ខេត្តព្រៃវែង ៖ ក្រោយការស៊ើបអង្កេតអស់រយៈពេល៥ថ្ងៃ ទីបំផុតកម្លាំងអាវុធហត្ថខេត្តព្រៃវែងបានរកឃើញ និងចាប់ជនសង្ស័យជាឃាតកររំលោភសម្លាប់យុវតីម្នាក់ ហើយយកសពទៅកប់ពន្លិចនៅខាងក្រោមកំប្លោកក្នុងស្រះទឹកខាងក្រោយថ្នាក់រៀន ។ ជនសង្ស័យត្រូវបានឃាត់ខ្លួនកាលពីវេលាម៉ោង៤និង២២នាទីរសៀល ថ្ងៃទី២៣ ខែកុម្ភៈ…
ខេត្តព្រៃវែង ៖ ក្រោយការស៊ើបអង្កេតអស់រយៈពេល៥ថ្ងៃ ទីបំផុតកម្លាំងអាវុធហត្ថខេត្តព្រៃវែងបានរកឃើញ និងចាប់ជនសង្ស័យជាឃាតកររំលោភសម្លាប់យុវតីម្នាក់ ហើយយកសពទៅកប់ពន្លិចនៅខាងក្រោមកំប្លោកក្នុងស្រះទឹកខាងក្រោយថ្នាក់រៀន ។
ជនសង្ស័យត្រូវបានឃាត់ខ្លួនកាលពីវេលាម៉ោង៤និង២២នាទីរសៀល ថ្ងៃទី២៣ ខែកុម្ភៈ នៅក្នុងអនុវិទ្យាល័យបាខៅ ក្នុងភូមិព្រៃផ្តៅ ឃុំស្តៅកោង ស្រុកបាភ្នំ ដែលជាកន្លែងកើតហេតុ ។
ជនសង្ស័យឈ្មោះ អោក អូន ភេទប្រុស អាយុ៥៤ឆ្នាំ មុខរបរជាអ្នកយាមនៅក្នុងសាលាកើតហេតុ និងមានទីលំនៅក្នុងភូមិ-ឃុំកើតហេតុខាងលើ ចំណែកយុវតីរងគ្រោះអាយុ១៣ឆ្នាំ ជាសិស្សរៀននៅក្នុងអនុវិទ្យាល័យបាខៅ ។
លោកវរសេនីយ៍ត្រី ផាត់ សុជោត ប្រធានមន្ទីរយុត្តិធម៌ខេត្តបានឱ្យដឹងថា ក្រោយពីប្រទះឃើញសពយុវតីសិស្សសាលាម្នាក់ត្រូវឃាតកររំលោភ រួចសម្លាប់ពន្លិចក្នុងស្រះទឹកខាងក្រោយថ្នាក់កាលពីព្រឹកថ្ងៃទី១៩ កុម្ភៈនោះ លោកមេបញ្ជាការកងរាជអាវុធហត្ថខេត្តបញ្ជាឱ្យកម្លាំងអាវុធហត្ថខេត្ត និងស្រុកចុះស្រាវជ្រាវភ្លាម ដោយបានប្រើពេលអស់៥ថ្ងៃ ទើបប្រមូលបានភស្តុតាង និងឈានទៅដល់ការចាប់ខ្លួនជនសង្ស័យជាអ្នកយាមសាលានេះតែម្តង។ ដោយសារជនសង្ស័យជាអ្នកយាមសាលា ដូច្នេះក្រោយពីធ្វើសកម្មភាពរំលោភសម្លាប់យុវតីរងគ្រោះហើយ គឺរូបគេមិនបានរត់គេចខ្លួនទេ ដោយនៅធ្វើការក្នុងសាលាដូចធម្មតា ប៉ុន្តែទោះជារូបគេខិតខំលាក់បាំងយ៉ាងណាក៏អារម្មណ៍ភ័យខ្លាចគេដឹងនូវទង្វើរបស់ខ្លួននោះនៅតែស្តែងចេញ រហូតធ្វើឱ្យសមត្ថកិច្ចសង្ស័យ ទើបទីបំផុតក៏ធ្លាយចេញនូវអាថ៌កំបាំងដ៏អាក្រក់របស់ខ្លួន និងត្រូវសមត្ថកិច្ចឃាត់ខ្លួនមកកសាងសំណុំរឿងបញ្ជូនទៅកាន់សាលាដំបូងខេត្តព្រៃវែងនៅព្រឹកថ្ងៃទី២៥ ខែកុម្ភៈនេះតែម្តង។
សូមរំលឹកថា យុវតីរងគ្រោះគឺជាសិស្សរៀននៅក្នុងអនុវិទ្យាល័យបាខៅ មានទីលំនៅក្នុងស្រុកបាភ្នំ ខេត្តព្រៃវែង នាងបានធ្វើដំណើរចេញពីផ្ទះទៅសាលារៀនកាលពីរសៀលថ្ងៃទី១៥ កុម្ភៈ ក៏បាត់ខ្លួនរហូតមិនឃើញត្រឡប់ទៅផ្ទះវិញ លុះមកដល់ព្រឹកថ្ងៃទី១៩ ស្រាប់តែមានសិស្សសាលាប្រទះឃើញសពនាងនៅខាងក្រោមកំប្លោកក្នុងស្រះទឹកខាងក្រោយថ្នាក់រៀន ទើបធ្វើឱ្យមានការផ្អើលឆោឡោឡើងរហូតដល់សមត្ថកិច្ចចុះទៅត្រួតពិនិត្យ ទើបដឹងថា នាងត្រូវគេរំលោភហើយសម្លាប់៕
ចែករំលែកព័តមាននេះ