ខេត្តសៀមរាប ៖ រថយន្តកូរ៉េដឹកតុការបើកបរក្នុងល្បឿនលឿនបានបុកម៉ូតូរបស់អ្នកលក់អេតចាយ បណ្តាលឱ្យរងរបួសធ្ងន់ ។ ហេតុការណ៍គ្រោះថ្នាក់ចរាចរណ៍បង្កឱ្យមានការភ្ញាក់ផ្អើលពេញផ្លូវកាលពីវេលាម៉ោង៥និង៤០នាទីល្ងាចថ្ងៃទី ២៨ ខែកក្កដា ឆ្នាំ២០១៨ ស្ថិតនៅលើចំណុចផ្លូវក្រោយផ្សារលើ ទល់មុខហាងលក់អេតចាយ ក្នុងភូមិតាវៀន សង្កាត់សាលាកំរើក ក្រុងសៀមរាប ខេត្តសៀមរាប។
ប្រភពបានឱ្យដឹងថា ជនរងគ្រោះឈ្មោះ ទួន ចំរើន ភេទប្រុស អាយុ៥៥ឆ្នាំ មុខរបរដើរទិញអេតចាយ ស្នាក់នៅផ្ទះជួលក្នុងសង្កាត់ជ្រាវ ក្រុងសៀមរាប បានជិះម៉ូតូកូរ៉េមួយគ្រឿង ពណ៌ក្រហម ពាក់ស្លាកលេខ ខ៩៥០៤ ឃ១ បានរងរបួសធ្ងន់ ។ ចំណែកអ្នកបើកបររថយន្តដឹកតុការរបស់ថៅកែស្វាយមាស ឈ្មោះ សុ ភី ភេទប្រុស អាយុឆ្នាំ មុខរបរបុគ្គលិក មានទីលំនៅខេត្តកណ្តាល បច្ចុប្បន្នស្នាក់នៅផ្ទះជួល ជិតហាងស្វាយមាស បានបើកបររថយន្តមួយគ្រឿង ពណ៌ស ពាក់ស្លាកលេខ សៀមរាប ៣A-១៤៤៧ បានរត់គេចខ្លួនបាត់។
តាមប្រភពសាក្សីពីកន្លែងកើតហេតុបានប្រាប់ឱ្យដឹងថា ករណីគ្រោះថ្នាក់ចរាចរណ៍រវាងរថយន្តដឹកតុកៅអី របស់ថៅកែស្វាយមាសបុកជាមួយម៉ូតូអ្នកលក់អេតចាយនេះ គឺបង្កឡើងដោយរថយន្តបើកបរក្នុងល្បឿនលឿនមកពីត្បូងទៅជើង ខណៈម៉ូតូអ្នកលក់អេតចាយដែលបានដឹកចូលយកទៅលក់ឱ្យថៅកែអេតចាយ អស់ រួចក៏ជិះម៉ូតូចេញមកវិញមិនទាន់ទាំងបានឆ្លងផ្លូវផង ក៏ត្រូវរថយន្តនោះបុកម៉ូតូអូសកៀបទៅនឹងកង់មុខប្រហែលជិត១០ម៉ែត្រតែម្តង បណ្តាលឱ្យអ្នកលក់អេតចាយរងរបួសធ្ងន់ ហើយបានថៅកែអេតចាយ ជួយហៅម៉ូតូឌុបដឹកយកជនរងគ្រោះទៅសង្គ្រោះភ្លាមៗនៅមន្ទីរពេទ្យផងដែរ។ ចំណែកអ្នកបើកបររថយន្តបានរត់គេចខ្លួនបាត់ ។
បើតាមប្រភពពីមន្ត្រីនគរបាលចរាចរណ៍ដែលបានចុះមកដល់កន្លែងកើតហេតុបានប្រាប់ថា បន្ទាប់ពីមានគ្រោះថ្នាក់ចរាចរណ៍ ត្រូវបានប្រជាការពារភូមិបោះដៃតាមអាយកូមមក ទើបមន្ត្រីនគរបាលចុះមកជួយអន្តរាគមន៍ ព្រមទាំងធ្វើការវាស់វែង ដើម្បីយកម៉ូតូចេញពីក្រោមឡាននោះ។
ប្រភពបានបញ្ជាក់ទៀតថា ប្រសិនបើម្ចាស់រថយន្ត(ថៅកែស្វាយមាស) ដោះស្រាយមិនបញ្ចប់នៅគោល
ដៅនោះទេ កម្លាំងជំនាញនឹងរៀបចំកសាងសំណុំរឿងបញ្ជូនបន្តទៅការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្ត ។
បច្ចុប្បន្ន ជនរងគ្រោះកំពុងសង្គ្រោះបន្ទាន់ នៅក្នុងមន្ទីរពេទ្យបង្អែកខេត្តសៀមរាប (ស្ថិតនៅក្នុងស្ថានភាពធ្ងន់ធ្ងរ) រីឯរថយន្តបង្ក និងម៉ូតូត្រូវបានកម្លាំងជំនាញ អូសយកទៅរក្សាទុកនៅគោលដៅពីខាងលិចស្ទឹងសៀមរាប ដើម្បីរង់ឱ្យចាំដោះស្រាយទៅតាមផ្លូវច្បាប់៕
ចែករំលែកព័តមាននេះ