ខេត្តសៀមរាប ៖ ពិធីចាប់ត្រីរួមគ្នាសម្រាប់ធ្វើពិធីបុណ្យឡើងមាឃរបស់អ្នកស្រុកប្រាសាទបាគង ដែលជាទំនៀមទម្លាប់មួយតាំងពីបុរាណមក បានរៀបចំឡើងនៅថ្ងៃទី៩ ខែកុម្ភៈ ឆ្នាំ២០២៥ ចាប់ពីម៉ោង៦កន្លះព្រឹក នៅក្នុងបឹងបង្កោង ភូមិបង្កោង…
ខេត្តសៀមរាប ៖ ពិធីចាប់ត្រីរួមគ្នាសម្រាប់ធ្វើពិធីបុណ្យឡើងមាឃរបស់អ្នកស្រុកប្រាសាទបាគង ដែលជាទំនៀមទម្លាប់មួយតាំងពីបុរាណមក បានរៀបចំឡើងនៅថ្ងៃទី៩ ខែកុម្ភៈ ឆ្នាំ២០២៥ ចាប់ពីម៉ោង៦កន្លះព្រឹក នៅក្នុងបឹងបង្កោង ភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប ។ នេះបើតាមការបញ្ជាក់របស់លោកអភិបាលស្រុកប្រាសាទបាគង ។ ទោះបីជាបែបណា ការចាប់ត្រីនេះ មានទ្រង់ទ្រាយមិនធំដូចការចាប់ត្រីប៉ុន្មានថ្ងៃមុន នៅបឹងក្រមក្នុងខេត្តត្បូងឃ្មុំប៉ុន្មានថ្ងៃមុននោះទេ តែជាទំនៀមទម្លាប់ដ៏ល្អមួយសម្រាប់អ្នកស្រុកត្រូវតែប្រារព្វឡើង ។
លោក សូរ ប្លាតុង អភិបាលស្រុកប្រាសាទបាគង ខេត្តសៀមរាប បានឱ្យដឹងថា ដូចសព្វរាល់ដងនៅព្រឹកថ្ងៃទី០៩ ខែកុម្ភៈ ឆ្នាំ២០២៥ ប្រជាពលរដ្ឋប្រុស-ស្រី ចាស់-ក្មេង និងភ្ញៀវទេសចរបរទេសយ៉ាងច្រើនកុះករ បានមកប្រមូលផ្តុំគ្នានៅបឹងអភិរក្សមួយ ស្ថិតនៅក្នុងភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប ចាប់ត្រីរួមគ្នា ដើម្បីយកមកធ្វើជាចង្ហាន់ប្រគេនព្រះសង្ឃក្នុងថ្ងៃឡើងមាឃ ឬឡើងអ្នកតា និងធ្វើម្ហូបសម្រាប់គ្រួសារ ព្រមទាំងទទួលភ្ញៀវ ដែលជាទំនៀមទម្លាប់របស់ប្រជាពលរដ្ឋរស់នៅតំបន់រមណីយដ្ឋានអង្គរ ប្រារព្ធធ្វើជារៀងរាល់ឆ្នាំ ។
លោកអភិបាលស្រុកបានបន្តថា ពិធីនេះមានសារៈសំខាន់ណាស់ ទី១ រក្សាបានវប្បធម៌ ប្រពៃណី ទំនៀមទម្លាប់ របស់ដូនតាយើង ។ ទី២ ទាក់ទាញភ្ញៀវទេសចរជាតិ និងអន្តរជាតិ ឱ្យពួកគាត់មកឃើញអំពីទំនៀមទម្លាប់ និងអ្វីដែលយើងបានអភិរក្សនេះ ព្រោះស្រុកប្រាសាទបាគង ជាស្រុកមរតកវប្បធម៌ ។ និងទី៣ នៅពេលគេស្គាល់កន្លែងយើងច្រើន ប្រជាសហគមន៍នឹងទទួលបានចំណូល ហើយក៏មានការអភិវឌ្ឍនៅមូលដ្ឋានយើងជាបន្តបន្ទាប់ផងដែរ ។
លោកបានបន្ថែមទៀតថា កាលពីមុនពិធីចាប់ត្រីនេះ អ្នកមកចូលរួម គឺមានអ្នកភូមិបង្កោងប៉ុណ្ណោះ ប៉ុន្តែឥឡូវដោយមានការផ្សព្វផ្សាយបានទូលំទូលាយ ធ្វើឱ្យមានការចូលរួមច្រើនមកពីគ្រប់ទិសទី មានទាំងភ្ញៀវទេសចរបរទេសផងដែរ ។ ដូចនេះ អាជ្ញាធរមានគម្រោងបន្តលែងកូនត្រីចូលនៅក្នុងបឹងនេះបន្ថែម ហើយដល់ខែទឹកឡើងដាក់ព្រួលការពារកុំឱ្យត្រីនៅក្នុងបឹងនេះ ចេញទៅខាងក្រៅ ។ ជាពិសេសនោះ គឺអាជ្ញាធរមានគម្រោងរៀបចំធ្វើយ៉ាងម៉េចឱ្យប្រជាពលរដ្ឋនៅក្នុងមូលដ្ឋានទទួលបានចំណូលដោយផ្ទាល់ ។
