រាជធានីភ្នំពេញ ៖ បន្ទាប់ពីលិខិតរបស់ទីស្ដីការគណៈរដ្ឋមន្ត្រីត្រូវបានចេញផ្សាយជាសាធារណៈជុំវិញបញ្ហារើផ្សារបន្លែពីផ្សារដើមគទៅទីតាំងថ្មីមក អាជីវករលក់បន្លែនៅតំបន់នេះបានប្រាប់កោះសន្ដិភាពកាលពីរសៀលថ្ងៃទី៤ ម្សិលមិញថា ពួកគាត់មិនចង់ចាកចេញទេ ព្រោះនឹងជួបបញ្ហាច្រើនដូចជា បាត់ម៉ូយ និងចំណាយច្រើនទាំងពេលវេលា និងលុយកាក់ជាដើម…
រាជធានីភ្នំពេញ ៖ បន្ទាប់ពីលិខិតរបស់ទីស្ដីការគណៈរដ្ឋមន្ត្រីត្រូវបានចេញផ្សាយជាសាធារណៈជុំវិញបញ្ហារើផ្សារបន្លែពីផ្សារដើមគទៅទីតាំងថ្មីមក អាជីវករលក់បន្លែនៅតំបន់នេះបានប្រាប់កោះសន្ដិភាពកាលពីរសៀលថ្ងៃទី៤ ម្សិលមិញថា ពួកគាត់មិនចង់ចាកចេញទេ ព្រោះនឹងជួបបញ្ហាច្រើនដូចជា បាត់ម៉ូយ និងចំណាយច្រើនទាំងពេលវេលា និងលុយកាក់ជាដើម ។
អ្នកស្រី យ៉ាន់សុផង់ អាជីវករលក់ផ្លែឈើក្បែរផ្សារដើមគ បានឱ្យដឹងថា ការផ្លាស់ប្ដូរកន្លែងថ្មី វាមិនដូចនៅកន្លែងចាស់ទេ ព្រោះកន្លែងចាស់មានម៉ូយស្គាល់យើងច្បាស់ គេតម្រង់មកទិញកន្លែងយើងតែម្ដង តែបើប្តូរទីតាំងថ្មី ទម្រាំភ្ញៀវស្គាល់ ត្រូវការពេលយូរ ។ ដូចនេះវាធ្វើឱ្យការរកស៊ីប្រចាំថ្ងៃរង់ការខាតបង់ ពិសេសលើការចំណាយ ។ អ្នកស្រីបន្ដថា ៖« វាមិនត្រឹមតែចំណាយពេលយូរទេ ត្រូវចំណាយលើសោហ៊ុយចុះឡើងច្រើនថែមទៀត »។
ចំណែក លោកយាយ រស់ ម៉ៅ បានឲ្យដឹងថា ៖« បើតាមអារម្មណ៍អាជីវករភាគច្រើនមានការភ័យចំពោះរើទីកន្លែង ដូចខ្ញុំជាដើម រស់នៅជួលផ្ទះគេ បើរកប្រាក់បង់មិនបាន ត្រូវធ្វើម៉េច0x017d7 ហើយបើកន្លែងថ្មីឆ្ងាយពីកន្លែងបោះដុំអីចឹង អត់មានប្រាក់ចំណេញទេ ព្រោះចំណាយលើការដឹកជញ្ជូនទៅវិញអស់តែម្ដង »។
លោកយាយមានប្រសាសន៍ថា ៖« ខ្ញុំមានអារម្មណ៍ភ័យជាងគេ ព្រោះផ្ទះជួលគេ កន្លែងក៏ជួលគេ ដល់ពេលដូរកន្លែងឆ្ងាយពីទីផ្សារ វាវេទនា មុននឹងបានដូចដើម »។
ស្រដៀងគ្នានេះដែរ អ្នកស្រី ស្រី អោក សំអឿន ដែលកំពុងអង្គុយលក់បន្លែ បាននិយាយថា ៖« ខ្ញុំលក់បន្ថែនៅក្បែរផ្សារនេះជាង១០ឆ្នាំហើយ គឺលក់ពីព្រឹកដល់យប់ គ្មានសល់អីទេ បានតែចិញ្ចឹមកូន៧នាក់ និងឱ្យកូនរៀនខ្លះៗតែប៉ុណ្ណោះ ហើយបើមានការរុះរើមែន មានតែទៅតាមហ្នឹង បើមិនអីចឹង មានចំណូលឯណាផ្គត់ផ្គង់គ្រួសារ បើយើងចេះតែលក់បន្លែ »។
សូមបញ្ជាក់ថា ការរើផ្សារបន្លែនេះ មិនមែនសំដៅលើការរើផ្សារដើមគទាំងមូលនោះទេ។ បើតាមអ្នកនាំពាក្យរដ្ឋបាលរាជធានីភ្នំពេញ លោកម៉េត មាសភ័ក្តី បានឲ្យដឹងតាមទូរស័ព្ទរសៀលថ្ងៃទី៤ មករានេះថា រដ្ឋបាលសាលារាជធានីភ្នំពេញបានចេញសេចក្តីប្រកាសព័ត៌មានហើយ ដោយមិនមានការវិនិយោគផ្សារ និងការរុះរើផ្សារដើមគទៅកាន់ទីតាំងថ្មីនោះទេ គឺរើតែផ្សារបន្លែប៉ុណ្ណោះ ។
យោងតាមលិខិតរបស់ទីស្តីការគណៈរដ្ឋមន្ត្រី លេខ៨២៧ សជណ ចុះថ្ងៃទី២ សីហា ឆ្នាំ២០១៨ កន្លងមក និងចុះហត្ថលេខាដោយលោក ប៊ុន អ៊ុយ ដែលមានកម្មវត្ថុថា រាជរដ្ឋាភិបាលបានយល់ព្រមជាគោលការណ៍យកដីចំនួន២០ហិកតានៅបឹងតាមមោកដើម្បីសាងសង់ផ្សារផ្គត់ផ្គង់បន្លែ ផ្លែឈើ និងចំណតរថយន្ត និងអនុញ្ញាត្តរើផ្សារបន្លែពីផ្សារដើមគ ទៅកាន់ផ្សារថ្មីនៅបឹកតាមោកវិញ ។បឹងតាមោកជាបឹងធំមួយស្ថិតនៅភាគពាយព្យនៃរាជធានីភ្នំពេញ ដែលបានដើរតួនាទីជាផ្នែកមួយនៃការរំដោះទឹកជំនន់ចេញពីទីក្រុងភ្នំពេញ ។
អភិបាលរាជធានីភ្នំពេញ លោក ឃួង ស្រេង បានមានប្រសាសន៍ថា ការរើផ្សារនេះជាការរំដោះបញ្ហាចរាចរណ៍ និងសណ្តាប់ធ្នាប់របៀបរៀបរយរបស់ក្រុង ដែលតំបន់ផ្សារដើមគ តែងតែកកស្ទះចរាចរណ៍ជាប់ជាប្រចាំ ។ លោកបន្តថា ៖« បច្ចុប្បន្ននៅទីក្រុងភ្នំពេញមានបញ្ហាចរាចរណ៍ដូចជាទីក្រុងនានានៅលើពិភពលោក ហេតុនេះយើងត្រូវរៀបចំសណ្តាប់ធ្នាប់ និងចរាចរណ៍ឲ្យបានល្អប្រសើរ »៕
ចែករំលែកព័តមាននេះ