ខេត្តបាត់ដំបង ៖ ជនមិនស្គាល់មុខបានដាក់ថ្នាំពុលសត្វឆ្កែងាប់ចំនួន៣ក្បាលរួចគាស់ទ្វាផ្ទះចូលលួចយកម៉ូតូ១គ្រឿងជិះគេចខ្លួនដោយសុវត្ថិភាព កាលពីវេលាម៉ោងប្រមាណ២រំលងអធ្រាត្រឈានចូលថ្ងៃទី១៣ កុម្ភៈ នៅក្នុងភូមិកំប៉ង់កើត ឃុំកន្ទឺ២ ស្រុកបាណន់ នេះបើតាមសេចក្ដីរាយការណ៍របស់សមត្ថកិច្ច ។
សមត្ថកិច្ចបានឲ្យដឹងថា ម្ចាស់ផ្ទះរងគ្រោះឈ្មោះ បាន សំណាក់ ភេទប្រុស អាយុ៣៥ឆ្នាំ មុខរបរធ្វើស្រែរស់នៅចំណុចខាងលើ ។ ម៉ូតូដែលត្រូវចោរលួចនោះម៉ាកហុងដាC១២៥ ស៊េរីឆ្នាំ២០១៧ ពណ៏ខ្មៅ ពាក់ស្លាកលេខ បាត់ដំបង ១X-៨០៣៣ ។ សមត្ថកិច្ចបានបញ្ជាក់ថា ជនសង្ស័យយ៉ាងតិច៣នាក់បានដាក់ថ្នាំបំពុលសត្វឆ្កែងាប់អស់៣ក្បាលមុនពេលធ្វើសកម្មភាពគាស់ទ្វាផ្ទះចូលលួចយកម៉ូតូ ខណៈម្ចាស់ផ្ទះកំពុងដេកលក់ ។
បើតាមម្ចាស់ផ្ទះបានរាយការណ៍ប្រាប់សមត្ថកិច្ចថា ក្រុមចោរអាចចូលតាមផ្លូវខាងមុខមុនពេលដាក់ថ្នាំបំពុលឆ្កែងាប់អស់៣ក្បាល ។ គាត់និយាយថា ចោរបានគាស់ទ្វាក្រោយចូលលួចយកម៉ូតូ ខណៈគាត់កំពុងដេកលង់លក់ ។
ប៉ុន្តែគាត់បានដឹងពេលព្រឹកឡើងងើបពីដំណេកហើយបាត់ម៉ូតូពីក្នុងផ្ទះ និងឃើញទ្វារបើក ។ លុះដើចេញទៅខាងក្រៅផ្ទះឃើញឆ្កែគាត់ងាប់អស់៣ក្បាលទើបមានការភ្ញាក់ផ្អើល និងរាយការណ៏ប្រាប់សមត្ថកិច្ចតែម្ដងទៅ ។
លោក ប៉ាន់ វាន់នី អធិការស្រុកបាណន់បានប្រាប់ កោះសន្តិភាព តាមទូរស័ព្ទថា សមត្ថកិច្ចបានចុះទៅពិនិត្យកន្លែងកើតហេតុក្រោយពីទទូលបានដំណឹងនេះ ។ ប៉ុន្តែលោកបានបញ្ជាក់ថា រហូតមកដល់ពេលនេះសមត្ថកិច្ចមិនទាន់មានតម្រុយអំពីមុខសញ្ញាក្រុមចោរនេះនៅឡើយទេ ហើយមន្ត្រីជំនាញកំពុងធ្វើការសាកសួរពីប្រភពនានានៅក្នុងមូលដ្ឋាន ៕
ចែករំលែកព័តមាននេះ