ជនសង្ស័យ២នាក់ ម្នាក់ជាជនជាតិអង់គ្លេស ត្រូវសមត្ថកិច្ចចាប់ខ្លួនពីបទចែកចាយគ្រឿងញៀ.ន
ខេត្តព្រះសីហនុ ៖ ជនសង្ស័យ២នាក់ដែលជាប់ពាក់ព័ន្ធទៅនឹងការរក្សាទុកចែកចាយថ្នាំញៀន ត្រូវកម្លាំងជំនាញនៃការិយាល័យ
ខេត្តព្រះសីហនុ ៖ ជនសង្ស័យ២នាក់ដែលជាប់ពាក់ព័ន្ធទៅនឹងការរក្សាទុកចែកចាយថ្នាំញៀន ត្រូវកម្លាំងជំនាញនៃការិយាល័យប្រឆាំងគ្រឿងញៀននៃទីបញ្ជាការកងរាជអាវុធខេត្តព្រះសីហនុ ធ្វើការឃាត់ខ្លួនកាលពីវេលាម៉ោង០៩ និង២០នាទីព្រឹកថ្ងៃទី១០ មករា ២០១៥ ត្រង់ចំណុចផ្ទះជួលយីហោ «ផៅវើរ ហៅស៍» ស្ថិតនៅក្រុមទី៨ ក្នុងភូមិ៣ សង្កាត់លេខ៤ ក្រុងព្រះសីហនុ ។
លោកវរសេនីយ៍ទោ កែវ សុផល ប្រធានមន្ទីរស្រាវជ្រាវ និងយុត្តិធម៏នៃទីបញ្ជាការកងរាជអាវុធខេត្តព្រះសីហនុបានឱ្យថា ការចាប់ខ្លួនជនសង្ស័យនេះ ត្រូវធ្វើឡើងបន្ទាប់ពីកម្លាំងរបស់លោកធ្វើការស៊ើបអង្កេតអស់ជាច្រើនសប្តាហ៍កន្លងមក ប៉ុន្តែកាលនោះដោយពុំទាន់មានវត្ថុតាងច្បាស់លាស់ ទើបសមត្ថកិច្ចពុំបានចាប់ខ្លួន ។ លុះរហូតដល់វេលាម៉ោង០៩ និង២០នាទីព្រឹកថ្ងៃទី១០ មករា ២០១៥ ពេលជនសង្ស័យកំពុងធ្វើសកម្មភាពចែកចាយ ទើបកម្លាំងរបស់លោកចុះធ្វើការឃាត់ខ្លួនតែម្តង ។
ជនសង្ស័យទាំង២នាក់ ០១-ឈ្មោះ REDER DAVID ភេទប្រុស អាយុ៧០ឆ្នាំ ជនជាតិអង់គ្លេស បច្ចុប្បន្នស្នាក់នៅផ្ទះជួលយីហោ ផៅវើរហៅស៍ ស្ថិតក្នុងក្រុមទី៨ ភូមិ៣ សង្កាត់លេខ០៤ ក្រុងព្រះសីហនុ (ពីបទចែកចាយគ្រឿងញៀន) ០២-ឈ្មោះលឹម សារ៉ន ភេទស្រីអាយុ៣៤ឆ្នាំ មានទីលំនៅក្នុងក្រុមទី៨ ភូមិ៣ សង្កាត់លេខ៤ ក្រុងព្រះសីហនុ (ពីបទចែកចាយគ្រឿងញៀន) ។
ប្រភពបន្តថា ក្នុងយុទ្ធនាការចុះបង្ក្រាបនេះដែរ សមត្ថកិច្ចបានរកឃើញនូវវត្ថុតាងមួយចំនួនរួមមានថ្នាំញៀនមេតំហ្វេតាមីន ចំនួន៤កញ្ចប់ធំ, ដបសម្រាប់ជក់១, ដែកកេះចំនួន៧, ម៉ូតូចំនួន១គ្រឿង, ទូរស័ព្ទដៃ២គ្រឿង, ថង់ច្រកថ្នាំមួយចំនួន និងកង់១ ។ បច្ចុប្បន្នជនសង្ស័យទាំង២នាក់ រួមជាមួយវត្ថុតាង កំពុងត្រូវកម្លាំងសមត្ថកិច្ចធ្វើការសាកសួរ និងកសាងសំណុំរឿងបញ្ជូនទៅកាន់សាលាដំបូងខេត្តព្រះសីហនុចាត់ការតាមនិតិវិធី ។
ចែករំលែកព័តមាននេះ