ខេត្តពោធិ៍សាត់ ៖ ឯកឧត្តម នេត្រ ភក្ត្រា បានគូសបញ្ជាក់ថា អ្នកសារព័ត៌មានមិនមែនជាមន្ត្រីនគរបាលយុត្តិធម៌ មិនមែនជាតុលាការ ហើយក៍មិនមែនជាអ្នកមានអំណាចបញ្ជាគេឲ្យធ្វើនេះធ្វើនោះដែរ គឺគ្រាន់តែជាអ្នកនាំពាក្យពីកន្លែងមួយទៅកន្លែងមួយ…
ខេត្តពោធិ៍សាត់ ៖ ឯកឧត្តម នេត្រ ភក្ត្រា បានគូសបញ្ជាក់ថា អ្នកសារព័ត៌មានមិនមែនជាមន្ត្រីនគរបាលយុត្តិធម៌ មិនមែនជាតុលាការ ហើយក៍មិនមែនជាអ្នកមានអំណាចបញ្ជាគេឲ្យធ្វើនេះធ្វើនោះដែរ គឺគ្រាន់តែជាអ្នកនាំពាក្យពីកន្លែងមួយទៅកន្លែងមួយ ប្រកបដោយប្រភពច្បាស់លាស់តែប៉ុណ្ណោះ ។
ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានលើកឡើងបែបនេះ ក្នុងឱកាសជួបសំណេះសំណាលជាមួយថ្នាក់ដឹកនាំ មន្ត្រីរាជការ នៃមន្ទីរព័ត៌មាន និងអ្នកសារព័ត៌មាន នៅខេត្តពោធិ៍សាត់ កាលពីរសៀលថ្ងៃទី១៤ ខែមករា ឆ្នាំ២០២៥ បន្ទាប់ពីឯកឧត្តមឡើងកាន់តំណែងជារដ្ឋមន្ត្រីក្រសួងព័ត៌មាន នៃរាជរដ្ឋាភិបាល អាណត្តិទី៧ ដែលបន្តដឹកនាំដោយសម្ដេចបវរធិបតី ហ៊ុន ម៉ាណែត នាយករដ្ឋមន្ត្រី នៃរាជរដ្ឋាភិបាលកម្ពុជា ។
ការជួបសំណេះសំណាលនេះ ក្នុងគោលបំណងរួមគ្នាពិភាក្សា ផ្លាស់ប្ដូរមតិយោបល់ និងពិនិត្យទៅលើបញ្ហាប្រឈមនានា ដែលជួបប្រទះកន្លងមក ដើម្បីរួមគ្នាកែលម្អរ ដោះស្រាយ ប្រកបដោយប្រសិទ្ធភាព និងទាន់ពេលវេលា ។
ឯកឧត្តម នេត្រ ភក្ត្រា សូមឲ្យមន្ត្រី នៃមន្ទីរព័ត៌មាន និងក្រុមការងារសាធាណៈមតិ នៅក្នុងខេត្តពោធិ៍សាត់ទាំងអស់ ត្រូវជំរុញការងារគ្រប់គ្រងសណ្តាប់ធ្នាប់ក្នុងវិស័យព័ត៌មាន ៖ ទី១.គឺរៀបចំធម្មនុញ្ញវិជ្ជាជីវៈសារព័ត៌មាន, ទី២.រៀបចំច្បាប់ទម្លាប់, ទី៣.ជំរុញការចុះបញ្ជីឲ្យបានត្រឹមត្រូវក្នុងប្រតិបត្តិការ និងទី៤.អ្នកសារព័ត៌មានកំណត់ឱ្យមានអត្តសញ្ញាណច្បាស់លាស់ ដោយត្រូវធ្វើប័ណ្ណសម្គាល់ខ្លួនឱ្យបានត្រឹមត្រូវ ដែលប័ណ្ណព័ត៌មានទាំងនេះចេញដោយក្រសួងព័ត៌មាន។ ជាមួយគ្នានេះ ត្រូវយកចិត្តទុកដាក់ពង្រឹងផ្នែកសណ្ដាប់ធ្នាប់សារព័ត៌មាន ដើម្បីជាជំនឿទុកចិត្តដល់ប្រជាពលរដ្ឋ ចំពោះព័ត៌មាន ដែលបានផ្សព្វផ្សាយផ្ដល់នូវសន្តិសុខព័ត៌មាន និងសុវត្ថិភាព នៃការប្រើប្រាស់ព័ត៌មាន ទប់ស្កាត់ និងប្រឆាំងនូវព័ត៌មានក្លែងក្លាយ។ ត្រូវពង្រឹងការងារឱ្យកាន់តែសកម្ម ទៅលើការគាំទ្រគណៈបញ្ជាការឯកភាពរដ្ឋបាលខេត្ត លើការងារគ្រប់គ្រងសាធារណមតិ ដោយតាមដានព័ត៌មាន ធ្វើការឆ្លើយតប បកស្រាយផ្សព្វផ្សាយនូវព័ត៌មានពិតជូនប្រជាពលរដ្ឋ ឱ្យយល់ដឹងពីគោលនយោបាយរបស់រាជរដ្ឋាភិបាល រួមទាំងដំណើរការអភិវឌ្ឍរីកចម្រើនរបស់ប្រទេសជាតិ ជាពិសេសរួមគ្នាទប់ស្កាត់ និងប្រឆាំងព័ត៌មានក្លែងក្លាយ ឱ្យទាន់ពេលវេលា ។
ឯកឧត្តមរដ្ឋមន្ត្រី មានប្រសាសន៍ថា ការងារផ្សព្វផ្សាយព័ត៌មានក្នុងសម័យឌីជីថល សំខាន់គឺត្រូវគ្រប់គ្រងខ្លឹមសារ និងល្បឿននៃការផ្សព្វផ្សាយ ទើបអាចគ្រប់គ្រងព័ត៌មានបាន។ ដូច្នេះហើយ ទើបក្រសួងព័ត៌មាននៅក្នុងអាណត្តិទី៧នេះ បានដាក់ចេញនូវចក្ខុវិស័យ ត្រូវតែជាស្ថាប័នទំនាក់ទំនងសាធារណៈរបស់រាជរដ្ឋាភិបាល ដែលត្រូវតែបុរេសកម្ម សកម្ម អន្តរសកម្ម ប្រកបដោយគុណភាព និងប្រសិទ្ធិភាព ។
ឯកឧត្តមក៏បានលើកទឹកចិត្ត និងជំរុញឱ្យមានកិច្ចសហការកាន់តែខ្លាំងឡើងថែមទៀត រវាងអាជ្ញាធរមានសមត្ថកិច្ច ដែលជាប្រភពព័ត៌មាន និងបងប្អូនអ្នកសារព័ត៌មាន ព្រោះអាជ្ញាធរ និងអ្នកសារព័ត៌មាន ជាដៃគូមិនអាចខ្វះបានក្នុងកិច្ចការផ្សព្វផ្សាយព័ត៌មាន ៕
ចែករំលែកព័តមាននេះ