រាជធានីភ្នំពេញ ៖ ក្រសួងសុខាភិបាល នៃព្រះរាជាណាចក្រកម្ពុជា នឹងដាក់ឱ្យប្រើប្រាស់ថ្នាំបង្ការ មុនពេលប្រឈមនឹងការឆ្លងមេរោគអេដស៍ «Pre-Exposure Prophylaxis = ប្រីព…
រាជធានីភ្នំពេញ ៖ ក្រសួងសុខាភិបាល នៃព្រះរាជាណាចក្រកម្ពុជា នឹងដាក់ឱ្យប្រើប្រាស់ថ្នាំបង្ការ មុនពេលប្រឈមនឹងការឆ្លងមេរោគអេដស៍ «Pre-Exposure Prophylaxis = ប្រីព (PrEP)» ជាប្រភេទថ្នាំចាក់ឈ្មោះ Cabotegravir ដែលត្រូវចាក់រៀងរាល់ ២ខែម្តង សម្រាប់បង្ការការឆ្លងមេរោគអេដស៍ មុនពេលប្រឈម ជូនក្រុមប្រជាជនគន្លឹះ ដែលមានប្រឈមខ្ពស់នឹងការឆ្លងមេរោគអេដស៍ រួមមាន ៖ ក្រុមស្ត្រីបម្រើសេវាកំសាន្ត ក្រុមបុរសរួមភេទជាមួយបុរស ក្រុមអ្នកប្លែងភេទ ក្រុមអ្នកប្រើប្រាស់គ្រឿងញៀនដោយចាក់។ល។ ថ្នាំនេះ មានប្រសិទ្ធភាពក្នុងការបង្ការការចម្លងមេរោគអេដស៍ បានក្នុងកម្រិតចន្លោះពី ៩២% ទៅ៩៥% ។
បើតាមនាយកដ្ឋានប្រយុទ្ធនឹងជំងឺឆ្លង CDC បានបញ្ជាក់ថា ថ្នាំចាក់បង្ការការឆ្លងមេរោគអេដស៍ ឈ្មោះ Cabotegravir មិនមែនជាវ៉ាក់សាំងទេ រហូតមកដល់ពេលនេះ នៅលើពិភពលោកនៅមិនទាន់រកឃើញវ៉ាក់សាំងសម្រាប់បង្ការមេរោគអេដស៍ នៅឡើយទេ ។
សូមជម្រាបផងដែរថា នាពេលថ្មីៗនេះ ទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានបញ្ជាក់ថា នៅដើមខែមករា ឆ្នាំ២០២៥ ខាងមុខនេះ កម្ពុជានឹងមានថ្នាំចាក់បង្ការមេរោគអេដស៍ ដែលមានសុពលភាពរយៈពេល២ខែ និងថ្នាំលេបមុន/ក្រោយការរួមភេទ ថ្នាំមានឈ្មោះប្រីព(PrEP) ដោយឥតគិតថ្លៃ ៕
ចែករំលែកព័តមាននេះ