ខេត្តកំពង់ចាម ៖ បុរសវ័យ២៨ឆ្នាំម្នាក់ដែលស៊ីឈ្នួលចាំចម្ការឲ្យគេ ស្ថិតនៅភូមិ២២ ឃុំចំការអណ្ដូង ស្រុកចំការលើ ។ ជាមួយនោះ ដោយសារតែខ្វះខាតម្ហូប បុរសនេះបានកាប់មាន់មួយក្បាលចម្អិនធ្វើម្ហូបទទួលទានតែម្នាក់ឯង…
ខេត្តកំពង់ចាម ៖ បុរសវ័យ២៨ឆ្នាំម្នាក់ដែលស៊ីឈ្នួលចាំចម្ការឲ្យគេ ស្ថិតនៅភូមិ២២ ឃុំចំការអណ្ដូង ស្រុកចំការលើ ។ ជាមួយនោះ ដោយសារតែខ្វះខាតម្ហូប បុរសនេះបានកាប់មាន់មួយក្បាលចម្អិនធ្វើម្ហូបទទួលទានតែម្នាក់ឯង ក្រោយមក គាត់ក៏មានអាការៈគ្រុនក្តៅ ត្រូវបាននាំមកមណ្ឌលសុខភាព តែដោយស្ថានភាពជំងឺកាន់តែធ្ងន់ធ្ងរ ត្រូវបានក្រុមសាច់ញាតិបញ្ជូនទៅសង្គ្រោះនៅមន្ទីរពេទ្យរាជធានីភ្នំពេញ ថ្ងៃទី៩មករា ឆ្នាំ២០២៥ ហើយបុរសរូបនេះបានស្លាប់ដោយសារជំងឺផ្ដាសាយបក្សី(H5N1) ។
យោងតាមសេចក្តីប្រកាសព័ត៌មានស្ដីពីករណីស្លាប់ ដោយសារជំងឺផ្ដាសាយបក្សីរបស់ក្រសួងសុខាភិបាលចុះថ្ងៃទី១០ ខែមករា ឆ្នាំ២០២៥ ក្នុងនោះ ដោយគូសបញ្ជាក់ថា វិជ្ជមានវីរុសផ្ដាសាយបក្សីប្រភេទ(H5N1) ពីវិទ្យាស្ថានជាតិសុខភាពសាធារណៈ នៅថ្ងៃទី៩ មករា ឆ្នាំ២០២៥ មានទីលំនៅក្នុងភូមិ២២ ឃុំចំការអណ្តូង ស្រុកចំការលើ ខេត្តកំពង់ចាម។ ទោះជាមានការយកចិត្តទុកដាក់ការថែទាំនិងជួយសង្គ្រោះពីសំណាក់ក្រុមគ្រូពេទ្យក៏ដោយ ដោយសារអ្នកជំងឺមានស្ថានភាពធ្ងន់ធ្ងររួមមានគ្រុនក្តៅ ក្អក ហត់ និងពិបាកដកដង្ហើម អ្នកជំងឺបានស្លាប់ នៅថ្ងៃទី១០ ខែមករា ឆ្នាំ២០២៥។
តាមការសាកសួរបង្ហាញថា ផ្ទះអ្នកជំងឺមានចិញ្ចឹមមាន់ជាលក្ខណៈគ្រួសារ ហើយបុរសនេះ ជាអ្នកថែទាំនិងបានយកមាន់ឈឺមកធ្វើម្ហូបបរិភោគ។
