ខេត្តតាកែវ ៖ សពអ្នកស្រីចេវ សុវឌ្ឍនា ដែលបានចងកធ្វើអត្តឃាត ត្រូវបានក្រុមគ្រួសារយកទៅធ្វើបុណ្យតាមប្រពៃណីនៅឯលំនៅឋានក្នុងរាជធានីភ្នំពេញ ។ ការចងកធ្វើអត្តឃាតនេះបានបង្កឱ្យមានការភ្ញាក់ផ្អើលហើយក៏មិនអាចនរណាដឹងថា អ្នកស្រីមានវិបត្តិអ្វីដែរ ។
អ្នកស្រីចេវ សុវឌ្ឍនា ជាស្ត្រីដែលមានរូបសម្ផស្សស្រស់ស្អាតនិងជាអ្នកមានជីវភាពធូរធារម្នាក់តែអភ័ព្វរឿងស្នេហាដោយអ្នកស្រីជាស្ត្រីមេមា៉យកូន៣ម្នាក់ ។ អ្នកស្រីបានចងកសម្លាប់ខ្លួននៅផ្ទះជួលធ្វើអាជីវកម្មរបស់ខ្លួនដោយទុកកូន៣នាក់ឲ្យនៅកំព្រាគ្មានម្តាយហៅ ។ ផ្ទះដ៏ស្កឹមស្កៃដែលស្ត្រីរងគ្រោះធ្វើអត្តឃាតនោះ ស្ថិតនៅភូមិផ្សារតាកោរ សង្កាត់រកាក្នុង ក្រុងដូនកែវ ។ អ្នកស្រី ចេវ សុវឌ្ឍនា មានអាយុ៣៦ឆ្នាំ ត្រូវបានអ្នកបម្រើក្នុងផ្ទះប្រទះឃើញចងកស្លាប់ក្នុងបន្ទប់ដេកនៅល្ងាចថ្ងៃទី២៦ មករា ។ អ្នកស្រីគឺជាមន្ត្រីបម្រើការនៅរដ្ឋសភា ហើយក៏ជាសមាជិកមួយរូបនៅក្នុងក្រុមយុវជនគណបក្សប្រជាជនកម្ពុជាលើការងារពង្រីកចលនាយុវជននៅក្រៅប្រទេសផងដែរ ។
ទាក់ទិននឹងករណីនេះលោកអធិកាក្រុងដូនកែវបានឲ្យដឹងថា បើតាមសម្តីអ្នកជិតខាងបានបញ្ជាក់ថា តាមការសង្កេតគេឃើញអ្នកស្រីទៅណាមកណាមិនដែលឃើញមានស្វាមីទៅជាមួយទេ ដូច្នេះក៏សន្និដ្ឋានថាជាស្ត្រីមេម៉ាយតែម្តងទៅ ។ មិត្តភក្តិស្និទ្ធស្នាលរបស់អ្នកស្រី ចេវ សុវឌ្ឍនា បានសម្តែងការសោកស្តាយជាខ្លាំង ព្រោះអ្នកស្រីជាមនុស្សមានទឹកចិត្តល្អ និងតែងជួយរាល់ទុក្ខធុរៈមនុស្សជុំវិញខ្លួនដោយមិនមានការរើសអើងអ្វីឡើយ តែនេះជារឿងនឹកស្មានមិនដល់ ហើយក៏គ្មានអ្វីនិយាយក្រៅពីពាក្យថា ស្តាយៗនោះទេ ។
ក្រោយពីសមត្ថកិច្ចបានពិនិត្យសពរួចរាល់ហើយ សពអ្នកស្រីត្រូវបានប្រគល់ជូនក្រុមគ្រួសារយកមកធ្វើបុណ្យតាមប្រពៃណីនៅផ្ទះក្នុងរាជធានីភ្នំពេញ ។គ្រប់គ្នាមានតែការសោកស្តាយដោយសារមើលឃើញថា អ្នកស្រីមិនមានជីវភាពខ្វះខាតនោះទេ ដោយមានលំនៅឋានស្តុកស្តម្ភនៅក្នុងបុរីឯរាជធានីភ្នំពេញ ចំណែកជីវិតដ៏ស្រស់បំព្រងរបស់អ្នកស្រីពិតជាគេមិនជឿថាជាអ្នកមានវិបត្តិអ្វីរហូតឈានដល់ការបញ្ចប់ជីវិតខ្លួនឯងបែបនេះឡើយ តែបើយោងតាមប្រភពខ្លះថា អ្នកស្រីមានវិបត្តិស្នេហាជាមួយបុរសជាប្តី ។ តាមប្រភពថា មុនពេលធ្វើអត្តឃាតអ្នកស្រីបានទុកលិខិតបណ្តាំមួយផងដែរ ដោយបានបង្ហាញការឈឺចាប់ចំពោះបុរសជាគូជីវិតដែលបានចោទប្រកាន់និងបោះបង់ ។ ប្រភពនោះថា អ្នកស្រីជាភរិយាទី២ផងដែរ ហើយគេមិនដឹងថាបុរសជាប្តីនោះជានរណាឡើយ តែប្រហែលមិនធម្មតានោះឡើយ ៕
ចែករំលែកព័តមាននេះ