រាជធានីភ្នំពេញ ៖ កាលពីវេលាម៉ោង៩ព្រឹក ថ្ងៃទី២៨ មេសា ឆ្នាំ២០១១ សម្តេចអគ្គមហាពញាចក្រី ហេង សំរិន ប្រធានរដ្ឋសភា បានអនុញ្ញាតឲ្យលោកអ៊ូ ចូលទុនអូន ឯកអគ្គរដ្ឋទូតនៃសហភាពមីយ៉ាន់ម៉ា ចូលជួបសម្ដែងការគួរសម និងធ្វើសវនាការនៅវិមានរដ្ឋសភា បន្ទាប់ពីលោកត្រូវបានតែងតាំងជាឯកអគ្គរដ្ឋទូតវិសាមញ្ញ
រាជធានីភ្នំពេញ ៖ កាលពីវេលាម៉ោង៩ព្រឹក ថ្ងៃទី២៨ មេសា ឆ្នាំ២០១១ សម្តេចអគ្គមហាពញាចក្រី ហេង សំរិន ប្រធានរដ្ឋសភា បានអនុញ្ញាតឲ្យលោកអ៊ូ ចូលទុនអូន ឯកអគ្គរដ្ឋទូតនៃសហភាពមីយ៉ាន់ម៉ា ចូលជួបសម្ដែងការគួរសម និងធ្វើសវនាការនៅវិមានរដ្ឋសភា បន្ទាប់ពីលោកត្រូវបានតែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាពនៃសហភាពមីយ៉ាន់ម៉ាប្រចាំព្រះរាជាណាចក្រកម្ពុជា កាលពីថ្ងៃទី២២ មីនា ឆ្នាំ២០១១ កន្លងមក។
សម្តេចអគ្គមហាពញាចក្រី ហេង សំរិន បានមានប្រសាសន៍ថា ក្នុងនាមរដ្ឋសភានៃព្រះរាជាណាចក្រកម្ពុជា និងក្នុងនាមសម្តេចផ្ទាល់ សូមសម្ដែងនូវការស្វាគមន៍យ៉ាងកក់ក្តៅបំផុតចំពោះលោកឯកអគ្គរដ្ឋទូតនៃសហភាពមីយ៉ាន់ម៉ាដែលត្រូវបានតែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាពនៃសហភាពមីយ៉ាន់ម៉ាប្រចាំព្រះរាជាណាចក្រកម្ពុជា ដែលបានឆ្លៀតឱកាសដ៏មមាញឹកចូលជួបសម្ដែងការគួរសមចំពោះសម្តេចផ្ទាល់នាពេលនេះ បន្ទាប់ពីលោកបានថ្វាយសារតាំងចំពោះព្រះមហាក្សត្រនៃព្រះរាជាណាចក្រកម្ពុជា កាលពីថ្ងៃទី២២ មីនា ឆ្នាំ២០១១ កន្លងមក។ សម្តេចពញាចក្រីមានប្រសាសន៍បន្តទៀតថា «ខ្ញុំមានជំនឿយ៉ាងមុតមាំថា តាមរយៈសកម្មភាពការទូតដ៏ឧត្តុង្គឧត្តម្ភរបស់លោកនៅព្រះរាជាណាចក្រកម្ពុជា ទំនាក់ទំនងការទូតក៏ដូចជាកិច្ចសហប្រតិបត្តិការទ្វេភាគីរវាងប្រទេសទាំងពីរ នឹងត្រូវបានពង្រឹងពង្រីកឲ្យកាន់តែប្រសើរឡើងថែមទៀត»។
សម្តេចអគ្គមហាពញាចក្រី ហេង សំរិន មានប្រសាសន៍ជម្រាបភ្ញៀវទៀតថា ជារួមក្រោយពេលដែលប្រទេសកម្ពុជា មានសន្តិសុខពេញលេញក៏មានឱកាសអភិឌ្ឍន៍ប្រទេសលើគ្រប់វិស័យដែលប្រការនេះបានញ៉ាំងឲ្យកិត្យានុភាពរបស់កម្ពុជាល្បីរន្ទឺលើឆាកអន្តរជាតិ។ សម្តេចប្រធានរដ្ឋសភាមានប្រសាសន៍បន្តថា «តែកម្ពុជាត្រូវរងគ្រោះដោយការឈ្លានពានទាំងកំរោលពីសំណាក់ពួកសៀមនៅតំបន់ប្រាសាទព្រះវិហារជាច្រើនលើក និងថ្មីៗនេះគឺនៅតំបន់ប្រាសាទតាមាន់ធំ និងប្រាសាទតាក្របី។ ពួកគេបានគូសផែនទីជាឯកតោភាគី ហើយទន្ទ្រានកាន់កាប់»។ ជំហរកម្ពុជាអត់ធ្មត់ណាស់ តែប្តេជ្ញាការពារអធិបតេយ្យភាពបូរណភាពទឹកដីមិនឲ្យបាត់បង់មួយចំអាមឡើយ។កម្ពុជាគោរពធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងច្បាប់អន្តរជាតិនានា។ ពួកគេខំគេចវេះពីការចរចាទាំងឡាយណា ដែលមានភាគីទី៣ដឹងឮតាមរបៀបបិទទ្វារវាយខ្មែរមិនឲ្យអន្តរជាតិដឹង។ «ពួកថៃឈ្លានពានកម្ពុជា តែខំបំភាន់អន្តរជាតិថា កម្ពុជាឈ្លានពានថៃទៅវិញ»។
លោកអ៊ូ ចូលទុនអូន ឯកអគ្គរដ្ឋទូតនៃសហភាពមីយ៉ាន់ម៉ា បានមានប្រសាសន៍ជម្រាបសម្តេចប្រធានរដ្ឋសភាថា ភូមាក៏មានបញ្ហាព្រំដែនជាមួយប្រទេសថៃដែរ តែដោយការខិតខំប្រឹងប្រែងដោះស្រាយដោយសន្តិវិធីក៏មានការដោះស្រាយរួច។ លោកបានបន្តថា ភូមាទើបតែមានរដ្ឋាភិបាលថ្មី បន្ទាប់ពីការបោះឆ្នោតកាលពីខែវិច្ឆិកា ២០១០ កន្លងទៅ។ ប្រទេសភូមាបានធ្វើការកែទម្រង់ទៅរកសភាពប្រជាធិតេយ្យដោយមានការកែទម្រង់រដ្ឋាភិបាល និងប្រព័ន្ធតុលាការ។ ភូមា និងកម្ពុជាមានទំនាក់ទំនងការទូតតាំងពីឆ្នាំ១៩៥៥ តែត្រូវបានកាត់ផ្តាច់នៅឆ្នាំ១៩៧៥ ហើយទំនាក់ទំនងនេះ បានភ្ជាប់ឡើងវិញ នៅថ្ងៃទី១៦ កុម្ភៈ ឆ្នាំ១៩៩៤៕
ចែករំលែកព័តមាននេះ