ខេត្តសៀមរាប ៖ នគរបាលចរាចរណ៍ម្នាក់ជិះម៉ូតូដកកាំភ្លើងបាញ់បោះសេរីជាច្រើនគ្រាប់នៅតាមដងផ្លូវមុខផ្សារកុងតឺន័រ ធ្វើឱ្យប្រជាពលរដ្ឋ និងភ្ញៀវទេសចរកំពុងធ្វើដំណើរឆ្លងការតាមដងផ្លូវសាធារណៈបង្កឱ្យមានការភ្ញាក់ផ្អើលពេញក្រុងសៀមរាប ខណៈពេលនោះត្រូវបានសមត្ថកិច្ចនគរបាលអន្តរាគមន៍ នៃស្នងការនគរបាលខេត្តឃាត់ខ្លួនវាយខ្នោះយកទៅធ្វើការសួរនាំនៅស្នងការដ្ឋាននគរបាលខេត្ត ដើម្បីប្រគល់ឱ្យការិយាល័យជំនាញចាត់ការបន្ត ។
ហេតុការបាញ់បោះសេរីនោះបានកើតឡើងនៅវេលាម៉ោង២១និង២០នាទីយប់ ថ្ងៃទី១១ ខែមីនា ឆ្នាំ២០១៨ ស្ថិតនៅមុខផ្សារកុងតឺន័រ (ស្ដាតចាស់) ក្នុងភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប ។
ជុំវិញករណីខាងលើនោះដែរ លោក ទិត្យ ណារ៉ុង ស្នងការខេត្តសៀមរាប បានប្រាប់នៅថ្ងៃទី១២ ខែមីនា ឆ្នាំ២០១៨ នេះថា ជនបាញ់បោះសេរីជាមន្ត្រីនគរបាលចរាចរណ៍ ដកកាំភ្លើងបាញ់គំរាមមេឃជាច្រើនគ្រាប់នៅផ្សារកុងតឺន័រ (ស្តាតចាស់) ស្ថិតនៅភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប កាលពីយប់ថ្ងៃទី១១ ខែមីនា ឆ្នាំ២០១៨ នោះ លោកបានឱ្យមន្ត្រីជំនាញធ្វើការហើយ ប៉ុន្តែចំណាត់ការចំពោះជនរូបនេះយ៉ាងណានោះ លោកនៅមិនទាន់បានដឹងនៅឡើយទេ ដោយសារលោកជាប់បេសកម្មមកភ្នំពេញ ។
បើតាមប្រភពពីសមត្ថកិច្ចនគរបាលខេត្តសុំមិនបញ្ចេញឈ្មោះ បានឱ្យដឹងថា មន្ត្រីដែលបានបាញ់បោះសេរីនៅម្តុំផ្សារកុងតឺន័រនោះ មានឈ្មោះ តាន់ ភីរម្យ ភេទប្រុស អាយុ៣៥ឆ្នាំ មានមុខងារជាអនុសេនីយ៍ត្រី នគរបាលចរាចរណ៍ផ្លូវគោក នៃខេត្តសៀមរាប ។ ប្រភពបានបន្តថា មន្ត្រីនគរបាលចរាចរណ៍បាញ់បោះសេរីខាងលើបានធ្វើសកម្មភាពបាញ់ និងជិះម៉ូតូម៉ាកស្កូពី បន្ទាប់មកសមត្ថកិច្ចបានឃាត់ខ្លួននៅផ្ទះជនសង្ស័យនៅភូមិឃុំខាងលើ បញ្ជូនទៅសាកសួរនៅប៉ុស្តិ៍រដ្ឋបាលសង្កាត់គោកចក ។
ជុំវិញមជ្ឍដ្ឋាននានាក្នុងខេត្តសៀមរាប បានរិះគន់តៗគ្នាថា បើមន្ត្រីនគរបាលដូចគ្នា ចាប់យកទៅប្រហែលជាមិនមានចំណាត់ការខាងផ្លូវច្បាប់ទេ ព្រោះគ្រាន់តែធ្វើការអប់រំណែនាំបន្តិចបន្តួចប៉ុណ្ណោះ បើអ្នកបាញ់បោះសេរីជាមន្ត្រីយោធា ឬប៉េអឹមវិញ ប្រហែលជាបញ្ជួនទៅតុលាការចាត់ការតាមផ្លូវច្បាប់តាំងពីយប់មិញម្ល៉េះបាត់ហើយ ។
បើតាមលោកវរសេនីយ៍ឯក ជឹម សុវណ្ណ ប្រធានការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្ត បានប្រាប់តាមទូរស័ព្ទនៅវេលាម៉ោង០២និង២៣នាទីរសៀល ថ្ងៃទី១២ ខែមីនា ឆ្នាំ២០១៨ នេះថា ជនដែលបាញ់បោះសេរីនៅតាមដងផ្លូវសាធារណៈនោះ គឺជាមន្ត្រីនគរបាលចរាចរណ៍ខេត្តរបស់ខ្ញុំពិតមែន ។ លោកបានបន្តថា មន្ត្រីរូបនោះត្រូវបានលោកស្នងការ ឱ្យចាត់ការទៅតាមវិន័យរបស់នគរបាលជាតិយើង ប៉ុន្តែត្រូវប្រគល់ទៅឱ្យលោកវរសេនីយ៍ឯក ភឹង ចិន្តារ៉េត ស្នងការស្នងការរងទទួលបន្ទុកកណ្ដាលយុត្តិធម៌ នៃស្នងការដ្ឋាននគរបាលខេត្តសៀមរាប ចាត់ការបន្ត ឬធ្វើយ៉ាងណានៅលើគាត់ជាអ្នកសម្រេច ។
ជុំវិញករណីខាងលើនោះដែរ កោះសន្តិភាពមិនអាចសុំការពន្យល់ពីលោកវរសេនីយ៍ឯក ភឹង ចិន្តារ៉េត ស្នងការស្នងការរងទទួលបន្ទុកកណ្តាលយុត្តិធម៌ នៃស្នងការដ្ឋាននគរបាលខេត្តសៀមរាប បានទេ នៅវេលាម៉ោង០២និង៤២នាទីរសៀលនេះ ព្រោះទូរស័ព្ទចូលគ្មានអ្នកទទួល ៕
ចែករំលែកព័តមាននេះ