លោកនង ម៉េងហៀង ប្រធានការិយាល័យបសុព្យាបាលនៃមន្ទីរកសិកម្មខេត្តបានប្រាប់ឲ្យដឹង កាលពីយប់ថ្ងៃទី១០ មករា ថា ក្រោយពីទទួលបាននូវព័ត៌មាននេះ លោកប្រធានមន្ទីរកសិកម្មរុក្ខាប្រមាញ់ និងនេសាទខេត្ត ក៏ដូចជាឯកឧត្តមអ៊ុន ចាន់ដា អភិបាលខេត្ត មានការយកចិត្តទុកដាក់ខ្ពស់ បានចាត់ឱ្យរូបលោកដឹកនាំកម្លាំងជាច្រើននាក់ ចុះទៅកាន់ផ្ទះរបស់បុរសដែលស្លាប់ដោយជំងឺផ្តាសាយបក្សី នៅភូមិ២២តាំងពីព្រឹកព្រលឹមថ្ងៃទី១០ មករា ឆ្នាំ២០២៥។
ក្នុងពេលដែលចុះទៅដល់ទីនោះឃើញថា ផ្ទះនេះស្ថិតនៅដាច់ពីភូមិតែឯង គឺបុរសដែលស្លាប់នេះជាអ្នកស៊ីឈ្នួលមើលចម្ការដំណាំឲ្យគេក្នុងបរិវេណផ្ទះនោះឃើញមាន់ ទា និងក្ងាន ដែលចិញ្ចឹមជាលក្ខណៈគ្រួសារសម្រាប់ធ្វើម្ហូបទទួលទាន ។ កាលពីប៉ុន្មានថ្ងៃមុន បុរសអ្នកជំងឺនេះបានយកមាន់ដែលឈឺធ្វើម្ហូបទទួលទាន ក្រោយមកក៏មានអាការៈក្តៅខ្លួន ហើយត្រូវបានគេបញ្ជូនមកមណ្ឌលសុខភាពនៅថ្ងៃទី៨ មករា តែដោយស្ថានភាពមានលក្ខណៈធ្ងន់នោះក៏ត្រូវបានបញ្ជូនបន្តទៅសង្គ្រោះជីវិតនៅរាជធានីភ្នំពេញ ។
តាមរយៈការយកចិត្តទុកដាក់ពីសំណាក់ក្រុមគ្រូពេទ្យ ដើម្បីសង្គ្រោះអាយុជីវិតបុរសនេះ តែមិនអាចសង្គ្រោះបានព្រោះជំងឺមានសភាពធ្ងន់ធ្ងរណាស់ទៅហើយតាមរយៈការធ្វើតេសឃើញថាបុរសនេះមានជំងឺផ្ដាសាយបក្សីដែលឆ្លងពីសត្វ ។ ក្រោយមកបុរសនេះ ក៏បានស្លាប់ព្រោះតែមេរោគផ្ដាសាយបក្សី ។ ដោយទទួលបានការណែនាំពីរដ្ឋមន្ត្រីក្រសួងសុខាភិបាល រដ្ឋមន្ត្រីក្រសួងកសិកម្ម ក៏ដូចជាការណែនាំពីឯកឧត្តមអភិបាលខេត្ត នាព្រឹកព្រលឹមថ្ងៃទី១០ មករា កម្លាំងជំនាញបសុពេទ្យបានចុះទៅដល់ទីតាំងផ្ទុះផ្ដាសាយបក្សីនេះធ្វើការហ៊ុមព័ទ្ធបាញ់ថ្នាំសម្លាប់មេរោគហើយមាន់ ទា និងក្ងាន ដែលមានជាង១០ក្បាល ត្រូវបានសម្លាប់ចោលដាក់ថ្នាំដុតបំផ្លាញចោលតាមលក្ខណៈបច្ចេកទេសត្រឹមត្រូវដើម្បីជៀសវាងកុំឲ្យមេរោគនេះរីកសាយភាយទៅកន្លែងផ្សេង។
ប្រធានការិយាល័យបសុព្យាបាលខេត្តបានបញ្ជាក់ថា រូបលោកបានដឹកនាំមន្ត្រីជំនាញចុះបាញ់ថ្នាំសម្លាប់មេរោគក្នុងបរិវេណផ្ទះចាំចម្ការ និងតាមដងផ្លូវជាច្រើនកន្លែងនៅក្នុងភូមិ២២ ឃុំចំការអណ្តូង ស្រុកចំការលើ ។
