ឥណ្ឌូនេស៊ី ៖ ប្រទេសឥណ្ឌូនេស៊ីគ្រោងដាក់ពន្ធលើភេសជ្ជៈវេចខ្ចប់មានជាតិផ្អែម ចាប់ពីខែកក្កដា ឆ្នាំ២០២៥តទៅ ក្នុងគោលបំណងទប់ស្កាត់ការទទួលទានជាតិផ្អែមច្រើនលើសកម្រិត និងដោះស្រាយការកើនឡើងកង្វល់សុខភាពប្រជាជន ។ លោក Nirwala…
ឥណ្ឌូនេស៊ី ៖ ប្រទេសឥណ្ឌូនេស៊ីគ្រោងដាក់ពន្ធលើភេសជ្ជៈវេចខ្ចប់មានជាតិផ្អែម ចាប់ពីខែកក្កដា ឆ្នាំ២០២៥តទៅ ក្នុងគោលបំណងទប់ស្កាត់ការទទួលទានជាតិផ្អែមច្រើនលើសកម្រិត និងដោះស្រាយការកើនឡើងកង្វល់សុខភាពប្រជាជន ។
លោក Nirwala Dwi Heryanto អ្នកនាំពាក្យនៃអគ្គនាយកដ្ឋានគយឥណ្ឌូនេស៊ី បានប្រកាសក្នុងសន្និសីទសារព័ត៌មាន កាលពីពេលថ្មីៗនេះថា ពន្ធលើភេសជ្ជៈផ្អែម គ្រោងសម្រាប់អនុវត្តនៅពាក់កណ្តាលឆ្នាំ២០២៥ ។ លោកថា គោលនយោបាយនេះ មិនត្រូវបានបង្កើតឡើងដើម្បីបង្កើនប្រាក់ចំណូលរដ្ឋនោះទេ ប៉ុន្តែដើម្បីគ្រប់គ្រងការទទួលទានជាតិផ្អែម អំឡុងពេលអត្រាអ្នកកើតជំងឺទឹកនោមផ្អែមកើនឡើង។ ហើយការផ្តោតសំខាន់នៃពន្ធនេះ ដើម្បីគ្រប់គ្រងការប្រើប្រាស់ជាតិផ្អែមបន្ថែមក្នុងភេសជ្ជៈផងដែរ ។
យោងតាមទិន្នន័យពីក្រសួងសុខាភិបាលបានឱ្យដឹងថា ក្នុងរយៈពេលមួយទសវត្សរ៍កន្លងមកនេះ អត្រាអ្នកកើតជំងឺទឹកនោមផ្អែមក្នុងប្រទេសឥណ្ឌូនេស៊ីកើនឡើងទ្វេដងដល់១០% ប៉ះពាល់ដល់ប្រជាជនប្រមាណ២៨លាននាក់ក្នុងចំនួនប្រជាជនសរុបជាង ២៨៤លាននាក់។
លោក Dante Saksono Harbuwono អនុរដ្ឋមន្ត្រីក្រសួងសុខាភិបាលបានកត់សម្គាល់ថា ២៨.៧% នៃប្រជាជនឥណ្ឌូណេស៊ីលើសកម្រិតជាតិផ្អែម ប្រៃ និងខ្លាញ់ ខណៈដែល៩៥.៥% ទទួលទានផ្លែឈើ និងបន្លែមិនគ្រប់គ្រាន់។ លើសពីនេះទៀត ៣៥.៥% នៃប្រជាជនមិនបានចូលរួមសកម្មភាពលំហាត់ប្រាណគ្រប់គ្រាន់នោះទេ ។
លោកបន្ថែមថា ការដាក់ពន្ធនេះ គឺជាជំហានដ៏សំខាន់មួយក្នុងការកាត់បន្ថយហានិភ័យសុខភាពប្រជាជនឥណ្ឌូនេស៊ី។ ពន្ធថ្មីនេះ នឹងចាត់ថ្នាក់ភេសជ្ជៈដោយផ្អែកលើកម្រិតផ្អែម ដំណើរការផលិត និងលក្ខណៈវិនិច្ឆ័យផ្សេងទៀត ដើម្បីកំណត់អត្រាពន្ធដែលអាចអនុវត្តទៅបាន។
គោលនយោបាយនេះ ស្ថិតក្រោមបទប្បញ្ញត្តិរបស់រដ្ឋាភិបាលឥណ្ឌូនេស៊ី (PP) លេខ 28/2024 ដែលអនុវត្តលើច្បាប់លេខ 17/2023 ស្តីអំពីសុខភាព។ បទប្បញ្ញត្តិដែលបច្ចុប្បន្នស្ថិតក្នុងដំណាក់កាលចុងក្រោយមួយនេះ កំពុងតែត្រូវបានផ្សព្វផ្សាយយ៉ាងទូលំទូលាយដល់ភាគីពាក់ព័ន្ធ ដើម្បីធានាឱ្យមានការអនុវត្តដោយរលូន ។
អនុរដ្ឋមន្ត្រីក្រសួងសុខាភិបាលក៏បានគូសបញ្ជាក់ថា «ការសិក្សាត្រូវបានបញ្ចប់ ហើយយើងត្រៀមខ្លួនជាស្រេច ដើម្បីអនុវត្តគោលនយោបាយក្នុងឆ្នាំនេះតែម្តង នៅពេលវាត្រូវបានចុះហត្ថលេខាសម្រេច»៕ ប្រភព ៖ Jakarta Globe
ចែករំលែកព័តមាននេះ