មិនដែលរៀនពេទ្យសោះ មកតាំងខ្លួនធ្វើជាវេជ្ជបណ្ឌិត
ឥណ្ឌា ៖ តាមប្រភពព័ត៌មាន Oddity Central បានឲ្យដឹងថា យុវជនម្នាក់អាយុ១៩ឆ្នាំ ដែលមិនធ្លាប់បានចូលរៀនពេទ្យ ឬមានចំណេះដឹងខាងវេជ្ជសាស្ត្រសោះ មកតាំងខ្លួនជាវេជ្ជបណ្ឌិត…
ឥណ្ឌា ៖ តាមប្រភពព័ត៌មាន Oddity Central បានឲ្យដឹងថា យុវជនម្នាក់អាយុ១៩ឆ្នាំ ដែលមិនធ្លាប់បានចូលរៀនពេទ្យ ឬមានចំណេះដឹងខាងវេជ្ជសាស្ត្រសោះ មកតាំងខ្លួនជាវេជ្ជបណ្ឌិត ដោយគ្រាន់តែពាក់ម៉ាស និង ប្រដាប់ស្តាប់បេះដូង។ ដោយសារតែមើលទៅដូចមែនទែនពេក វេជ្ជបណ្ឌិតផ្សេងៗទៀត ក៏រាប់អានដោយស្មានតែជាគ្នាឯង។
គ្មាននរណាម្នាក់ដឹងពីមូលហេតុដែល Adnan Khurram សម្រេចចិត្តធ្វើបែបនេះឡើយ។ រូបគេបានតែងខ្លួនធ្វើជាគ្រូពេទ្យនៅវិទ្យាស្ថានវិទ្យាសាស្ត្រវេជ្ជសាស្ត្រនៃប្រទេសឥណ្ឌា បានរយៈពេល៥ខែ ទម្រាំតែមានអ្នកចាប់បាន។ វេជ្ជបណ្ឌិតមែនទែននៅវិទ្យាស្ថាននោះ មិនដឹងទាល់តែសោះថា វាជាការបន្លំភ្នែក ដោយសារតែបុគ្គលម្នាក់នេះចូលរួមគ្រប់កម្មវិធីរបស់វិទ្យាស្ថាន។ សូម្បីតែនៅលើ Instagram របស់ Adnan ក៏ដាក់ឈ្មោះថា ជាវេជ្ជបណ្ឌិតដែរ។
ស្រាប់តែនៅសប្តាហ៍មុននេះ ខាងវិទ្យាស្ថានបានហៅប៉ូលីសឲ្យមកធ្វើការចាប់ខ្លួនសួរនាំបុគ្គលបន្លំខ្លួន Adnan ដោយសារតែមានការសង្ស័យ។ ពួកគេសង្ស័យថា ហេតុអ្វីបានជាបុគ្គលម្នាក់នេះមានពេលទំនេរមកចូលរួមកម្មវិធីច្រើនខុសពីគ្រូពេទ្យដទៃ ដែលពួកគេត្រូវធ្វើការជាច្រើនម៉ោងគ្មានពេលទំនេរ។
នៅពេលប៉ូលិសសួរនាំ Adnan បានប្រាប់ចម្លើយម្តងគោម្តងក្របី។ ដំបូងគេបានថា នេះមកពីគេចង់បង្កើនភាពជិតស្និទ្ធិជាមួយនឹងគ្រូពេទ្យ ដើម្បីយកគ្រួសារមកព្យាបាលបានស្រួលជាធម្មតា។ ក្រោយមកក៏ឆ្លើយថា នេះមកពីរូបគេចង់ក្លាយទៅជាវេជ្ជបណ្ឌិត។ នៅពេលនេះ ប៉ូលិសបានចោទប្រកាន់ពីបទបន្លំអត្តសញ្ញាណ និងឆបោក៕
ចែករំលែកព័តមាននេះ