ខេត្តសៀមរាប ៖ ពិធីបុណ្យបូជាសព ឬរំលាយសពរួមគ្នា តាមបែបប្រពៃណីទំនៀមទម្លាប់ពីបុរាណ បន្តពីមួយជំនាន់ទៅមួយជំនាន់ ត្រូវបានធ្វើឡើងយ៉ាងអធិកអធម នៅក្នុងភូមិតាប្រុក ឃុំលាងដៃស្រុកអង្គរធំ ខេត្តសៀមរាប…
ខេត្តសៀមរាប ៖ ពិធីបុណ្យបូជាសព ឬរំលាយសពរួមគ្នា តាមបែបប្រពៃណីទំនៀមទម្លាប់ពីបុរាណ បន្តពីមួយជំនាន់ទៅមួយជំនាន់ ត្រូវបានធ្វើឡើងយ៉ាងអធិកអធម នៅក្នុងភូមិតាប្រុក ឃុំលាងដៃស្រុកអង្គរធំ ខេត្តសៀមរាប ដែលមានចំនួនអ្នកស្លាប់យកមកធ្វើបុណ្យរួមគ្នាមាន ២៩សព ក្នុងនោះប្រុស១៤សព ចាប់ពីអាយុ៣៦ឆ្នាំឡើងទៅដល់៩៤ឆ្នាំ និងស្រី១៥សព ចាប់ពីអាយុ ៥១ឆ្នាំឡើងទៅដល់ ៨៧ឆ្នាំ ។
មានការកត់សម្គាល់ថា នៅក្នុងតំបន់អង្គរពោពេញទៅដោយមរតករូបី និងអរូបីជាដើម មានដូចជា ប្រាសាទបុរាណ វត្តអារាមធម្មជាតិ ប្រជាជន ស្នាដៃសិល្បៈ និងទំនៀមទម្លាប់ប្រពៃណីផ្សេងៗ ។
ជាក់ស្តែងដូចជា ពិធីបូជាសព ឬរំលាយសពរួមគ្នានេះ បានរៀបចំឡើងដោយប្រជាជនរស់នៅក្នុងភូមិតាប្រុក ឃុំលាងដៃ ស្រុកអង្គរធំ ខេត្តសៀមរាប ហើយទំនៀមបែបនេះ មាននៅតែក្នុងតំបន់រមណីយដ្ឋានអង្គរ ខេត្តសៀមរាបប៉ុណ្ណោះ ។
សូមបញ្ជាក់ផងដែរថា ពិធីបុណ្យបូជាសព ឬរំលាយសពរួមគ្នានេះ បានធ្វើឡើងរយៈពេល៣ថ្ងៃ ចាប់ពីថ្ងៃទី៦ ថ្ងៃ៧ និងថ្ងៃ៨ ខែកុម្ភៈ ឆ្នាំ២០២៥ ក្នុងបរិវេណសាលាឆទាន ស្ថិតនៅភូមិតាប្រុក ឃុំលាងដៃ ស្រុកអង្គរធំ ខេត្តសៀមរាប។
តាមការបញ្ជាក់របស់ព្រឹទ្ធាចារ្យលោកតា រ៉េន នៅក្នុងភូមិតាប្រុក ឃុំលាងដៃ ស្រុកអង្គរធំ ខេត្តសៀមរាប បានបញ្ជាក់ថា ពិធីបូជាសព ឬរំលាយសពរួមគ្នា តាមបែបប្រពៃណីទំនៀមទម្លាប់ពីបុរាណនេះ គឺបានបន្តធ្វើតៗមកពីមួយជំនាន់ទៅមួយជំនាន់ ដែលមានប្រវត្តិនៅលើទឹកដីអង្គរជាយូរលង់ណាស់មកហើយ បានក្លាយទៅជាសរណវត្ថុដ៏សំខាន់ប្រចាំជីវិត ប្រចាំចិត្តនៃពុទ្ធសាសនិកខ្មែរ ។ រហូតបង្កើតបានប្រពៃណីទំនៀមទម្លាប់បុណ្យទានជាច្រើនទុកជាភស្តុតាង តំណាងការគោរពស្រឡាញ់របស់ខ្លួន បន្តដល់កូនចៅជំនាន់ក្រោយរៀងដរាបមកដល់បច្ចុប្បន្ននេះ ។
