រាជធានីភ្នំពេញ ៖ កាលពីថ្ងៃទី១៧ ធ្នូ ម្សិលម្ងៃ៉ម្ចាស់មេដាយមាសផ្នែកប៉េតង់លំដាប់ពិភពលោករបស់កម្ពុជា កីឡាការិនី កែ ឡេង រកបានមេដាយមាសទី៥ឲ្យកម្ពុជា ក្នុងព្រឹត្តិការណ៍កីឡាស៊ីហ្គេមនៅមីយ៉ាន់ម៉ា ។ ប៉ុន្តែមេដាយមាសដែលអ្នកស្រីដណ្ដើមបានត្រូវគេអះអាងថា បានដោយលំបាកបំផុតក្នុងការប្រកួតប្រជែងនោះ ។
រាជធានីភ្នំពេញ ៖ កាលពីថ្ងៃទី១៧ ធ្នូ ម្សិលម្ងៃ៉ម្ចាស់មេដាយមាសផ្នែកប៉េតង់លំដាប់ពិភពលោករបស់កម្ពុជា កីឡាការិនី កែ ឡេង រកបានមេដាយមាសទី៥ឲ្យកម្ពុជា ក្នុងព្រឹត្តិការណ៍កីឡាស៊ីហ្គេមនៅមីយ៉ាន់ម៉ា ។ ប៉ុន្តែមេដាយមាសដែលអ្នកស្រីដណ្ដើមបានត្រូវគេអះអាងថា បានដោយលំបាកបំផុតក្នុងការប្រកួតប្រជែងនោះ ។
ក្រោយការអះអាងថា ប្រទេសមីយ៉ាន់ម៉ា បានដើរខ្សែលើកីឡាករ និងកីឡាការិនីកម្ពុជា រយៈប៉ុន្មានថ្ងៃនេះគឺមានតែការប្រកួតប៉េតង់ របស់អ្នកស្រីកែ ឡេង ដែលជាម្ចាស់មេដាយមាសលំដាប់ថ្នាក់ពិភពលោករបស់កម្ពុជាម្នាក់នេះប៉ុណ្ណោះ ដែលអាចទទួលបានមេដាយមាសដូចការគ្រោងទុក ។ ប៉ុន្តែបើធៀបនឹងការប្រកួតដែលអ្នកស្រីធ្លាប់លេចមុខលើឆាកអន្តរជាតិកន្លងមកគឺមានភាពលំបាកជាងដោយសារតែក្នុងការប្រកួតដែលបានធ្វើឡើងនៅក្នុងប្រទេសមីយ៉ាន់ម៉ាហាក់រៀបចំនូវការចាប់កំហុសចំពោះកីឡាករកម្ពុជាច្រើនជាងគ្រប់ពេលដែលកីឡាករ និងកីឡាការិនីរបស់កម្ពុជាបានប៉ះជាមួយកីឡាករ-កីឡាការិនីម្ចាស់ផ្ទះមីយ៉ាន់ម៉ា ។ ប៉ុន្តែចាត់ទុកថា ជាភ័ព្វសំណាងដែលអ្នកស្រីកែ ឡេង មិនប៉ះជាមួយប្រទេសមីយ៉ាន់ម៉ាតាំងពីវគ្គដណ្ដើមមេដាយប្រាក់រហូតដល់វគ្គដណ្ដើមមេដាយមាសចុងក្រោយ ។ ការអះអាងថា មានភាពលំបាកនេះគឺដោយសារតែកីឡាករ និងកីឡាការិនីផ្នែកប៉េតង់ជាច្រើនរបស់កម្ពុជាបានទទួលបរាជ័យផ្ទួនៗជាប់ៗគ្នា ដោយសារតែបានប៉ះជាមួយដៃគូខ្លាំងផង និងមួយផ្នែកបានទទួលភាពលម្អៀងពីសំណាក់ប្រទេសជាម្ចាស់ផ្ទះផងធ្វើឲ្យរបូតមេដាយមាសស្ទើរគ្រប់វិញ្ញាសា ។