ក្នុងឱកាសនោះដែរ លោក ពេជ្រ ឃិន មេភូមិបង្កោងបានឱ្យដឹងថា ពិធីចាប់ត្រីរួមគ្នានេះ បានធ្វើឡើងនៅម៉ោង៧ព្រឹក ដោយគណៈកម្មការភូមិបាញ់កាំជ្រួច បន្លឺស្នូរជាសញ្ញា អនុញ្ញាតឱ្យចុះចាប់ត្រីបាន ។ ហើយអ្នកចាប់ត្រីត្រូវប្រើប្រាស់តែឧបករណ៍បុរាណទាំង អស់ រួមមានដូចជា ឈ្នាង អង្រុត និងសំណាញ់ជាដើម ។ ចំពោះការចាប់ត្រីនេះដែរ គណៈកម្មការបានកំណត់ជាពីរផ្នែក ។
ជាដំបូងប្រជាជនទាំងអស់អាចរកត្រីទុកសម្រាប់ខ្លួនឯងផ្ទាល់ រីឯមួយផ្នែកនៃបឹងដែលដាក់សម្រាស់ការពារមិនឱ្យចាប់ពីដំបូងនោះ ត្រូវទុកចាប់រួមគ្នា សម្រាប់ធ្វើទឹកនំបញ្ចុកប្រគេនព្រះសង្ឃ ។ លោកថា សម្រាប់ទិន្នផលត្រីឆ្នាំនេះ មានប្រហាក់ប្រហែលឆ្នាំមុន ប៉ុន្តែដោយសារឆ្នាំនេះ អ្នកចុះចាប់មានចំនួនច្រើន ចឹងហើយអ្នកចាប់បានម្នាក់បន្តិចៗ ប៉ុណ្ណោះ ។
សូមជម្រាបថា រមណីយដ្ឋានអង្គរ ប្រមូលផ្តុំទៅដោយបេតិកភណ្ឌរស់ ដែលសម្បូរទាំងមរតកអរូបី និងរូបីជាច្រើន ហើយត្រូវបានអ្នកស្រុកអង្គរបន្តប្រតិបត្តិយ៉ាងខ្ជាប់ខ្ជួនរហូតមកដល់បច្ចុប្បន្ន ។
ជាក់ស្តែងជារៀងរាល់ឆ្នាំ ក្រោយពេលប្រមូលផលស្រូវរួចរាល់ ឱ្យតែមកដល់ខែមាឃ ប្រជាពលរដ្ឋរស់នៅក្នុងភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប តែងតែនាំគ្នាប្រារព្ធពិធីចាប់ត្រីរួមមិនដែលខកខាន ជាលក្ខណៈសហគមន៍ គឺសម្រាប់តែសមាជិកក្នុងភូមិបង្កោងតែប៉ុណ្ណោះ ដើម្បីត្រៀមរៀបចំពិធីឡើងមាឃ ឬឡើងអ្នកតានៅថ្ងៃបន្ទាប់ តាមទំនៀមទម្លាប់ពីបុរាណមក ។
ការចាប់ត្រីរួមគ្នាធ្វើឡើងនៅត្រពាំងធំមួយ ដែលជាត្រពាំងបុរាណមានទឹកខួបប្រាំងខួបវស្សា អ្នកភូមិបានអភិរក្សទុក ការពារមិនអនុញ្ញាតឱ្យនរណាម្នាក់ចូលមកនេសាទផ្តេសផ្តាស់ខុសពីខែមាឃនេះឡើយ លុះត្រាតែមានការសម្រេចគ្នាពីគណៈកម្មការរៀបចំបុណ្យជាមុន ហើយកំណត់ថ្ងៃនេសាទរួម ទើបអ្នកភូមិអាចទៅរកចាប់ត្រីបាន ។ ប៉ុន្តែត្រូវតែប្រើឧបករណ៍នេសាទបុរាណ រួមមានសំណាញ់ អង្រុត ឈ្នាង តែប៉ុណ្ណោះ ។
ត្រីដែលចាប់បាននោះ មួយផ្នែកទុកសម្រាប់ធ្វើម្ហូបជាលក្ខណៈគ្រួសាររៀងៗខ្លួន មួយផ្នែកទៀត ទុកសម្រាប់ធ្វើទឹកនំបញ្ចុក ម្ហូបអាហារ និងចង្ហាន់ជាដើម សម្រាប់ប្រគេនព្រះសង្ឃនៅថ្ងៃធ្វើកិច្ចពិធីឡើងមាឃ ឬបុណ្យឡើងអ្នកតា នៅសាលាឆាន់ ក្នុងភូមិតាមទំនៀមបុរាណមិនដែលខកខាន ៕
ចែករំលែកព័តមាននេះ