ខេត្តត្បូងឃ្មុំ ៖ សេចក្តីរាយការណ៍បឋមឱ្យដឹងថា ករណីហិង្សាបង្ហូរឈានដោយប្រើដាវ កាប់លើបុរសម្នាក់ឡើងរបួសស្មា និងក្បាលរយះធ្ងន់ធ្ងរ ក្នុងជម្លោះពេលផឹកស៊ី កើតឡើងកាលពីវេលាម៉ោង០១ និង៣០នាទីរសៀលថ្ងៃទី០៧ សីហា ស្ថិតត្រង់ចំណុចផ្ទះរបស់ជនរងគ្រោះ ក្នុងភូមិរំចេក ឃុំរំចេក ស្រុកមេមត់ ខេត្តត្បូងឃ្មុំ ហើយជនដៃដល់ក៏បានឃាត់ខ្លួនភ្លាមៗ ។
សេចក្តីរាយការណ៍បន្តថា ជនរងគ្រោះខាងលើ មានឈ្មោះឃុន ខាន អាយុ២៦ឆ្នាំ (រងរបួសរយះក្បាលជាច្រើនកន្លែង) ។ រីឯជនដៃដល់ឈ្មោះស៊ឹម វ៉ាត អាយុ៣៤ឆ្នាំ ទាំង២នាក់មានទីលំនៅក្នុងភូមិកើតហេតុ ។
ប្រភពបន្តថា មុនពេលកើតហេតុ ទាំង២នាក់បានអង្គុយផឹកស៊ីជាមួយគ្នា ។ លុះពេលស្រវឹងរៀងៗខ្លួន ក៏និយាយលែងត្រូវគ្នា ឌឺដងកាន់តែខ្លាំងទៅៗ តែគេមិនទាន់ដឹងពីរឿងអ្វីនោះទេ ។ រហូតធ្វើឱ្យជនដៃដល់រត់ទៅយកដាវមកកាប់លើជនរងគ្រោះមិនប្រណីដៃ ទើបបង្កការភ្ញាក់ផ្អើលតែម្តង ។
យ៉ាងណានោះ គេនៅមិនទាន់ដឹងជម្លោះអ្វីនោះទេ ដោយបច្ចុប្បន្នសមត្ថកិច្ចកំពុងសាកសួរ ដើម្បីចាត់ការតាមច្បាប់ ។
ចែករំលែកព័តមាននេះ