ស្វាយកែវរមៀត កាន់តែមានទីផ្សារ និងតម្លៃល្អ សម្រាប់នាំចេញក្រៅប្រទេស
- កំពង់ស្ពឺ
ខេត្តកំពង់ស្ពឺ៖ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ លោក យឹម ណន បាននិយាយឱ្យដឹងថា ពេលបច្ចុប្បន្ននេះ នៅក្នុងខេត្តកំពង់ស្ពឺ…
ខេត្តកំពង់ស្ពឺ៖ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ លោក យឹម ណន បាននិយាយឱ្យដឹងថា ពេលបច្ចុប្បន្ននេះ នៅក្នុងខេត្តកំពង់ស្ពឺ មានការវិនិយោគលើវិស័យរោងចក្រសហគ្រាសច្រើន ដែលក្នុងនោះក៏មានរោងចក្រកែច្នៃផ្លែឈើច្រើនផងដែរ ហើយការកើនឡើងនៃរោងចក្រកែច្នៃកសិផលនេះ មានរហូតដល់ទៅ១៥កន្លែងនៅឆ្នាំ២០២៤នេះ ដែលធ្វើឱ្យផ្លែស្វាយកែវរមៀតកាន់តែមានទីផ្សារ និងតម្លៃល្អ ។
លោក យឹម ណន ប្រធានមន្ទីរកសិកម្មរុក្ខាប្រមាញ់ និងនេសាទខេត្តលើកឡើងបែបនេះ នៅក្នុងកិច្ចប្រជុំបូកសរុបលទ្ធផលការងារកសិកម្ម រុក្ខាប្រមាញ់ និងនេសាទ ប្រចាំឆ្នាំ២០២៤ និងទិសដៅឆ្នាំ២០២៥ ថ្ងៃទី២៨ ខែធ្នូ ឆ្នាំ២០២៤។
លោកយឹម ណន ប្រធានមន្ទីរ កសិកម្មបានលើឡើងទៀតថា សម្រាប់ផ្ទៃដីដាំស្វាយកែវរមៀត នៅក្នុងខេត្តកំពង់ស្ពឺ មានចំនួនជាង៥ម៉ឺនហិកតា ហើយកំពុងឱ្យផលជាង ៤ម៉ឺនហិកតា ខណៈនៅឆ្នាំនេះការប្រមូលផលបានជាង៥០ម៉ឺនតោន។ តម្លៃស្វាយកែវរមៀតដែលត្រូវលក់ចេញ មានចំនួន២ប្រភេទ ក្នុងនោះទី១.ស្វាយខៀវ ដែលត្រូវនាំចូលរោងចក្រ តម្លៃទាបបំផុត៥០០រៀល ក្នុងមួយគីឡូក្រាម និងទី២.ស្វាយខ្ចប់ស្រស់ តម្លៃចាប់ពី១.៥០០ ទៅ២.០០០រៀល ក្នុងមួយគីឡូក្រាម ដែលតម្លៃប៉ុណ្ណេះ ធ្វើឱ្យកសិករអាចទទួលយកបាន ហើយពួកគាត់ក៏សប្បាយចិត្ត ខណៈរោងចក្រកែច្នៃផ្លែ ស្វាយនេះ គឺមានទាំងការធ្វើជាដំណាប់ និងនាំចេញស្រស់ ទៅកាន់ទីផ្សារអន្តរជាតិ ។
ប្រធានមន្ទីរកសិកម្ម លោក យឹម ណន បានបន្ថែមថា ក្រៅពីស្វាយកែវរមៀត គឺដំណាំស្រូវឆ្នាំនេះ ក៏មានតម្លៃល្អផងដែរ ហើយប្រជាកសិករក៏មិនមានការរអ៊ូរទាំរឿងតម្លៃ ដែលក្នុងនោះស្រូវសែនក្រអូបជាដើម មានតម្លៃចាប់ពី១.៣០០រៀល ទៅ១.៤០០រៀល ក្នុងមួយគីឡូក្រាម ។
ក្នុងគ្រានេះដែរ លោកស្រី ហោ ម៉ាលីន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានជំរុញដល់មន្ទីរកសិកម្មខេត្តកំពង់ស្ពឺ បន្តជួយដោះស្រាយបញ្ហាកសិផលរបស់ប្រជាពលរដ្ឋ ឱ្យអស់ពីលទ្ធភាព ក៏ដូចជាពង្រឹងចំណេះដឹងបច្ចេកទេសការដាំដុះបន្ថែមដល់ពួកគាត់ ដើម្បីឱ្យកសិផលទទួលបានផលល្អ ។
ត្រង់ចំណុចនេះ លោក យឹម ណន បានបញ្ជាក់ថា មន្ត្រីជំនាញនឹងបន្តជួយកសិករម្ចាស់ស្វាយ ឱ្យពួកគាត់ចូលរួមអនុវត្តន៍លទ្ធិកម្មកសិកម្មល្អ (GAP) និងការជួយពង្រឹងការធ្វើលទ្ធកម្មកសិកម្មល្អតាមកិច្ចសន្យា ដោយធានាពេលឱ្យផល គឺមានអ្នកទិញ ហើយតម្លៃអាចនិយាយគ្នាបាន ។
សូមបញ្ជាក់ផងដែរថា ខេត្តកំពង់ស្ពឺ ជាខេត្តសម្បូរដើមត្នោតជាងគេ ក្នុងប្រទេសកម្ពុជាមួយនេះ មានដំណាំសក្ដានុពលជាច្រើន ដូចជាស្វាយកែវរមៀត អំពៅ និងស្រូវជាដើម ហើយក៏មានបន្លែជាច្រើនប្រភេទ ខណៈការចិញ្ចឹមសត្វលក់សាច់ និងពូជក៏មានច្រើនកសិដ្ឋានផងដែរ៕
ចែករំលែកព័តមាននេះ