រាជធានីភ្នំពេញ ៖ ថៅកែសិប្បកម្មផលិតសាឡុងមួយកន្លែង បានប្រើឲ្យកម្មករដុតសំរាមនៅក្បែររោងស្តុកសាឡុងនិងឈើឆ្អឹងសាឡុង ហើយខណៈភ្លើងកំពុងឆេះសំរាមខ្លាំង ក៏មានខ្យល់បក់មកខ្លាំងដែរ ។ ដែលជាហេតុធ្វើឲ្យកម្ទេចផ្កាភ្លើងហើរធ្លាក់ចូលទៅក្នុងរោងនោះ បណ្ដាលឲ្យឆាបឆេះសាឡុងនិងឈើឆ្អឹងសាឡុងសន្ធោសន្ធៅ ប៉ុន្តែត្រូវបានរថយន្តពន្លត់អគ្គិភ័យ…
រាជធានីភ្នំពេញ ៖ ថៅកែសិប្បកម្មផលិតសាឡុងមួយកន្លែង បានប្រើឲ្យកម្មករដុតសំរាមនៅក្បែររោងស្តុកសាឡុងនិងឈើឆ្អឹងសាឡុង ហើយខណៈភ្លើងកំពុងឆេះសំរាមខ្លាំង ក៏មានខ្យល់បក់មកខ្លាំងដែរ ។ ដែលជាហេតុធ្វើឲ្យកម្ទេចផ្កាភ្លើងហើរធ្លាក់ចូលទៅក្នុងរោងនោះ បណ្ដាលឲ្យឆាបឆេះសាឡុងនិងឈើឆ្អឹងសាឡុងសន្ធោសន្ធៅ ប៉ុន្តែត្រូវបានរថយន្តពន្លត់អគ្គិភ័យ ចេញអន្តរាគមន៍ពន្លត់ទាន់ពេល ។
ហេតុការណ៍ខាងលើនោះ បានកើតឡើងបង្កឲ្យមានការភ្ញាក់ផ្អើល កាលពីវេលាម៉ោង៩និង៤៥នាទីព្រឹកថ្ងៃទី២៣ ខែវិច្ឆិកា ឆ្នាំ២០២៤ នៅក្នុងសិប្បកម្មផលិតសាឡុងមួយកន្លែង ដែលមានទីតាំងស្ថិតក្នុងភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
សមត្ថកិច្ចបានប្រាប់ឲ្យដឹងថា គ្រោះអគ្គិភ័យខាងលើនោះ បានកើតឡើងដោយសារតែការធ្វេសប្រហែស ឬក៏មកពីការមិនបានគិតឲ្យបានដិតដល់ក៏អាចថាបានដែរ ដោយនៅមុនពេលកើតហេតុ ថៅកែសិប្បកម្មបានប្រើឲ្យកម្មករប្រមូលសំរាមដុតចោល ។
ចំណែកសំរាមដែលត្រូវដុតចោលនោះមានដូចជាកម្ទេចឈើរួមនិងកាកសំណល់ផ្សេងៗជាច្រើនទៀត ។ ការដុតនេះមិនបានប្រមូលយកទៅដុតឲ្យឆ្ងាយពីរោងរោងស្តុកសាឡុង និងឈើឆ្អឹងសម្រាប់ផលិតសាឡុងដែលងាយនិងឆេះនោះទេ ។
សមត្ថកិច្ចបានប្រាប់ឲ្យដឹងបន្តទៀតថា ខណៈពេលភ្លើងកំពុងឆេះសំរាមខ្លាំង ក៏ស្រាប់តែមានខ្យល់បក់មកខ្លាំងដែរ ដែលជាហេតុធ្វើឲ្យកម្ទេចផ្កាភ្លើងហើរធ្លាក់ចូលទៅក្នុងរោងនោះ បណ្ដាលឲ្យឆាបឆេះសាឡុងនិងឈើឆ្អឹងសម្រាប់ផលិតសាឡុងសន្ធោសន្ធៅយ៉ាងឆាប់រហ័សតែម្ដង ។ ពេលនោះដែរបានបង្កឲ្យមានការភ្ញាក់ផ្អើលឆោឡោ ហើយទាំងថៅកែនិងកម្មករ បាននាំគ្នាតទុយោបាញ់ទឹក និងដងទឹកជះ ព្រមទាំងប្រើបំពង់ពន្លត់អគ្គិភ័យច្រើនបំពង់បាញ់ពន្លត់ញាប់ដៃញាប់ជើង ប៉ុន្តែភ្លើងមិនបានរលត់នោះឡើយ ។
សមត្ថកិច្ចខាងលើ បានបញ្ជាក់ប្រាប់ឲ្យដឹងបន្ថែមទៀតថាខណៈពេលមានហេតុការណ៍បែបនេះកើតឡើង អាជ្ញាធរនិងសមត្ថកិច្ច ខណ្ឌពោធិ៍សែនជ័យ និងសង្កាត់កាកាបទី២ បានចេញទៅអន្តរាគមន៍ភ្លាមៗ និងបានរាយការទៅកាន់ក្រុមអ្នកពន្លត់អគ្គិភ័យជាបន្ទាន់ ។ មួយសន្ទុះក្រោយមកមានរថយន្តពន្លត់អគ្គិភ័យចំនួន៤គ្រឿងបានទៅដល់ទីនោះជាបន្តបន្ទាប់ ហើយក្រុមអ្នកពន្លត់ភ្លើងបានបាញ់ទឹកអស់៣រថយន្ត ទើបភ្លើងរលត់ទៅវិញទាំងស្រុង ។
ភ្លើងពុំបានឆេះរាលពេញក្នុងសិប្បកម្មទាំងមូលឡើយ ដោយឆេះត្រឹមតែរោងស្តុកនោះប៉ុណ្ណោះ ហើយបង្កការខូចខាតសាឡុង និងឈើឆ្អឹងសម្រាប់ផលិតសាឡុងមួយចំនួន តែពុំបានបណ្ដាលឲ្យមានមនុស្សណាម្នាក់រងរបួសនោះឡើយ ៕
ចែករំលែកព័តមាននេះ