ជាមួយនោះ ក៏មានការផ្សព្វផ្សាយខិតប័ណ្ណដល់ប្រជាពលរដ្ឋនៅក្នុងភូមិឲ្យមានស្មារតីប្រុងប្រយ័ត្នខ្ពស់ ក្នុងករណីបើមានមាន់ ទាឈឺមិនត្រូវយកមកធ្វើម្ហូបចម្អិនទទួលទាននោះទេ ក្នុងករណីសង្ស័យត្រូវរាយការណ៍មកកម្លាំងជំនាញការិយាល័យបក្សសុព្យាបាលស្រុកចំការលើឲ្យបានទាន់ពេលវេលា ។ តាមរយៈការណែនាំរបស់ថ្នាក់ដឹកនាំខេត្ត ក៏ដូចជាជំនាញកម្លាំងបក្សសុជាបាលជាច្រើននាក់ត្រូវបានតាមឃ្លាំមើលដោយបិទភូមិ២២ មិនឲ្យមានចរាចរណ៍សត្វមាន់ ទា ចេញចូលក្នុងរយៈពេល១៤ថ្ងៃ។
គួររំលឹកថា នៅក្នុងឃុំមេសរជ្រៃ ស្រុកស្ទឹងត្រង់ កាលពីប៉ុន្មានឆ្នាំមុនក៏បណ្ដាលឱ្យបុរសម្នាក់ស្លាប់ដោយសារជំងឺផ្តាសាយបក្សីនេះដែរ ។ ជាមួយនោះ មានបុរសម្នាក់ទៀត ដែលបានជួយនាំយកបុរសដែលឈឺទៅកាន់មន្ទីរពេទ្យមកដល់ពេលនេះក៏មានអាការៈមិនស្រួលខ្លួន ហើយត្រូវបានមន្ទីរសុខាភិបាលខេត្តយកចិត្តទុកដាក់ធ្វើការព្យាបាលបន្តតាមដានសុខភាពផងដែរ។
ផ្អែកតាមការណែនាំប្រកាសរបស់ក្រសួងសុខាភិបាលពីរបៀបបង្ការកុំឲ្យឆ្លងជំងឺដោះស្រាយបក្សីត្រូវអនុវត្តដូចខាងក្រោម÷
-កុំប៉ះពាល់ឬទទួលទានមាន់ទាឈឺឬងាប់ហ្នឹងពាក់ស្រោមដៃនិងពាក់ម៉ាស់ឬយកក្រមាចងបិទច្រមុះមុនពេលចាប់កាន់មាន់ទាធ្វើម្ហូបអាហាររួចហើយស្រុះវាក្នុងទឹកពោះមុននឹងបោចសម្អាតរោម
-ត្រូវប្រកាន់ខ្ជាប់ខ្ជួននៅការអនុវត្តអនាម័យលាងដៃសំអាតឲ្យបានញឹកញាប់ មុនចាប់កាន់ចំណីអាហារជាពិសេសបន្ទាប់ពីការប៉ះពាល់សត្វបោចសម្អាតរោមសត្វបក្សីឬវត្ថុផ្សេងៗដែលអាចជាប្រភេទចម្លងរោគ
-ត្រូវចម្អិនម្ហូបអាហារឲ្យបានឆ្អិនល្អមុនបរិភោគជាពិសេសសាច់សត្វឬស្សីនិងស៊ុតកុំទទួលទានពងមាន់ឬពងទាជ័រព្នៅនិងទុកដាក់អាហារឆៅនិងឆ្អិនឱ្យនៅដាច់ដោយឡែកពីគ្នា សំអាតសម្ភារៈប្រើប្រាស់សម្រាប់ចម្អិនម្ហូបអាហារឲ្យបានត្រឹមត្រូវ៕
ចែករំលែកព័តមាននេះ