ប្រទេសកូរ៉េទាំង២ ៖ ដោយដកស្រង់ប្រភពយោធាបណ្ដាសារព័ត៌មានកូរ៉េខាងត្បូងបានរាយការណ៍កាលពីថ្ងៃទី១ ឧសភា ថា កូរ៉េខាងជើងបានដកចេញហើយបណ្ដាប្រដាប់បំពងសំឡេងឃោសនាចេញពីព្រំដែនជាមួយកូរ៉េខាងត្បូង ដូចដែលមានចែងក្នុងសេចក្ដីថ្លែងការណ៍រួមប៉ានមុនហ្សូម ដែលបានប្រកាសក្រោយពីការជួបគ្នាកំពូលអន្តរកូរ៉េកាលពីសប្ដាហ៍មុន។
អ្នកទទួលខុសត្រូវយោធាកូរ៉េខាងត្បូងម្នាក់បានថ្លែងថា បណ្ដាឧបករណ៍ប្រដាប់បំពងសម្លេងត្រូវបានដកចេញពីតំបន់ព្រំដែន។ ចំណែកកងទ័ពកូរ៉េខាងត្បូង ដែលដាក់ប្រដាប់បំពងសំឡេងចល័ត និងមិនចល័តប្រមាណជា៤០នៅតាមព្រំដែននោះក៏ត្រូវបានដកយកចេញដែរ ចាប់ពីម៉ោង២រសៀល ម៉ោងក្នុងស្រុកទៅដែរ។
សារឃោសនាទាំងឡាយរបស់កូរ៉េខាងត្បូងប្រឆាំងកូរ៉េខាងជើងផ្សាយតាមប្រដាប់បំពងសំឡេងទាំងនោះបានបញ្ឈប់តាំងពីថ្ងៃទី២៣ មេសាមក មុនការជួបគ្នាកំពូលអន្តរកូរ៉េ កាលពីថ្ងៃទី២៧ មេសា។ សេចក្ដីថ្លែងការណ៍រួមចុះហត្ថលេខាដោយមេដឹកនាំកូរ៉េទាំង២ បានចែងថា មេដឹកនាំទាំង២យល់ព្រមបញ្ចប់រាល់អំពើប្រទូស្តរ៉ាយ ក្នុងនោះរួមទាំងសារឃោសនា និងការបាចខិត្តប័ណ្ណឃោសនានៅជិតខ្សែបន្ទាត់ព្រំដែនដែលបែងចែករវាងកូរ៉េទាំង២ ចាប់តាំងពីបញ្ចប់សង្គ្រាមកូរ៉េ១៩៥០-១៩៥៣មក។ មេដឹកនាំកូរ៉េទាំង២ ក៏សម្រេចដែរ ក្នុងការប្រែក្លាយតំបន់ព្រំដែនជាតំបន់សន្តិភាពពិតប្រាកដមួយ៕
ចែករំលែកព័តមាននេះ