្រុមហ៊ុន Jiangling Motor Corporation ពី​បទ​រំលោភ​លើ​ការ​រក្សា​សិទ្ធិ​។ Land Wind X7 របស់​ក្រុមហ៊ុន​ផលិត​រថយន្ត​ចិន​មើលទៅ​ស្រ​ដៀង​នឹង Range Rover Evoque ។ ការ​ចម្លង​ម៉ូ​ដដែល​ធ្វើ​ដោយ​ក្រុមហ៊ុន​នៅ​ប្រទេស​ចិន មិនមែន​ជា​លើក​ទី​មួយ​នោះ​ទេ​។ តែ​ចំពោះ​ករណី​របស់ Land Wind X7 គឺ​ពិតជា​ដូច​ខ្លាំង​ពេក ដែល​ធ្វើ​ឱ្យ Jaguar Land Rover ទ្រាំ​មិន​ប្តឹង​មិន​បាន​។

ទើបតែ​នៅ​ខែមីនា​ឆ្នាំ​មុន ក្រុមហ៊ុន JLR អាច​ទាមទារ​យកជ័យ​ជម្នះ​លើ​ក្រុមហ៊ុន​ចិន ដោយ​ពឹងផ្អែក​លើ​លើ​ច្បាប់​ប្រកួតប្រជែង​មិន​យុត្តិធម៌​។ លទ្ធផល​នេះ​បាន​ធ្វើ​ឱ្យ​តុលាការ​ប្រជាជន​ទីក្រុង​ឆាវ​យ៉ាង​នៃ​ទីក្រុង​ប៉េ​កាំ​ង​បញ្ជា​ឱ្យ​ក្រុមហ៊ុន Jiangling បញ្ឈប់​រាល់​ការ​ប្រកួតប្រជែង​ដោយ​អយុត្តិធម៌ រួម​ទាំង​ការ​ផលិត​ការ​ដាក់​បង្ហាញ​និង​ការ​លក់​ឡាន Land Wind X7 ។ ទីបំផុត​ករណី​នេះ​ត្រូវ​បាន​ដោះស្រាយ​។ តែ​វា​មិន​ចប់​ត្រឹមនេះ​ទេ​។

ក្រុមហ៊ុន Jiangling Holdings Co Ltd បាន​ដាក់​ពាក្យបណ្តឹង​ឧទ្ធរណ៍​ភ្លាម​ៗ ត្រឡប់​ទៅ​វិញ​។ មាន​តែ​ថ្ងៃនេះ​ទេ ដែល​លទ្ធផល​សម្រេច​ចេញ​ជា​ផ្លូវការ​។ យោង​តាម​ការ​ត្រួតពិនិត្យ​ច្បាប់​ជាតិ​តុលាការ​កំពូល​របស់​ប្រជាជន​ចិន​ថ្មី​ៗ​នេះ បាន​ច្រានចោល​បណ្តឹងឧទ្ធរណ៍​របស់​ក្រុមហ៊ុន​Jiangling ។

រថយន្ត Land Wind X7 ថ្វី​ត្បិត​តែ​ជា​ការ​ចម្លង​ម៉ូ​ដ​របស់​រថយន្ត Range Rover Evoque ក៏​ដោយ តែ​វា​មាន​តម្លៃ​ថោក​ជាង​ឆ្ងាយ​។ វា​មាន​តម្លៃ​ត្រឹមតែ ២​ម៉ឺន​ដុល្លារ ខណៈ​ដែល Range Rover Evoque ថ្លៃ​ចាប់ពី ៤២៦៥០​ដុល្លារ​។ ករណី​នេះ​មិន​ត្រឹមតែ​ជា​បញ្ហា​ធំ​សម្រាប់ JLR ប៉ុណ្ណោះ​ទេ ប៉ុន្តែ​វា​ក៏​ជា​គំរូ​ថ្មី​ផង​ដែរ​។

ក្រុមហ៊ុន​ផលិត​រថយន្ត​ចិន​ផ្សេង​ទៀត ឥឡូវនេះ​អាច​ងាយ​នឹង​ប្តឹង​ដោយ​ក្រុមហ៊ុន​ផលិត​រថយន្ត​លោក​ខាងលិច ចំពោះ​ការ​រំលោភ​បំពាន​ច្បាប់​រក្សា​សិទ្ធិ​ផ្ទាល់ខ្លួន​។ សម្រាប់​ពេល​នេះ​ក្រុមហ៊ុន JLR បាន​ទទួល​ជោគជ័យ​លើ​ការ​ជម្រះក្តី ដែល​មិន​សម​នឹង​ចំណាយពេល​៤​ឆ្នាំ​ក្នុង​ការ​រង់ចាំ ៕