រាជធានីភ្នំពេញ៖ ក្នុងន័យបញ្ជៀសនូវផលប៉ះពាល់ណាមួយដល់គម្រោងសាងសង់ព្រលានយន្តហោះកោះកុង រាជរដ្ឋាភិបាលកម្ពុជាបានយល់ព្រមជាគោលការណ៍ឱ្យប្តូរកា វិនិយោគរសាងសង់ព្រលានយន្តហោះថ្មីទៅទីតាំងថ្មីលើផ្ទៃដីទំហំប្រមាណពី ៤០០ ទៅ ៦០០ហិកតា ស្ថិតនៅភូមិកោះប៉ោ ឃុំប៉ាក់ខ្លង ស្រុកមណ្ឌលសីមា ខេត្តកោះកុង ខណៈទីតាំងចាស់ស្ថិតនៅក្រុងខេមរភូមិន្ទហាក់មានផលប៉ះពាល់ច្រើន ។
ជាក់ស្តែងលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង សាធារណការ និងដឹកជញ្ជូន និង លោក សាយ សំអាល់ រដ្ឋមន្ត្រីក្រសួងបរិស្ថាន បានចុះពិនិត្យផ្លូវជាតិលេខ ១០ និងផ្លូវពីថ្មដា ខេត្តពោធិសាត់ មកខេត្តកោះកុង តាម helicopter និងពិនិត្យផលប៉ះពាល់ នៃគម្រោងសាងសង់ប្រលានយន្តហោះថ្មី នៅខេត្តកោះកុងកាលពីថ្ងៃទី ១៣ ខែមករា ឆ្នាំ២០២០ ម្សិលមិញនេះ ។
បើយោងតាមលិខិតរបស់ទីស្តីការគណៈរដ្ឋមន្ត្រី ចុះថ្ងៃទី២៧ ខែធ្នូ ឆ្នាំ២០១៩ និងចុះហត្ថលេខាដោយលោក ឈិត សុខុន ជួសលោករដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានឲ្យដឹងថា «រាជរដ្ឋាភិបាលយល់ព្រមជាគោលការណ៍ឲ្យប្តូរទៅវិនិយោគនៅទីតាំងថ្មី សម្រាប់ធ្វើព្រលានយន្តហោះលើផ្ទៃដី ទំហំប្រមាណពី៤០០ទៅ៦០០ហិកតា ស្ថិតនៅភូមិកោះប៉ោ ស្រុកមណ្ឌលសីមា ខេត្តកោះកុង» ។ តាមគម្រោងគឺរាជរដ្ឋាភិបាលកម្ពុជា បានសម្រេចឲ្យក្រុមហ៊ុនក្នុងស្រុករួមនិងក្រុមហ៊ុនមកពីក្រៅស្រុកវិនិយោគលើការសាងសង់ព្រលានយន្តហោះកោះកុងថ្មី គឺនៅលើដីអតីតព្រលានយន្តកោះកុង ស្ថិតនៅក្រុងខេមរភូមិន្ទ ប៉ុន្តែបច្ចុប្បន្នបានសម្រេចប្តូរទីតាំងទៅ ភូមិកោះប៉ោ ស្រុកមណ្ឌលសីមាវិញ ដោយសារមានផលប៉ះពាល់ ច្រើននៅទីតាំងចាស់។ កន្លងមករដ្ឋលេខាធិការដ្ឋាន អាកាសចរស៊ីវិលបានឲ្យដឹងថាគម្រោងសាងសង់ព្រលានយន្តហោះខេត្តកោះកុងឡើងវិញនេះ គឺជាការវិនិយោគរួមគ្នា ដោយក្រុមហ៊ុនលោកឧកញ៉ា លី យ៉ុងផាត់ និងក្រុមហ៊ុន Bangkok Airway របស់ថៃ ដែលមានទំហំទឹកប្រាក់ប្រមាណ៤០លានដុល្លារអាមេរិក ។
សូមបញ្ជាក់ថារាជរដ្ឋាភិបាលកម្ពុជាបាននឹងកំពុងស្តារឡើងវិញនូវគម្រោងសាងសង់ព្រលានយន្តហោះតាមបណ្តាខេត្តដែលមានសក្តានុពលក្នុងន័យធ្វើឲ្យប្រសើរឡើងនូវប្រព័ន្ធដឹកជញ្ជួនទំនិញនិងអ្នកដំណើរតាមផ្លូវអាកាស។ ជាក់ស្តែងកាលពីមុនកម្ពុជា នាឆ្នាំ១៩៩៣ មានតែក្រុមហ៊ុនអាកាសចរណ៏អន្តរជាតិ មួយគត់ហោះមកប្រទេសកម្ពុជា និងសមត្ថភាពអាកាសយានដ្ឋានអន្តរជាតិ មានចំណតយន្តហោះ ដែលអាចចតបានតែ ១០ យន្តហោះ ប៉ុណ្ណោះ ឥឡូវនេះ មានក្រុមហ៊ុនអាកាសចរអន្តរជាតិ ហោះមកកម្ពុជា ចំនួន ៤៤ ក្រុមហ៊ុន បូកនឹង្រុមហ៊ុនអាកាសចរក្នុងស្រុកចំនួន ០៥ទៀត ដោយឡែកចំណតយន្តហោះអាចចតបានយន្តហោះបានចំនួន ៤០ ដែលក្នុហនោះ យន្តហោះប្រភេទធំអាចចតបានចំនួន១០ យន្តហោះ និងនាពេលនេះប្រទេសកម្ពុជា ចុងខែវិច្ឆិកានេះបានទទួលអ្នក ១០ លាន និងប្រាំសែននាក់៕ កែសម្រួលដោយ ៖ សុឃាក់
ចែករំលែកព័តមាននេះ