អូស្រ្តាលី៖ យោងតាមការសិក្សារបស់ទីភ្នាក់ងារវិទ្យាសាស្ត្រជាតិអូស្រ្តាលីបានឱ្យដឹងថា វីរុសកូរ៉ូណាដែលបង្កទៅជាជម្ងឺកូវីដ១៩ អាចរស់នៅលើរបស់របរផ្សេងៗ ដូចជា ក្រដាសប្រាក់ ឬ ទូរស័ព្ទរបស់យើង បានដល់ទៅ២៨ថ្ងៃ ក្នុងស្ថានភាពត្រជាក់និងងងឹត។

ទីភ្នាក់ងារស្រាវជ្រាវបាននិយាយកាលពីថ្ងៃច័ន្ទថា ក្រុមអ្នកស្រាវជ្រាវនៅមជ្ឈមណ្ឌលត្រៀមបង្ការជម្ងឺរបស់ CSIRO បានធ្វើតេស្តរកមើលអាយុកាលរបស់វីរុសនេះ នៅក្នុងភាពងងឹតនៅសីតុណ្ហភាព ៣ប្រភេទ ដែលបានបង្ហាញថា វាអាចរស់បានកាន់តែខ្លីនៅពេលសីតុណ្ហភាពកាន់តែក្តៅ។

ក្រុមអ្នកវិទ្យាសាស្ត្របានរកឃើញថា នៅសីតុណ្ហភាព ២០អង្សាសេ វីរុសកូរ៉ូណា មានភាពរឹងមាំខ្លាំងនៅលើផ្ទៃរលោងដូចជាអេក្រង់ទូរស័ព្ទចល័តអាចរស់បាន ២៨ថ្ងៃលើកញ្ចក់​ ដែក និងក្រដាសប្រាក់ប្លាស្ទិក។

ប្រសិនបើ នៅ ៣០អង្សាសេ អត្រានៃការរស់របស់វីរុសនេះចុះដល់៧ថ្ងៃ ហើយកាន់តែខ្លីទៀតពេលនៅក្នុងសីតុណ្ហភាព៤០អង្សាសេ មកត្រឹម២៤ម៉ោង៕