តាមប្រភពព័ត៌មាន Oddity Central បានឲ្យដឹងថា ស្រីស្អាតដែលជាកសិករនៅប្រទេសចិនម្នាក់ បានធ្វើឲ្យរន្ទឺបណ្តាញសង្គម តាមរយៈភាពច្នៃប្រឌិតដ៏ប៉ិនប្រសព្វរបស់នាង ។ នាងបានយកបាវស៊ីម៉ងត៍ចំនួន៤០ ដែលសល់ពីសង់ផ្ទះមកធ្វើជារ៉ូបរៀបអាពាហ៍ពិពាហ៍ ។
ស្រីស្អាតវ័យ២៨ឆ្នាំ Lili Tan មិនដែលធ្លាប់រៀនថ្នាក់ឌីហ្សាញនោះទេ ។ តែនាងបានចំណាយពេលជាច្រើនទៅលើការគិតច្នៃប្រឌិតទៅលើបង្កើតរបស់របរប្រើប្រាស់ខ្លះ និងសម្លៀកបំពាក់មួយចំនួន ដើម្បីចិញ្ចឹមជីវិត ។ ការងារនេះមិនត្រឹមតែអាចផ្តល់លុយឲ្យនាងប៉ុណ្ណោះទេ វាថែមទាំងជួយនាងមិនឲ្យអផ្សុកពេលអត់អីធ្វើ ដោយសារមេឃភ្លៀងថែមទៀត ។ នាងមិនអាចទៅធ្វើស្រែបានទេ ពេលមេឃភ្លៀង ។ នាងបានយកបាវស៊ីម៉ត៍ដែលជាសំរាមមកធ្វើជារ៉ូបរៀបការ ហើយបង្ហោះទៅលើបណ្តាញសង្គម ។ គ្រាន់តែភ្លាមនោះមានអ្នកចុចមើលដល់ទៅរាប់លានដង ។
នាងបាននិយាយប្រាប់ Pear Video ថា៖ «ខ្ញុំមិនបានរំពឹងថា នឹងមានអ្នកឆ្លើយតបច្រើនបែបនេះទេ ។ វាពិតជារឿងដ៏ល្អគួរឲ្យភ្ញាក់ផ្អើល»។ Tan បានបន្តនិយាយលក្ខណៈលេងសើចថា៖«ប្រហែលជាអាចបាន Like ច្រើនជាងនេះ ប្រសិនបើខ្ញុំស្អាតជាឥឡូវ »។
គួរបញ្ជាក់ផងដែរថា រ៉ូបរៀបការនោះមិនមែនប្រើសម្រាប់ Tan រៀបការនោះទេ ព្រោះនាងមានប្តីរួចទៅហើយ ដែលបានរៀបការតាំងពីឆ្នាំ២០១២ ហើយពេលនេះបានកូនប្រុសម្នាក់ហើយ ៕
ចែករំលែកព័តមាននេះ