រាជធានីភ្នំពេញ ៖ កាលពីវេលាម៉ោង០១និង២០នាទីរំលងអធ្រាត្រ ឈានចូលថ្ងៃទី០៣ ខែកុម្ភៈ ឆ្នាំ២០២៥ កម្លាំងអាវុធហត្ថរាជធានីភ្នំពេញក្នុងខណ្ឌជ្រោយចង្វារ បានធ្វើការល្បាតដើម្បីបង្ការបង្ក្រាបក្រុមក្មេងទំនើងក្នុងភូមិសាស្ត្រខណ្ឌ ។ ជាលទ្ធផលបានឃាត់ខ្លួនក្រុមក្មេងទំនើងបានចំនួន១៥នាក់…
រាជធានីភ្នំពេញ ៖ កាលពីវេលាម៉ោង០១និង២០នាទីរំលងអធ្រាត្រ ឈានចូលថ្ងៃទី០៣ ខែកុម្ភៈ ឆ្នាំ២០២៥ កម្លាំងអាវុធហត្ថរាជធានីភ្នំពេញក្នុងខណ្ឌជ្រោយចង្វារ បានធ្វើការល្បាតដើម្បីបង្ការបង្ក្រាបក្រុមក្មេងទំនើងក្នុងភូមិសាស្ត្រខណ្ឌ ។
ជាលទ្ធផលបានឃាត់ខ្លួនក្រុមក្មេងទំនើងបានចំនួន១៥នាក់ (ស្រី១នាក់) ដែលធ្វើសកម្មភាពជាក្រុម បង្ហោះម៉ូតូតាមផ្លូវសាធារណៈ នៅចំណុចផ្លូវបេតុង ភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ។
ក្មេងទំនើងទាំងនេះ ត្រូវបញ្ជូនបន្តទៅកាន់ទីបញ្ជាការកងរាជអាវុធហត្ថរាជធានីភ្នំពេញ ដើម្បីធ្វើការអប់រំ ក្នុងនោះ ក្មេងទំនើង១៤នាក់ ត្រូវដាក់វិន័យរដ្ឋបាល ដោយកោរសក់ហាត់កីឡា លើកម៉ូតូដើរក្នុងទីបញ្ជាការដោយស្រែកថា «ខ្ញុំក្មេងទំនើងបង្ហោះម៉ូតូ កុំយកតម្រាប់តាមខ្ញុំ ពីពេលនេះទៅ ខ្ញុំឈប់បង្ហោះម៉ូតូហើយ» ព្រមទាំងដកហូតម៉ូតូ០៧គ្រឿង រក្សាទុក០៣ខែផងដែរ ។
សូមរំលឹកផងដែរថា កន្លងមក សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានដាក់បទបញ្ជាដ៏ម៉ឺងម៉ាត់ ពាក់ព័ន្ធនឹងក្មេងទំនើង ដោយត្រូវអនុវត្តគ្រប់វិធានការឲ្យបានតឹងរឹងបំផុតទាំងវិធានការរដ្ឋបាល និងវិធានការច្បាប់ ដោយឡែក ចំពោះក្មេងទំនើងបង្ហោះម៉ូតូនៅតាមដងផ្លូវសាធារណៈ ត្រូវឃាត់ម៉ូតូរក្សារទុករយៈពេលបីខែចំពោះការប្រព្រឹត្តលើកទីមួយ និងប្រាំមួយខែប្រសិនបើមិនរាងចាល នៅតែប្រព្រឹត្តលើកទីពីរបន្តទៀត ៕
ចែករំលែកព័តមាននេះ