ក្នុងចំណោមបុញ្ញកម្មទាំងឡាយនោះ «បុណ្យបូជាសព ឬបុណ្យរំលាយសព» ត្រូវបានចាត់ទុកជាពិធីកម្មមួយដ៏សំខាន់ មានអត្ថន័យផ្សារភ្ជាប់ជាមួយព្រះពុទ្ធសាសនា និងប្រពៃណី ទំនៀមទម្លាប់ខ្មែរ ដែលកើតមានតាំងពីយូរលង់ណាស់មកហើយ ។ លោកតាព្រឹទ្ធាចារ្យបន្តទៀតថា ក្នុងសម័យដើម«បុណ្យបូជាសព ឬបុណ្យរំលាយសព» ធ្វើឡើង កំណត់រយៈពេល៣យប់៤ថ្ងៃ និងជួនកាលមានរហូតដល់៧យប់៧ថ្ងៃក៏មាន ។
តាមទំនៀមគេច្រើនធ្វើបុណ្យនេះ ភ្ជាប់ជាមួយនឹងបុណ្យព្រះមេរុបូជាព្រះសពព្រះចៅអធិការវត្ត ឬបុណ្យបញ្ចុះខណ្ឌសីមាឆ្លងព្រះវិហារ និងឆ្លងកុដិ សាលាឆទានជាដើម ដោយហេតុនោះហើយ ទើបកម្រនឹងធ្វើណាស់ ។ គេច្រើនធ្វើបុណ្យនេះឡើងនៅខែផល្គុន ឬខែមាឃ ក្នុងរដូវប្រាំង គឺនៅបន្ទាប់ពីបងប្អូនប្រជាកសិករយើងប្រមូលភោគផលស្រូវរួចរាល់ ។
ប្រជាជនដែលរស់នៅក្នុងភូមិផងរបងជាមួយគ្នា បានព្រមព្រៀងគ្នាជ្រើសរើសពេលវេលា និងរៀបចំធ្វើបុណ្យនេះឡើងទៅតាមហោរាសាស្ត្រ ឬហៅថា គ្រូទស្សន៍ទាយ ។ ម្យ៉ាងទៀតនៅពេលថ្ងៃរៀបចំបុណ្យជិតចូលមកដល់ ចាស់ទុំជំនុំស្រុក តែងប្រកាសហៅកូនចៅសាច់ ញាតិនៅទីជិតក្តីឆ្ងាយក្តី ឱ្យទៅប្រជុំគ្នាដើម្បីរៀបចំបូជាទៅតាមទំនៀមទម្លាប់ បានរៀបចំមានរចនាលម្អដោយផ្កាភ្ញីលតាវល្លិចម្រុះពណ៌ មានតាក់តែងជារាជវ័តព័ន្ធ ព័ទ្ធដោយខ្សែសីមា និងរៀបចំរានទេវតាគ្រប់ទិសទាំង៨ ។ តាមទំនៀមពិធីបុណ្យនេះ ប្រារព្ធធ្វើរយៈពេល៣យប់៤ថ្ងៃ ឬច្រើនថ្ងៃជាងនេះក៏មាន អាស្រ័យតាមសទ្ធា និងកម្លាំងធនធានរបស់អ្នក ស្រុក ឬបងប្អូនសាច់ញាតិ ។
