សហរដ្ឋអាមេរិក ៖ ប្រធានាធិបតីអាមេរិក លោកដូណាល់ ត្រាំ បានឆ្លើយតបវិញចំពោះមេដឹកនាំកូរ៉េខាងជើង ដែលអះអាងថា ប៊ូតុងនុយក្លេអ៊ែរស្ថិតលើតុរបស់លោកជានិច្ច ។
ក្រោយពីអះអាងថា គឺសកម្មភាពរបស់លោកដែលអាចឱ្យអាកាសចរណ៍ស៊ីវិលជួបប្រទះឆ្នាំដែលមានសន្តិសុខបំផុតក្នុងឆ្នាំ២០១៧ ដែលនាំឱ្យមានការចំអកតាមបណ្តាញសង្គម លោកត្រាំ នាថ្ងៃទី២ មករា បានឆ្លើយតបវិញចំពោះពាក្យពេចន៍របស់សមភាគីកូរ៉េខាងជើងពីអាវុធនុយក្លេអ៊ែរ ។
តាម TWITTER លោកត្រាំ សរសេរថា មេដឹកនាំកូរ៉េខាងជើង លោកគីម ជុងអ៊ុន ទើបនឹងអះអាងថា ប៊ូតុងនុយក្លេអ៊ែរស្ថិតលើតុលោកជាប់ ។ នេះជាសម្តីនៃរបបដ៏ក្រីក្រមួយ ហើយអត់ឃ្លានអាចនិយាយបែបនេះ ចំណែកខ្ញុំវិញមានប៊ូតុងនុយក្លេអ៊ែរមួយដែរ ប៉ុន្តែងវាធំ និងខ្លាំងជាងច្រើនប៊ូតុងនុយក្លេអ៊ែរលោកគីម ជុងអ៊ុន ។
លោកគីម ជុងអ៊ុន ក្នុងសារឆ្នាំថ្មីទៅកាន់ប្រជាជាតិ ឆ្លៀតរំលឹកថា ប្រទេសរបស់លោកជាប្រទេសនុយក្លេអ៊ែរពេញសិទ្ធិមួយ ដោយព្រមានថា លោកមានប៊ូតុងនុយក្លេអ៊ែរលើតុរបស់លោកជាប់ ។ មេដឹកនាំកូរ៉េខាងជើង ទន្ទឹមនឹងនេះក៏ពោលបើកចំហចំពោះកូរ៉េខាងត្បូងដែរ ដោយអះអាងថា ក្រុងព្យុងយ៉ាងអាចចូលរួមក្នុងការប្រកួតកីឡាអូឡាំពិករដូវរងានៅកូរ៉េខាងត្បូង ។ ក្រុងសេអ៊ូលស្វាគមន៍ភ្លាមៗ ហើយនាថ្ងៃទី២ មករា ស្នើឱ្យមានការចរចាគ្នាកម្រិតខ្ពស់មួយជាមួយក្រុងព្យុងយ៉ាងចាប់ពីថ្ងៃទី៩ មករា ទៅ ។
ក្រុងវ៉ាស៊ីនតោននាថ្ងៃទី២ មករា បដិសេធទស្សនវិស័យនៃការចរចាមួយរវាងកូរ៉េខាងជើង និងកូរ៉េខាងត្បូង ប្រសិនបើការចរចានេះពុំផ្តោតលើបញ្ហានុយក្លេអ៊ែរទេនោះ ។
ក្រុងព្យុងយ៉ាងប្រកាសនាថ្ងៃទី៣ មករា ថា ខ្លួននឹងភ្ជាប់ឡើងវិញទូរស័ព្ទក្រហមជាមួយក្រុងសេអ៊ូលក្រោយការអំពាវនាវរបស់លោកគីម ជុងអ៊ុន កែលម្អទំនាក់ទំនងអន្តរកូរ៉េ ៕
ចែករំលែកព័តមាននេះ