រាជធានីភ្នំពេញ ៖ រដ្ឋសភានៃព្រះរាជាណាចក្រកម្ពុជាបានកំណត់យកថ្ងៃទី៦ កក្កដា ដើម្បីអនុម័តលើសេចក្តីព្រាងច្បាប់ស្តីពីភតិសន្យាពិសេស ហៅច្បាប់ការជួលផ្ទះ បន្ទាប់ពីគណៈកម្មាធិការអចិន្ត្រៃយ៍សម្រេចដាក់បញ្ចូលក្នុងរបៀបវារៈរួចហើយនៅថ្ងៃទី៣ កក្កដា
រាជធានីភ្នំពេញ ៖ រដ្ឋសភានៃព្រះរាជាណាចក្រកម្ពុជាបានកំណត់យកថ្ងៃទី៦ កក្កដា ដើម្បីអនុម័តលើសេចក្តីព្រាងច្បាប់ស្តីពីភតិសន្យាពិសេស ហៅច្បាប់ការជួលផ្ទះ បន្ទាប់ពីគណៈកម្មាធិការអចិន្ត្រៃយ៍សម្រេចដាក់បញ្ចូលក្នុងរបៀបវារៈរួចហើយនៅថ្ងៃទី៣ កក្កដា ។
យោងតាមគេហទំព័ររបស់រដ្ឋសភាឲ្យដឹងថាលោកប៉ែន បញ្ញា ប្រធានគណៈកម្មការនីតិកម្មនិងយុត្តិធម៌នៃរដ្ឋសភា បានពិនិត្យសិក្សា និងរៀបចំតាក់តែងសេចក្តីស្នើច្បាប់ស្តីពីភតិសន្យាពិសេសនេះ កាលពីថ្ងៃទី២ កក្កដា និងលើកឡើងថា ស្របតាមស្មារតីរដ្ឋធម្មនុញ្ញនៃព្រះរាជាណាចក្រកម្ពុជា ពិសេសសិទ្ធិមានលំនៅឋាន សំដៅរួមចំណែកដោះស្រាយបញ្ហាសង្គម រួមមាន ការលំបាក និងសំណូមពររបស់កម្មករ សិស្ស-និស្សិតដែលស្នាក់នៅបន្ទប់ជួល ក៏ដូចជាម្ចាស់អចលនទ្រព្យ ហើយក៏ជាការឆ្លើយតបទៅនឹងការពង្រឹងនីតិរដ្ឋ ដើម្បីស្ថិរភាពក្នុងជីវភាពរស់នៅរបស់ប្រជាពលរដ្ឋ សណ្តាប់ធ្នាប់ និងរបៀបរៀបរយសាធារណៈ និងផ្អែកទៅលើស្ថានភាពជាក់ស្តែងផងដែរ ។
លោកបញ្ជាក់ថា សេចក្តីស្នើច្បាប់នេះ មានគោលបំណងគ្រប់គ្រងបន្ទប់ជួល និងទំនាក់ទំនងរវាងកម្មករ សិស្ស-និស្សិតជាមួយនឹងម្ចាស់ផ្ទះដែលមានបន្ទប់ជួលស្នាក់នៅឱ្យមានលក្ខណៈរៀបរយ ព្រមទាំងជួយដោះស្រាយសំណូមពររបស់កម្មករ សិស្ស-និស្សិតទាក់ទងនឹងតម្លៃបន្ទប់ជួល សមស្របនឹងប្រាក់កម្រៃគោលប្រចាំខែទាប ដែលកម្រិតកំណត់ដោយអនុក្រឹត្យ និងការពារផលប្រយោជន៍ស្របច្បាប់របស់ភតិបតី (ម្ចាស់ផ្ទះដែលមានបន្ទប់ជួល) ។
លោកសង្កត់ធ្ងន់ថា សេចក្តីស្នើច្បាប់ស្ដីពីភតិសន្យាពិសេសនេះ ជាមូលដ្ឋានគតិយុត្តជាក់លាក់មួយនៅក្នុងប្រព័ន្ធនីតិរបស់កម្ពុជាបន្ថែមលើក្រមរដ្ឋប្បវេណីស្តីពីភតិសន្យា ដែលត្រូវយកមកអនុវត្តនៅក្នុងករណីនៃកិច្ចសន្យាជួល ។ សេចក្តីស្នើច្បាប់ភតិសន្យាពិសេសមាន៤ជំពូក ចែកចេញ១១មាត្រា ៕
ចែករំលែកព័តមាននេះ