តាមការផ្សាយបន្តផ្ទាល់ក្នុងពេលប្រកួតប៉េតង់ កីឡាករកម្ពុជាមិនសំណាងនោះទេដោយសារតែសម្ពាធទាំងនោះ អីុចឹងហើយទើបសូម្បីតែអ្នកគាំទ្រកម្ពុជាភាគច្រើនក៏បុកពោះដូចគ្នាប្រសិនបើអ្នកស្រីកែ ឡេង មិនអាចឈ្នះមេដាយមាសក្នុងការប្រកួតលើកនេះ ។ បើទោះជាក្នុងពេលប្រកួតអ្នកស្រីបានគេចផុតជំនួបប៉ះគ្នាជាមួយម្ចាស់ផ្ទះ ប៉ុន្តែអ្នកស្រីក៏រងសម្ពាធមិនតិចដែរដោយសារតែអ្នកស្រី ត្រូវប្រកួតជាមួយកីឡាការិនីប្រទេសថៃដែលជាជើងខ្លាំងលំដាប់ថ្នាក់ពិភពលោកមួយរូបដែរខាងផ្នែកប៉េតង់ ។ លទ្ធផលប្រកួតរបស់អ្នកទាំងពីរត្រូវគេមើលឃើញប្រកៀកប្រកិតគ្នានៅដើមទី ។ លទ្ធផលនេះមិនខុសពីរឿងចុះទឹកក្រពើឡើងលើខ្លានោះទេ ខណៈដែលក្រុមអ្នកតាមដាននិយាយថា ជំនួបរបស់អ្នកស្រីកែ ឡេង ជាមួយមីយ៉ាន់ម៉ា និងថៃ គឺសុទ្ធតែរងសម្ពាធមិនខុសគ្នា។ ទោះយ៉ាងណា អ្នកស្រីកែ ឡេង ដែលធ្លាប់ឈ្នះមេដាយមាស និងប្រាក់រាប់មិនអស់ក្នុងការប្រកួតលើឆាកអន្តរជាតិទាំងក្នុងព្រឹត្តិការណ៍ប្រកួតប៉េតង់ថ្នាក់ពិភពលោក ថ្នាក់អាស៊ី និងនៅស៊ីហ្គេមនៅតែអាចធ្វើបានដោយជោគជ័យក្នុងការយកឈ្នះលើកីឡាការិនីជើងខ្លាំងរបស់ថៃហើយដណ្ដើមបានមេដាយមាសជូនជាតិដែលជាមេដាយមាសទី៥របស់កម្ពុជាក្នុងលទ្ធផលប្រកួតចុងក្រោយបំផុតគឺ៣០ទល់១៦។
ជ័យជម្នះរបស់អ្នកស្រីបានបង្ហាញនូវមោទនភាពយ៉ាងខ្លាំងរបស់កីឡាករកីឡាការិនីកម្ពុជា លើឆាកអន្តរជាតិបើទោះជាត្រូវគេដឹងថា បានរងសម្ពាធពីរផ្ទួនគ្នាគឺទី១ប៉ះជាមួយជើងខ្លាំងនិងទី២រងសម្ពាធនៅពេលប៉ះជាមួយម្ចាស់ប្រទេសនោះក៏ដោយ ។ អ្នកនាំពាក្យកម្ពុជានៅតែយល់ថា កម្ពុជានឹងបន្តឈ្នះមេដាយមាសបន្ថែមទៀតបើទោះជាកម្ពុជាត្រូវជួបប្រទះនឹងសម្ពាធធំទាំងពីរនៅលើសង្វៀនអន្តរជាតិមីយ៉ាន់ម៉ាក្ដី ។ ចាំមើលតើកម្ពុជានឹងអាចបន្តដណ្ដើមបានមេដាយមាសប៉ុន្មានទៀតទម្រាំដល់ចប់ការប្រកួត ?
ចែករំលែកព័តមាននេះ