ខេត្តព្រៃវែង ៖ ករណីអំពើហិង្សាមួយបានកើតឡើងកាលពីវេលាម៉ោង៩និង៣០នាទីយប់ ថ្ងៃទី២៥ កក្កដា នៅចំណុចភូមិជំរៅ ឃុំកំពង់សឹង្ហ ស្រុកព្រះស្តេច ខេត្តព្រៃវែង ដោយសារតែទាស់សំដីគ្នាក្នុងពេលផឹកស៊ី បុរសជាបងថ្លៃម្នាក់បានទាញចានថ្មគប់ទៅលើប្អូនថ្លៃ បណ្តាលអោយបែកចិញ្ចើម រួចក៏រត់គេចខ្លួនបាត់ ធ្វើអោយបងប្អូនកូនក្មួយភ្ញាក់ផ្អើលពេញផ្ទះ។
ជនរងគ្រោះក្នុងអំពើហិង្សានេះឈ្មោះ ហ៊ាង ខ្លយ ភេទប្រុស អាយុ២០ឆ្នាំ ត្រូវជាប្អូនថ្លៃជនសង្ស័យ។ ចំណែកជនសង្ស័យឈ្មោះ ម៉ក់ រស្មី ភេទប្រុស អាយុ៣២ឆ្នាំ ត្រូវជាបងថ្លៃជនរងគ្រោះ ។ ទាំង២នាក់មានទីលំនៅក្នុងភូមិកើតហេតុខាងលើ។
ប្រភពព័ត៌មានពីសមត្ថកិច្ចបានអោយដឹងថា មុនពេលកើតហេតុ ជនសង្ស័យ និងជនរងគ្រោះ ព្រមទាំងបងប្អូន២នាក់ទៀត បានអង្គុយផឹកស៊ីជាមួយគ្នា តាមទម្លាប់បងប្អូនដូចសព្វមួយដង ដោយផឹកបណ្តើរជជែកព្រោកប្រាជ្ញពីនេះពីនោះបណ្តើរ លុះដល់ស្រវឹងរៀងៗខ្លួន ម្នាក់់ៗក៏ចាប់ផ្តើមអួត និងនិយាយច្រើន រហូតធ្វើអោយមានការទាស់សំដីគ្នាកើតឡើង ហើយជនសង្ស័យក៏បានទាញចានថ្មដាក់សាច់ក្លែមគប់ទៅលើជនរងគ្រោះចំចិញ្ចើមខាងឆ្វេង បណ្តាលអោយបែកចិញ្ចើមហូរឈាមពេញខ្លួន ភ្លាមៗនោះក៏មានការឆោឡោឡើង ហើយជនសង្ស័យក៏បានរត់គេចខ្លួនបាត់ ចំណែកជនរងគ្រោះក៏ត្រូវបានក្រុមគ្រួសារនាំទៅព្យាបាលរបួសនៅក្នុងមណ្ឌលសុខភាពឃុំកំពង់សឹង្ហ ។
ពេលសមត្ថកិច្ចទទួលបានព័ត៌មាននេះភ្លាម ក៏បានចុះទៅដល់កន្លែងកើតហេតុ ហើយដកហូតយកម៉ូតូមួយគ្រឿងម៉ាកហុងដា ធុនC125 ស៊េរីឆ្នាំ២០១៧ ពណ៌ខ្មៅ គ្មានស្លាកលេខ ដែលជារបស់ជនសង្ស័យដើម្បីយកទៅរក្សាទុកនៅប៉ុស្តិ៍រដ្ឋបាល និងកសាងសំណុំរឿងចាត់ការទៅតាមនីតិវិធី៕
ចែករំលែកព័តមាននេះ