ខេត្តកំពង់ស្ពឺ ៖ ជនសង្ស័យចំនួន០២នាក់ត្រូវបានកម្លាំងមូលដ្ឋានកងរាជអាវុធហត្ថក្រុងច្បារមន បានធ្វើការបង្ក្រាបទីតាំងជនសង្ស័យចំនួន ០២កន្លែងផ្សេងគ្នា ធ្វើការឃាត់ខ្លួនរួមជាមួយនឹងវត្ថុតាងគ្រឿងញៀនជិត ១៦កញ្ចប់ធំ អាវុធកែច្នៃ និងវត្ថុតាងជាច្រើនទៀត នៅរសៀលថ្ងៃទី១៤ ខែមករា ឆ្នាំ២០២៥​នៅក្នុងសង្កាត់​កណ្តោលដុំ ក្រុងច្បារមន និងឃុំធម្មតាអរនៃស្រុកសំរោងទង ខេត្តកំពង់ស្ពឺ។

មន្ត្រីអាវុធហត្ថក្រុងច្បារមន បាននិយាយឱ្យដឹងថា ដោយមានការអនុញ្ញាតពី លោកមេបញ្ជាការកងរាជអាវុធហត្ថ ខេត្តកំពង់ស្ពឺ និងមានការសម្របសម្រួលពី លោក ទិន សុចិត្រា ព្រះរាជអាជ្ញារងអមសាលាដំបូង ខេត្តកំពង់ស្ពឺ កម្លាំងមូលដ្ឋានកងរាជអាវុធហត្ថក្រុងច្បារមន បានធ្វើការឡោមព័ទ្ធទីតាំងផ្ទះមួយកន្លែងនៅភូមិកណ្តោលដុំ សង្កាត់​កណ្តោលដុំ​ ក្រុងច្បារមន ខេត្តកំពង់ស្ពឺ បានឃាត់ខ្លួនជនសង្ស័យចំនួនម្នាក់ ពាក់ព័ន្ធនឹងករណីរក្សាទុក ចែកចាយ និងជួញដូរគ្រឿងញៀនដោយខុសច្បាប់។

មន្ត្រីអាវុធហត្ថបានបន្តថា ជនសង្ស័យដែលឃាត់ខ្លួនមានឈ្មោះ​ ទិត្យ​ សីហា ភេទប្រុស អាយុ១៨ឆ្នាំ មុខរបរមិនពិតប្រាកដ ទីលំនៅបច្ចុប្បន្នក្នុងភូមិព្រៃប្រដាក់​ ឃុំធម្មតាអរ ស្រុកសំ​រោងទង ខេត្តកំពង់ស្ពឺ។ នៅក្នុងប្រតិបត្តិការនោះកម្លាំងជំនាញបានចាប់យកវត្ថុតាង រួមមាន ក្រាមពណ៌សថ្លាសង្ស័យជាសារធាតុញៀនចំនួន ១៣កញ្ចប់​(ធំល្មម​ចំនួន​៣កញ្ចប់​ តូចចំនួន១០កញ្ចប់) ទូរស័ព្ទចំនួន០២គ្រឿង និងម៉ូតូ​ចំនួន ០១គ្រឿង​។

មន្ត្រីអាវុធហត្ថដដែលបានបន្តទៀតថាក្រោយធ្វើការបង្ក្រាប និងឃាត់ខ្លួនជនសង្ស័យ កម្លាំងមូលដ្ឋានក្រុងសហការ​ជាមួយ​កម្លាំងជំនាញកងរាជអាវុធហត្ថខេត្តកំពង់ស្ពឺ បានបន្តនីតិវិធីឈានទៅធ្វើការឡោមព័ទ្ធទីតាំងផ្ទះជនសង្ស័យនៅភូមិព្រៃប្រដាក់​ ឃុំធម្មតាអរ ស្រុកសំ​រោងទង ហើយឃាត់ខ្លួនជនសង្ស័យម្នាក់បន្ថែមទៀត ដែលមានឈ្មោះ​ ឃឹម​ វុត្ថា​ ភេទប្រុស អាយុ៣៥ឆ្នាំ មុខរបរមិនពិតប្រាកដ មានទីលំនៅចំណុចចាប់ខ្លួនចាប់យកវត្ថុតាងម្សៅក្រាមពណ៌សថ្លាសង្ស័យសារធាតុញៀនចំនួន០៣កញ្ចប់​ធំល្មម ទូរស័ព្ទចំនួន​២គ្រឿង កាំភ្លើង​កែឆ្នៃបាញ់គ្រាប់កង់មួយដើម និងវត្ថុតាងផ្សេងទៀតមួយចំនួន។

មន្ត្រីអាវុអហត្ថក្រុងច្បារមន បានបញ្ជាក់បន្ថែមទៀតថា ក្រោយប្រតិបត្តិការត្រូវបានបញ្ចប់ ជនសង្ស័យទាំង០២នាក់ រួមទាំងវត្ថុតាងត្រូវបាននាំខ្លួន និងយកទៅកាន់បញ្ជាការមូលដ្ឋានក្រុងច្បារមនដើម្បីសួរនាំ និងកសាងសំណុំរឿងបញ្ជូនទៅតុលាការចាត់ការបន្តតាមផ្លូវច្បាប់៕