ខេត្តពោធិ៍សាត់ ៖ គ្រូពេទ្យស្ទើរភ្លើងជនជាតិចិនម្នាក់ ដែលបើកគ្លីនិកគ្មានច្បាប់អនុញ្ញាត នៅក្នុងក្រុងពោធិ៍សាត់ ជាច្រើនឆ្នាំមកហើយនោះ ឥឡូវនេះបានវេចបង្វេច បាយ បាយ
ខេត្តពោធិ៍សាត់ ៖ គ្រូពេទ្យស្ទើរភ្លើងជនជាតិចិនម្នាក់ ដែលបើកគ្លីនិកគ្មានច្បាប់អនុញ្ញាត នៅក្នុងក្រុងពោធិ៍សាត់ ជាច្រើនឆ្នាំមកហើយនោះ ឥឡូវនេះបានវេចបង្វេច បាយ បាយ គេចខ្លួនបាត់ស្រម៉ោល បន្ទាប់ពីព្យាបាលវះកាត់ គីសដៃស្បូនស្ត្រីម្នាក់ បណ្ដាលឲ្យស្លាប់ ។ ករណីនេះបានកើតឡើងកាលពីថ្ងៃទី១៩ ខែមករា ឆ្នាំ២០១៥ នៅក្នុងគ្លីនិកផ្ទះល្វែងជួលរបស់គ្រូពេទ្យចិនរូបនោះ ដែលមានទីតាំងនៅទល់មុខសណ្ឋាគារ KM ស្ថិតក្នុងភូមិពាលញែក១សង្កាត់ផ្ទះព្រៃ ក្រុងពោធិ៍សាត់ ។
សមត្ថកិច្ចឲ្យដឹងថា គ្រូពេទ្យគ្មានបទពិសោធន៍ច្បាស់លាស់នេះ ឈ្មោះវ៉ាន់ ចាន់ជូ ភេទប្រុស អាយុ៥២ឆ្នាំ មានស្រុកកំណើតនៅខេត្តហេណាន ប្រទេសចិន ចេះនិយាយភាសារខ្មែរបន្តិចបន្តួច ហើយបានមកបើកគ្លីនិក ព្យាបាលអ្នកជំងឺ នៅក្នុងក្រុងពោធិ៍សាត់នេះ ប្រមាណពី៤ ទៅ៥ឆ្នាំ មកហើយតែគ្មានច្បាប់ អនុញ្ញាតនោះទេ ។ ចំណែកស្ត្រីរងគ្រោះឈ្មោះស៊ឹង ចាន់ធឿន អាយុ៣២ឆ្នាំ មានកូនស្រី៤នាក់ រស់នៅភូមិសាន្ត ស ឃុំអន្សារចំបក់ ស្រុកក្រគរ ។
តាមការផ្ដល់ព័ត៌មានពីបុរសជាប្តីឈ្មោះប៉ៃ សារ៉េត អាយុ៣៣ឆ្នាំ បានឲ្យដឹងថា ប្រពន្ធរបស់គាត់ បានថតអេកូមើលឃើញមានដុំគីសដៃស្បូន ក៍យកមកព្យាបាលនៅគ្លីនិកឯកជន របស់គ្រូពេទ្យចិននេះ កាលពីព្រឹកថ្ងៃទី១៩ ខែមករា ។ នៅវេលាម៉ោង១៥រសៀល គ្រូពេទ្យចិនរូបនេះ បានចាប់ផ្ដើមធ្វើការវះកាត់អស់រយះពេលជាងពីរម៉ោងទើបរួចរាល់ ។ លុះដល់ម៉ោង២១ និង៤០នាទីយប់ ស្រាប់តែប្រពន្ធរបស់គាត់ដាច់ខ្យល់ស្លាប់ ធ្វើឲ្យគាត់ និងកូនៗស្រែកយំផ្អើលទាំងយប់ ។ ពេលនោះគាត់បានទូរស័ព្ទប្ដឹងទៅសមត្ថកិច្ច នៅឯស្រុកក្រគរ ព្រោះមិនស្គាល់សមត្ថកិច្ច នៅក្នុងក្រុងពោធិ៍សាត់ទេ ។ ភ្លាមៗនោះ សមត្ថកិច្ចបានមកដល់ ប៉ុន្តែរវល់តែពិនិត្យមើល សាកសពប្រពន្ធរបស់គាត់ ដែលមានមនុស្សអ៊ូអរនោះ ស្រាប់តែគ្រូពេទ្យចិនរូបនោះ លួចរត់គេចខ្លួនបាត់តែម្ដង ។
នៅព្រឹកថ្ងៃទី២០ ខែមករា លោកប៉ង់ ចាន់សុយុទ្ធារ៉ា ព្រះរាជអាជ្ញារង លោកវេជ្ជបណ្ឌិតច័ន្ទ សុខា ប្រធានមន្ទីរពេទ្យបង្អែកខេត្ត និងកម្លាំងសមត្ថកិច្ចមួយចំនួនទៀត បានចុះទៅពិនិត្យសាកសពជាថ្មី បានបញ្ជាក់ថា គ្រូពេទ្យចិនរូបនេះ គ្មានបទពិសោធន៍ និងជំនាញច្បាស់លាស់ទេ វះកាត់ធ្វើឲ្យឈាមកកក្នុងខ្លួន ទើបបណ្ដាលឲ្យស្ត្រីខាងលើស្លាប់បែបនេះ ។ សមត្ថកិច្ចបានសម្រេចបិទគ្លីនិកនោះទាំងស្រុងហើយ ដាក់បណ្ដាញតាមចាប់គ្រូពេទ្យជនជាតិចិននោះឲ្យបាន ដើម្បីយកមកផ្ដន្ទាទោសតាមច្បាប់ ។ ចំណែកសម្ភារពេទ្យនៅក្នុងគ្លីនិកនោះ បានរឹបអូសយកទៅប្រគល់ឲ្យមន្ទីរពេទ្យបង្អែកខេត្ត សម្រាប់ព្យាបាលអ្នកជំងឺ ៕
ចែករំលែកព័តមាននេះ