ពិធីបុណ្យបូជាសព ឬបុណ្យរំលាយសពរួមគ្នានេះ មានជាលំដាប់លំដោយតាំងពីការក្រុងពលី សុំទឹកដីទីកន្លែងធ្វើបុណ្យ កិច្ចនិមន្តព្រះសង្ឃចម្រើនព្រះបរិត្ត សម្តែងព្រះធម៌ទេសនា វេរភត្ត និងទេយ្យវត្ថុប្រគេនព្រះសង្ឃ និងអភិសេកអដ្ឋិធាតុបុព្វការីជនជាដើមផងដែរ ។ លុះដល់វេលាថ្ងៃត្រង់ជាថ្ងៃឆ្លងបញ្ចប់ពិធីបុណ្យ បងប្អូនសាច់ញាតិ ឬឪពុកម្ដាយ ពុទ្ធបរិស័ទ តែងមានទំនៀមរាប់បាត្រ វេរចង្ហាន់ដល់ព្រះសង្ឃ ដែលខ្លួនបានរួបរួមគ្នានិមន្តធ្វើបុណ្យ ដើម្បីសុំសេចក្តីសុខ ចម្រើន ។
ក្នុងពិធីនោះដែរ បងប្អូនដែលមានជីដូនជីតា ញាតិសណ្តាន ដែលបានចែកឋានទៅ បានយកទៅបញ្ចុះនៅតាមវត្ត ឬទីទួលកប់សព ពេលនេះក៏បានធ្វើពិធីជីកគាស់យកឆ្អឹង ។
នៅថ្ងៃផ្តើមបុណ្យ ពុទ្ធបរិស័ទជិតឆ្ងាយជួបជុំគ្នាតាមភូមិលំនៅរៀងៗខ្លួន រៀបចំតាក់តែងគ្រែស្នែង ឬសង្ឃឹកលម្អដោយផ្កាភ្ញី រួចសែងដង្ហែមាតាបិតា និងសាច់ញាតិដែលចាស់ជរា ព្រមទាំងអដ្ឋិធាតុបុព្វការីជន ឆ្ពោះទៅកាន់សាលាឆទាន ដែលត្រៀមរៀបចំធ្វើពិធីបុណ្យរួមគ្នានោះឡើង ។ លុះទៅដល់ហើយដង្ហែប្រទក្សិណសាលាឆទាន៣ជុំទៀត ទុកជាការសម្តែងសេចក្តីគោរពចំពោះព្រះរតនត្រ័យ និងសាលាឆទាន ឬវត្តអារាម ទើបអញ្ជើញមាតាបិតា សាច់ញាតិ និងអដ្ឋិធាតុទៅតម្កល់ក្នុងរោងបុណ្យ ដែលគេកសាងត្រៀមបម្រុងរួចជាស្រេចនៅជុំវិញឧបដ្ឋានសាលាឆទាន ឬសាលាធម្មសភា សម្រាប់ធ្វើបុណ្យតទៅទៀត។
ក្នុងនោះក្រុមគ្រួសារណាមានធនធាន គេរៀបចំបូជាដោយមេរុ អ្នកខ្វះខាតធនធានបូជាទៅធម្មតា ។ លុះថ្ងៃឆ្លងបុណ្យក្នុងវេលាម៉ោង៤ទៀបភ្លឺ រៀបចំធ្វើពិធីពុទ្ធាភិសេក និងអភិសេកអដ្ឋិធាតុបុព្វការីជនយ៉ាងមហោឡារិក រហូតដល់ចប់កិច្ចពិធីបុណ្យ ។
លោកតាព្រឹទ្ធាចារ្យបានបញ្ជាក់ទៀតថា ពេលបច្ចុប្បន្ននេះ នៅតាមបណ្តាភូមិ ស្រុកក្នុងខេត្តសៀមរាប ពុំសូវដែលមានធ្វើពិធីបុណ្យបូជាសព ឬបុណ្យរំលាយសពរួមគ្នានេះឡើយ តែចំពោះប្រជាពលរដ្ឋរស់នៅក្នុងតំបន់អង្គរ ស្រុកអង្គរធំ នៅតែបន្តអភិរក្ស ថែរក្សានូវប្រពៃណី ទំនៀមទម្លាប់ដូនតា ក្នុងការបណ្តុះបណ្តាលក្មេងៗជំនាន់ក្រោយ បន្តថែរក្សាមរតកដូនតាខ្មែរយើងឲ្យបានគង់វង្សរៀងរហូតទៅ ៕
ចែករំលែកព័តមាននេះ