ខេត្តកំពង់ធំ ៖ ករណីកូនបង្កើតវាយសម្លាប់ម្តាយនឹងចបជីក ស្លាប់យ៉ាងអណោចអធម៌នេះ បានបង្កឲ្យមានការភ្ញាក់ផ្អើលឡើងកាលវេលាម៉ោង៦និង០០នាទីល្ងាចថ្ងៃទី២៤ ខែកុម្ភៈ ឆ្នាំ២០១៨ ស្ថិតនៅក្នុងភូមិព្រៃភ្លូ ឃុំកំពង់ថ្ម ស្រុកសន្ទុក ខេត្តកំពង់ធំ ។
ប្រភពព័ត៌មានពីសាច់ញាតិបានឲ្យដឹងថា បង្កដោយកូនប្រុសពៅឈ្មោះ នៅ វឹន អាយុ២៨ឆ្នាំ ដែលត្រូវជាកូនបង្កើតរបស់សព ។ ដែលស្ត្រីរងគ្រោះឈ្មោះ ជា ឃីម អាយុ៦២ឆ្នាំ ត្រូវជាម្តាយបង្កើត រស់នៅភូមិ- ឃុំ ស្រុក កើតហេតុខាងលើ ។
ប្រភពដដែលបានឲ្យដឹងទៀតថា ស្ត្រីរងគ្រោះជាស្រីមេម៉ាយមានកូនចំនួន៨នាក់ ប្រុស៦ និងស្រី២នាក់ កូនប្រុសពៅដែលជាឃាតកររូបនេះសង្ស័យបែកថ្នាំញៀន ទើបធ្វើឲ្យរូបគេគ្រប់គ្រងអារម្មណ៍ខ្លួនឯងលែងបាន រហូតមានសតិក៏មិនសូវគ្រប់ ។
នៅមុនពេលកើតហេតុជនសង្ស័យជាកូន និងម្តាយគ្មានទំនាស់អ្វីនឹងគ្នានោះទេ នៅពេលដែលម្តាយដឹកគោយកទៅចងជាមួយនឹងស្នឹងគោដែលបានបោះទុកចងគោនៅពេលយប់នោះ កូនប្រុសពៅរបស់គាត់ឈ្មោះ នៅ វឹន ក៏បានយកចបជីកធ្វើពីដែកបំពុងទីប វាយទៅលើម្តាយរបស់ខ្លួន ដែលកំពុងអង្គុយចងគោ ម្តាយឃើញទាន់ក៏លើកដៃស្តាំរងធ្វើឲ្យបាក់ដៃ រួចហើយក៏ដួលលត់ជង្គង់ ខណៈនោះកូនតិរិច្ឆានរូបនេះ ក៏វាយបន្ថែមចំក្បាលខាងក្រោយប្រហែលជាបួនចបជីកទៀត បណ្តាលឲ្យបែកក្បាលស្លាប់ភ្លាមៗ នៅកន្លែងកើតហេតុ បន្ទាប់មកសាច់ញាតិដែលរស់នៅជិតខាង បានឃើញដែរ តែរកតែរត់ទៅជួយក៏មិនទាន់ដែរ ព្រោះវាលឿនពេក ។
ម្យ៉ាងទៀតដោយសារ តែពេលកើតហេតុចំជាពេលល្ងាចជិតយប់ ត្រូវបានជនរងគ្រោះបិទទ្វាររបង នៅពេលបើកទ្វាររបងចូលបាន វាហួសពេលបាត់ទៅហើយ ម្តាយបានស្លាប់បាត់ក៏នាំគ្នាចាប់ខ្លួនកូនតិរិច្ឆានរូបនេះ ប្រគល់ឲ្យសមត្ថកិច្ចចាត់ការតាមនីតិវិធីច្បាប់ ។
ក្រោយពីធ្វើកោសល្យវិនិច្ច័យរួច សពជនរងគ្រោះត្រូវបានប្រគល់ជូនសាច់ញាតិធ្វើបុណ្យតាមប្រពៃណី ៕
ចែករំលែកព័តមាននេះ