ជំងឺបាយភ្នែកគេអាចព្យាបាលបានតាមរយៈការវះកាត់ ហើយក្រោយពីវះកាត់អ្នកជំងឺអាចមើលឃើញដូចដើមវិញ ។ ប៉ុន្តែក្រោយពីការវះកាត់ ក៏ត្រូវមានការថែទាំយ៉ាងយកចិត្តទុក្ខដាក់ ជាពិសេសហាមដាច់ខាត គឺមិនឱ្យភ្នែកដែលត្រូវវះកាត់នោះចូលទឹកទេ បើមិនដូច្នេះទេ ភ្នែករបស់លោកអ្នកអាចនឹងមានបញ្ហាធ្ងន់ធ្ងរ ។
ជួបជាមួយលោកវេជ្ជបណ្ឌិត ងី ម៉េត នាយកមន្ទីរពេទ្យមិត្តភាពខ្មែរ-សូវៀត និងជាប្រធានកម្មវិធីជាតិសុខភាពភ្នែក បានប្រាប់កោះសន្តិភាពថា អ្នកដែលទើបតែទទួលការវះកាត់ដោយបច្ចេកទេសខ្ពស់ និងជាបច្ចេកវិទ្យាចុងក្រោយដែលកំពុងប្រើប្រាស់សព្វថ្ងៃនៅលើពិភពលោកកែវសិប្បនិម្មិត (IOL) ដែលអ្នកបានជ្រើសរើស គឺមានគុណភាពខ្ពស់ និងតម្រូវតាមទម្រង់ភ្នែកជួយឱ្យអ្នកមើលឃើញបានច្បាស់ល្អ ។ ដូច្នេះដើម្បីឱ្យមុខរបួសឆាប់ជាសះស្បើយ ក្រោយពីទទួលការវះកាត់ភ្នែកឡើងបាយ លោកអ្នកចាំបាច់ត្រូវធ្វើតាមការណែនាំរបស់គ្រូពេទ្យឯកទេសដូចខាងក្រោម ៖
១.ធ្វើតាមការណែនាំ ៖ រយៈពេល១ថ្ងៃក្រោយពីវះកាត់
-ចៀសវាងញីភ្នែក បើទោះជាក្នុងភ្នែករមាស់ ឬក្រហាយ
-ការពារការប៉ះទង្គិចដល់ភ្នែក ត្រូវពាក់វ៉ែនតាការពារកម្តៅថ្ងៃ (Sun Glass) ។ បិទប្រដាប់ការពារភ្នែក (Eye Shield) នៅពេលយប់ ។
២.ប្រការគួរចៀសវាង ៖
-មិនត្រូវឱ្យទឹកចូលភ្នែកដែលវះកាត់នោះជាដាច់ខាត
-ប្រើកន្សែងសើមស្អាតជូតមុខជំនួសការលុបមុខ
-ចៀសវាងកក់សក់ខ្លួនឯង អាចកក់សក់នៅហាងអ៊ុតសក់ ដោយចៀសវាងទឹកចូលភ្នែកដែលបានវះកាត់នោះ ។
វិធីសាស្ត្រដ៏ត្រឹមត្រូវក្នុងការសម្អាតភ្នែកដូចជា ៖
-ដោះប្រដាប់ការពារភ្នែក (Eye Shield) ដាក់លើក្រណាត់ស្អាត ។
-លាងដៃនឹងទឹកសាប៊ូយ៉ាងតិច១៥វិនាទី បន្ទាប់មកយកកន្សែង ឬក្រណាត់ជូតដៃឱ្យស្អាត ។
-នៅពេលអ្នកជំងឺសម្លឹងចុះក្រោមត្រូវសម្អាតត្របកភ្នែកខាងលើដោយប្រើគល់សំឡីទី១ជូតសម្អាតកន្លែងក្បែររោមភ្នែក ចាប់ពីកៀនច្រមុះទៅដល់កន្ទុយភ្នែក ។ ត្រូវជូតពីកន្លែងក្បែររោមភ្នែកចេញមកក្រៅ មិនត្រូវជូតពីក្រៅចូលក្នុងភ្នែកទេ ។ ចំណែកឯគល់សំឡីម្ខាងទៀត យើងអាចប្រើវា ដើម្បីជូតត្របកភ្នែកខាងក្រោម ។
-ត្រូវសម្អាតភ្នែកឱ្យបានយ៉ាងតិចម្តងក្នុង១ថ្ងៃ ។
* របៀបប្រើប្រាស់ថ្នាំបន្តក់ភ្នែក ៖
-ត្រូវលាងដៃឱ្យបានស្អាតមុននឹងកាន់ថ្នាំបន្តក់ភ្នែក
-បើកគម្របថ្នមៗ និងដាក់វានៅលើកន្លែងដែលស្អាត
-អ្នកជំងឺត្រូវអង្គុយនៅលើកៅអី ឬលើគ្រែ រួចទាញត្របកភ្នែកខាងក្រោមឱ្យលានលៀនចេញ ។
-តំណក់ទឹកថ្នាំ គឺត្រូវបន្តក់ម្តងតែមួយតំណក់បានហើយ ។ ត្រូវចៀសវាងកុំឱ្យដបថ្នាំប៉ះនឹងភ្នែកដែលអាចបណ្តាលឱ្យឆ្លងមេរោគ ។
-បន្ទាប់មកអ្នកជំងឺត្រូវបិទភ្នែករយៈពេល១នាទីដើម្បីឱ្យជាតិថ្នាំជ្រាបចូលសព្វជាមួយគ្រាប់ភ្នែក។
សម្គាល់ ៖ ប្រសិនបើអ្នកមានថ្នាំបន្តក់ភ្នែកច្រើនប្រភេទ ត្រូវទុករយៈពេល៥ ទៅ១០នាទី មុននឹងបន្តក់ថ្នាំភ្នែកផ្សេងទៀត ហើយរវាងថ្នាំបន្តក់ និងថ្នាំលេប អ្នកត្រូវប្រើថ្នាំបន្តក់មុន ។
ការថែរក្សាប្រចាំថ្ងៃ ៖
-អ្នកអាចមើលទូរទស្សន៍ ឬអក្សរបាន ប្រសិនបើភ្នែកអ្នកមិនឈឺទេ
-ការហាត់ប្រាណស្រាលៗ ក៏អាចធ្វើទៅបាន
-អាចទទួលទានអាហារធម្មតា ប៉ុន្តែបើអ្នកមានជំងឺទឹកនោមផ្អែម ត្រូវតមនូវប្រភេទអាហារដែលគ្រូពេទ្យបានណែនាំ
-ចៀសវាងការក្អកខ្លាំង កណ្តាស់ខ្លាំង
-ត្រូវទទួលទានថ្នាំប្រចាំថ្ងៃឱ្យបានទៀងទាត់ពេលវេលា ។
ចំណាំ ៖ រោគសញ្ញាមិនធម្មតាដែលអ្នកចាំបាច់ត្រូវជួបជាមួយគ្រូពេទ្យជាបន្ទាន់មានៈ ភ្នែកឡើងក្រហម ឈឺភ្នែក គំហើញថយចុះ ត្របកភ្នែកហើមជាដើម ៕
ចែករំលែកព័តមាននេះ