តាម​ប្រភព​ព័ត៌​មាន​ពី​ដេលី​ម៉េល​ ចេញ​ផ្សាយ​​កាល​ពី​​ពេល​ថ្មី​ៗ​នេះ​បាន​ឱ្យ​ដឹង​ថា គ្រូ​បង្វឹក​ក្លិប Roma គឺ​លោក​ Rudi Garcia បាន​បង្ហើប​ប្រាប់​លោក​ វា៉ន់ ហ្គាល់​ គ្រូ​បង្វឹក​ក្លិប​បិសាច​ក្រហម​ Man Utd ថា​ ប្រសិន​បើ​ចង់​បាន​កីឡា​ករ​ខ្សែ​បម្រើ​ Kevin Strootman ត្រូវ​ត្រៀម​លុយ​ជាង​១០០​លាន​ដុល្លារ​ទុក​ជា​មុន​ ។

ក្លិប Roma ពី​មុន​មក​ធ្លាប់​និយាយ​ថា ក្លិប​នឹង​មិន​លក់​កីឡា​ករ​សញ្ជាតិ​ហូ​ឡង់​នេះ​ទេ ទោះ​បី​ក្លិប​ណា​ហា៊ន​ឱ្យ​ថ្លៃ​ប៉ុន្មាន​ក៏​ដោយ​ ក៏​ប៉ុន្តែ​ក្នុង​ជំនួប​ជាមួយ​ក្លិប​ Man Utd កាល​ពី​រាត្រី​ថ្ងៃ​សៅរ៍​ ទី២៦​ កក្កដា ២០១៤ កន្លង​ទៅ​នេះ​ ក្លិប​បែជា​ប្តូរ​ចិត្ត​ចង់​លក់​កីឡា​ករ​រូប​នេះ​ ប្រសិន​បើ​ក្លិប​ Man Utd ហ៊ាន​ឱ្យ​ដល់​ថ្លៃ​ ។

លោក​ Rudi Garcia បាន​និយាយ​ថា «ក្លិប​នឹង​ពិចារ​ណា​ប្រសិន​​ក្លិប Man Utd ហ៊ាន​ឱ្យ​តម្លៃ​ខ្លួន​កីឡា​ករ​រូប​នេះ​បី​ខ្ទង់ (ចាប់​ពី​១០០​លាន​​ដុល្លារ) ។ ចំណែក​ឯ​លោក​ វា៉ន់​ហ្គាល់​ ដែល​ធ្លាប់​ជា​អាណា​ព្យាបាល​របស់​កីឡា​ករ​ Strootman ផង​នោះ​ បា​ន​និយាយ​ថា ៖ ក្លិប​កំពុង​តាម​ដាន​ពិនិត្យ​មើល​ស្ថាន​ភាព​របួស​របស់​កីឡា​ករ​វ័យ​២៤​ឆ្នាំ​ជា​មុន​សិន​ មុន​នឹង​សម្រេច​ចិត្ត​ទិញ​​ឬ​ក៏​  អត់ ។

គួរ​រំលឹក​ថា កីឡា​ករ​ Strootman ចូល​លេង​​ឱ្យ​ក្លិប​ Roma ក្នុង​ឆ្នាំ​ ២០១៣​ ។ នៅ​ជាមួយ​ក្លិប Roma ធ្លាប់​ស៊ុត​បាល់​បាន​៥​គ្រាប់​ ក្នុង​ការ​បង្ហាញ​វត្ត​មាន​២៥​ប្រកួត ៕