ទីក្រុងបាងកក ៖ យោងតាមរដ្ឋមន្ត្រីការងារលោក Adul Sangsingkeo បានឲ្យដឹងថា ប្រទេសមីយ៉ាន់ម៉ាមានចំណាប់អារម្មណ៍ក្នុងការបញ្ជូនពលករប្រមាណ៤,២ម៉ឺននាក់ ដើម្បីបំពេញការងារដែលនៅទំនេរក្នុងវិស័យនេសាទ ។
លោក Adul បាននិយាយបែបនេះ បន្ទាប់ពីលោកបានត្រលប់ពីទស្សនកិច្ចទៅកាន់ប្រទេសមីយ៉ាន់ម៉ា ។ ក្នុងនោះ ភាគីទាំងពីរ នឹងមានការចរចាលើប្រាក់បៀវត្ស និងអត្ថប្រយោជន៍ផ្សេងៗ មុនពេលដំណើរការផ្លូវការចាប់ផ្តើម ។
លោកបានឲ្យដឹងទៀតថា ប្រសិនបើកិច្ចព្រមព្រៀងត្រូវបានសម្រេច ពលករដែលភាគច្រើនមកពីតំបន់ឆ្នេរសមុទ្រដូចជា Myeik និង Kawthong នឹងត្រូវបានបញ្ជូនក្រោមប្រព័ន្ធអនុស្សរណៈនៃការយោគយល់គ្នា ខណៈដែលមានការបង្កើតមជ្ឈមណ្ឌលផ្តល់សេវាកម្មមួយដល់ពលករនៅខេត្ត Ranong។
លោករដ្ឋមន្ត្រី Adul បាននិយាយថា មន្ត្រីជាប់ពាក់ព័ន្ធក្នុងប្រទេសមីយ៉ាន់ម៉ាបានស្នើដល់ប្រទេសថៃឲ្យបញ្ជូនបញ្ជីឈ្មោះពលករចំនួន ៣,៦ម៉ឺននាក់ដែលកំពុងធ្វើការក្នុងវិស័យនេសាទដល់ពួកគេ មុនថ្ងៃទី៣១ខែសីហា ។
ព័ត៌មាននេះ នឹងត្រូវបានដាក់ស្នើទៅកាន់សភាមីយ៉ាន់ម៉ាដើម្បីពិចារណា ។ វាជាផ្នែកមួយនៃដំណើរការបញ្ជូលពលករទៅកាន់ប្រទេសដទៃក្រោមប្រព័ន្ធ MoU ។
យោងតាមរដ្ឋមន្ត្រីរូបនេះ ពលករប្រមាណ ៩ពាន់នាក់ដែលនឹងបញ្ជូនទៅកាន់ប្រទេសថៃលើកនេះ នឹងធ្វើការក្នុងវិស័យនេសាទនៅខេត្តភាគខាងត្បូងទាំង៣របស់ប្រទេសថៃ។ ការព្រមព្រៀងរបស់មីយ៉ាន់ម៉ាក្នុងការបញ្ជូនពលករឲ្យដោះស្រាយបញ្ហាកង្វះពលកម្មក្នុងវិស័យនេសាទរបស់ប្រទេសថៃ នឹងកាត់បន្ថយសម្ពាធលើរដ្ឋាភិបាល ។
ប្រទេសថៃកំពុងតែត្រូវបានជំរុញដោយអាជីវករក្នុងវិស័យនេសាទ ឲ្យអនុម័តផ្នែក៨៣នៃច្បាប់នេសាទដែលអនុញ្ញាតឲ្យនាយកដ្ឋាននេសាទចុះឈ្មោះពលករបរទេសបន្ថែម ប៉ុន្តែក្រសួងការងារបានស្ទាក់ស្ទើរក្នុងការអនុម័តព្រោះពួកគេចង់បានប្រព័ន្ធMoUមួយដែលធានាថា ពលករបរទេសត្រូវឆ្លងកាត់ការត្រួតពិនិត្យពីរដ្ឋាភិបាលជាមុនសិន ៕
ចែករំលែកព័តមាននេះ